ශ්රි ලංකා කාන්තා කණ්ඩායම අති විශිෂ්ඨ ජයග්රහණයක් සහිතව තරගාවලි ජයග්රහණයක් හිමි කරගෙන ඇත. එය කාන්තා ක්රිකට් ඉතිහාසයේ අනුස්මරණීය සලකුණක් එක් කළ වර්ණවත් අවස්ථාවකි.
ඉතිහාසයේ පළමු වරට එංගලන්ත කාන්තා කණ්ඩායමට එරෙහිව 20/20 තරගාවලි ජයක් ලැබීමට ශ්රී ලංකා කාන්තා ක්රිකට් කණ්ඩායම ඊයේ (06) සමත්වී තිබුණි. එම ජයග්රහණය ඔවුන් ලබා ගන්නේ එංගලන්තයේ දි ය.
ඊයේ එංලන්තයේ ඩර්බි ක්රීඩාංගනයේ දිවා රාත්රි තරගයක් ලෙස පැවති තෙවන 20/20 තරගය ශ්රී ලංකා කණ්ඩාය කඩුලු 7කින් ජයග්රහණය කළේය.
කාසියේ වාසිය දිනුවේ ශ්රී ලංකා නායිකා චමරී අතපත්තු පන්දු රැකීම තේරූවේය. එය කදිම තීරණයක් විය. එංගලන්ත ක්රීඩිකාවෝ සියලු දෙනා පන්දුවාර 19ක් තුළ ලකුණු 116කට දැවී ගියහ.
වර්ණවත් පන්දු යැවීමක් සිදුකළේ නායක චමරි අතපත්තුය. ඇය පන්දු ඕවර 04ක් තුල ලකුණු 21කට කඩුළු 03ක් බිඳහෙළුවාය. උදේශිකා ප්රබෝධනී ලකුණු 16ට කඩුළු 02ක්, කවිෂා දිල්හාරි ලකුණු 16ට කඩළු 02ක් ලැබූ අතර ඉනෝෂි ප්රියදර්ශනී සහ ඉනෝකා රණවී එක කඩුල්ල බැගින් දවා ගත්හ.
පිතිකරණයේ දී එංගලන්තය වෙනුවෙන් වැඩිම ලකුණු ප්රමාණය වූ ලකුණු 23ක් ලබා ගත්තේ මයියා බවුචර්ය.
පිළිතුර ඉනිම ක්රීඩා කිරීමට පැමිණි ශ්රී ලංකා ආරම්භක පිතිකාරිණියන් යුවල වන චමරී අතපත්තු සහ අනුෂ්කා සංජීවනී සුපිරි ආරම්භයක් කණ්ඩායමට ලබා දුන්හ. ලකුණු 117ක ජයග්රාහී ඉලක්කයක් හඹා ගිය ශ්රි ලංකා කණ්ඩායමේ මුල්ම කඩුල්ල බිඳ වැටෙන්න් ලකුණු 65 දී ය. පන්දු 28 කදී හතරේ පහර 05ක් සහ හයේ පහර 2ක් සමගින් නායිකා චමරී අතපත්තු ගේ ප්රහාරාත්මක ඉනිම අර්ධ ශතකය පෙනි පෙනී ලකුණු 44කට නිමා වූයේය. එය මනරම් ඉනිමක් විය.
අනතුරුව අනුෂ්කා සන්ජිවනි ලකුණු 20කටත්, විෂ්මි ගුණරත්න ලකුනු 08කටත් දැවී ගියේය. නොදැවී ලකුණු 26ක් ලබා ගත් හර්ෂිතා සමරවික්රම සහ නොදැවී ලකුණු 09ක් රැස් කළ හසිනි පෙරේරා තරගය පන්දු ඕවර 17ක් තුළ ජයග්රහණයෙන් නිමා කළහ.
තරගයේ මෙන්ම තරගාවලියේ විරයා ද නායිකා චමරී අතපත්තුය.
