අන්තර්ජාතික ක්රිකට් කවුන්සිලයේ (ICC) දූෂණ මර්ධන නීති පද්ධතියේ වගන්ති පහක් උල්ලංඝනය කිරීමේ චෝදනා මත ඇමරිකානු පිතිකරු ආරොන් ජෝන්ස්ට වහාම ක්රියාත්මක වන පරිදි සියලුම ක්රිකට් තරඟ සඳහා තහනමක් පනවා ඇති බව ESPN Cricinfo වෙබ් අඩවිය වාර්තා කරයි.
එම පුවත අනුව මෙම චෝදනාවලට පිළිතුරු ලබා දීම සඳහා ආරොන් ජෝන්ස්ට දින 14 ක කාලයක් ලබා දී තිබේ.
31 හැවිරිදි ජෝන්ස්, 2026 පන්දුවාර 20 ලෝක කුසලානයට පෙර ශ්රී ලංකාවේ පවත්වනු ලබන පුහුණු කඳවුරකට සහභාගී වී සිටි ඇමරිකානු ක්රීඩකයින් 18 දෙනාගෙන් අයෙකි. මෙම තරඟාවලිය සඳහා ඇමරිකානු සංචිතය මෙතෙක් නම් කර නොමැති වුවද, පුහුණු කඳවුරේ සිටින ක්රීඩකයින් අතරින් 15 දෙනෙකු තෝරා ගනු ඇතැයි අපේක්ෂා කෙරිණි.
කෙසේ වෙතත්, මෙම තහනම හේතුවෙන් ජෝන්ස් හට සංචිතයට තේරී පත්වීමේ සුදුසුකම අහිමි වී ඇත.
අයි.සී.සී. පවසන පරිදි, ජෝන්ස්ට එල්ල වී ඇති චෝදනා ප්රධාන වශයෙන්ම බාබඩෝස්හි පැවති 2023-24 ‘Bim10’ තරඟාවලියට සම්බන්ධ ඒවා වේ. මෙය බටහිර ඉන්දීය කොදෙව් ක්රිකට් ආයතනයේ අධිකරණ බල සීමාවට යටත් වන නමුත්, ඔහුට එල්ල වී ඇති චෝදනා දෙකක් ජාත්යන්තර තරඟවලට ද අදාළ වේ.
ජෝන්ස්ට එල්ල වී ඇති චෝදනා:
- කොදෙව් ක්රිකට් ආයතන නීති සංග්රහයේ 2.1.1 වගන්තිය උල්ලංඝනය කිරීම: 2023/24 ‘Bim10’ තරඟාවලියේ තරඟ ප්රතිඵල හෝ ප්රගතිය වෙනස් කිරීමට හෙවත් තරඟ පාවාදීමට උත්සාහ කිරීම හෝ ඊට දායක වීම.
- කොදෙව් ක්රිකට් ආයතනයේ නීති සංග්රහයේ 2.4.2 වගන්තිය උල්ලංඝනය කිරීම: දූෂිත කටයුතුවලට සම්බන්ධ වීමට ලැබුණු ආරාධනා හෝ ප්රවේශයන් පිළිබඳ තොරතුරු කොදෙව් ක්රිකට් ආයතනයට හෙළි කිරීමට අපොහොසත් වීම.
- කොදෙව් ක්රිකට් ආයතනයේ නීති සංග්රහයේ 2.4.4 වගන්තිය උල්ලංඝනය කිරීම: බලයලත් දූෂණ මර්දන නිලධාරියෙකු විසින් සිදු කරනු ලබන විමර්ශනයකට සහයෝගය දැක්වීම ප්රතික්ෂේප කිරීම.
- අයි.සී.සී. (ICC) නීති සංග්රහයේ 2.4.4 වගන්තිය උල්ලංඝනය කිරීම: ජාත්යන්තර මට්ටමින් සිදු වූ දූෂිත ප්රවේශයන් පිළිබඳ තොරතුරු අයි.සී.සී. දූෂණ මර්දන ඒකකයට වාර්තා නොකිරීම.
- ICC නීති සංග්රහයේ 2.4.7 වගන්තිය උල්ලංඝනය කිරීම: සාක්ෂි සැඟවීම හෝ විනාශ කිරීම මගින් දූෂණ මර්දන ඒකකයේ විමර්ශනවලට බාධා කිරීම.
අයි.සී.සී. ප්රකාශය වැඩිදුරටත් සඳහන් කරන්නේ මෙය පුළුල් විමර්ශනයක කොටසක් වන අතර, ඉදිරියේදී තවත් ක්රීඩකයින් පිරිසකට මෙවැනිම චෝදනා එල්ල වීමට ඉඩ ඇති බවය.
2019 වසරේ ජාත්යන්තර වරම් දිනූ ආරොන් ජෝන්ස්, එක්දින තරඟ 52 කට සහ විස්සයි විස්ස තරඟ 48 කට ඇමරිකානු කණ්ඩායම වෙනුවෙන් ක්රීඩා කර ඇත.
2024 පන්දුවාර 20 ලෝක කුසලානයේදී කැනඩාවට එරෙහිව පන්දු 40 කින් ලකුණු 94 ක් සහ පකිස්ථානයට එරෙහිව නොදැවී ලකුණු 36 ක් රැස් කරමින් ඇමරිකානු කණ්ඩායම ලැබූ ඓතිහාසික ජයග්රහණවලට ඔහු විශාල දායකත්වයක් ලබා දුන්නේය.
ඔහු 2025 අප්රේල් මසින් පසු මෙතෙක් කිසිදු ජාත්යන්තර තරඟයකට ක්රීඩා කර නොමැත.
