ටෙස්ට් තරගාවලියේ කුප්ප පරාජයේ වේදනාව නිමා වී ඇත… අපි ක්‍රිකට් වික්‍රමයක් කළෙමු…

අප දිනුම්ය. ලකුණු 49කින් දිනුම්ය. අසලංක ගැසූ තනි ගේම පන්දු යවන්නෝ පුදුමාකාර විදිහේ පවුරක් හදා ඔසවා තැබූහ.

කාසියේ වාසිය දිනා ගෙන මුලින් පන්දුවට පහර දී ශ්‍රී ලංකා කණ්ඩායම ලබා ගන්නේ ලකුණු 214කි. ඉන් ලකුණු 127ක්ම නායක චරිත් අසලංකගේ ය. ශ්‍රී ලංකා ඉනිම අසලංකගේ තනි ගේමක් කියන්නේ ඒ නිසාය. පැතුම් නිශ්ශංක ලකුණු 04කි. අවිශ්ක ප්‍රනාන්දු එක ලකුණකි. කුසල් මෙන්ඩිස් ලකුණු 19කි. කමිඳු මෙන්ඩිස් ලකුණු 5කි. ජනිත් ලියනගේ ලකුණු 11කි. අසලංක සමග එක්වී යම් සම්බන්ධතාවක් ගොඩනැගුවේ දුනිල් වෙල්ලාලගේ පමණි. දුනිත් පන්දු 34ක දී ලකුණු 30කි. වනිඳු හසරංග ලකුණු 7ක්, ද මහීෂ් තීක්ෂණ ලකුණු 2ක් ද, අසිත ප්‍රනාන්දු ලකුණු නොලබාද දැවී යන්නේය.

මේ විදිහට එක් අන්තයක වැල යද්දී කඩුල්ලේ රැඳී සිටිමින් චරිත් අසලංක ගැසූ හුදකලා ගේම තුළ මෑත කාලයේ අපේ ක්‍රිකට්වල අපි නොදුටු විචිත්‍රත්වය දුටුවෙමු. ඒක නම් පට්ට ය. චරිත් ලකුණු 127 ලබන්නේ පන්දු 126ක් තුළය. ඒ ඔහු සිය එක්දින ක්‍රීඩා දිවියේ රැස්කළ වැඩිම ලකුණය. සිය 4වැනි එක්දින ශතකය ය. ඒ සඳහා ඔහු හතරේ පහර 14ක් සහ හයේ පහර 05ක් එල්ල කර තිබිණි. ඔහු දැවී යන්නේ 09 වැනි කඩුල්ල ලෙසය. 8වන කඩුල්ල ලෙස මහීෂ් තීක්ෂණ දවී යන්නේ මුළු ලකුණු 135 දී ය. ඒ 33වැනි පන්දු ඕවරයේ 2වැනි පන්දුවේ දී ය. එතැන් සිට එෂාන් මාලිංග සමග චරිත් ලකුණු 79ක සම්බන්ධතාවයක් ගොඩනගන්නේය. ඒ සම්බන්ධතාවය තුළ එෂාන් මාලිංග ලබන්නේ එක් ලකුණක් පමණි. ඔහු ශ්‍රී ලංකා කණ්ඩායම ලකුණු 214කට ඔසවා තබා පිටියෙන් ඉවත් වන්නේ 46 වැනි ඕවරයේ 3 වැනි පන්දුවේ දී ය. එම ඕවරයේ අවසන් පන්දුවේ දී අසිත ප්‍රනාන්දු ලකුණු නොලබා දැවී යෑමත් සමග ශ්‍රී ලංකා ඉනිම ලකුණු 214ටම නිමා වන්නේය.

දැන් මැච් එක බැලුව අපට ඇති එකම ත්‍රිල් එක හසරංග ලබා ගන්නා ලකුණු 127 පමණි. මේ මැච් එක ගහන්න පුලුවන් එක්ක නොවන බව නරඹන්නන් ඉන්නේ පූර්ව නිගමනයකය. ටෙස්ට් තරගාවලියේ අත්දැකීම් තවමත් අප තුළ හොල්මන් කරමින් තිබෙන බැවිනි. ශ්‍රී ලංකා කණ්ඩායම පන්දු ඕවර 50ම ක්‍රීඩා කරන්නේත් නැත. 46 වැනි ඕවරයේ දී සියල්ලන්ම දැවී යන්නේය. ඔස්ට්‍රේලියානු කණ්ඩායම සමග එක්දින තරගයක දී තරගයක් දෙන්නට අපට පුරුදු ක්‍රිකට්වල විදිහට නම් ලකුණු 214ක් ලොවෙත් මදිය.

පන්දු යැවීමේ දී සේන් ඇබොට් ලකුණු 61ට කඩුළු 03ක්, ස්පෙන්සර් ජොන්සන් ලකුණු 44ට කඩුළු 2ක්, ආරොන් හාඩි ලකුණු 13කට කඩුලු 2ක්, නේතන් එලිස් ලකුණු 32ට කඩුළු 2ක්, මැතිව් ෂොර්ට් ලකුණු 39කට කඩුල්ලක් ලැබුවේය.

එහෙත් අද අපේ ක්‍රිකට් වෙනස් වුනේය. ආරම්භක පන්දු යැවූ අසිත ප්‍රනාන්දු මුල්ම පන්දු ඕවරයෙන් කඩුළු දඩයම ඇරඹුවේය. ආරම්භක පිතිකරු මැතිව් ෂොර්ට් දෙවැනි පන්දුවේ දී හසිත ප්‍රනාන්දුට ගොදුරු වන්නේය.

අංක 2 පිතිකරු ජේක් ෆ්‍රෙසර් මැක්ගාර්ක් ලකුණු 2කි. කූපර් කොනොලි ලකුණු 03කි. නායක ස්ටීවන් ස්මිත් වෙල්ලාලගේ හමුවේ කඩුල්ල කුඩු කරගත්තේය. ඔහු ලැබූ ලකුණු ප්‍රමාණය ලකුණු 12කි. මානස් ලබුස්චාන් ලකුණු 15කට සීමා විය.

ඔස්ට්‍රේලියානු ඉනිමේ වැඩිම ලකුණු ලාභියා කඩුළු රකින ක්‍රීඩක ඇලෙක්ස් කෙරීය. කෙරී පන්දු 38ක දී හතරේ පහර 5ක් සහ එක් හයේ පහරක් සමග ලකුණු 41කි. ආරොන් හාඩි ලකුණු 32ක් ද, සේන් ඇබොට් ලකුණු 20ක් ද ලැබුවේය. ඇඩම් සම්පා ලකුණු 20කි. ඔස්ට්‍රේලියානු කණ්ඩායම ලකුණු 165කට දැවී යන්නේ ය. ඒ ලකුණු 165 තුළ ලකුණු 20ක් අතිරේක ලකුණුය. වයිඩ් 15ක් ඒ අතරය.

එහෙත් පන්දු යැවීම නම් විශිෂ්ඨය. ලකුණු 214ක් වැනි ලකුණක් ඔස්ට්‍රේලියානු කණ්ඩායමට එරෙහිව ආවරණය කරගැනීම පන්දු යැවීම මෙන්ම පන්දු රැකීමේ ද වික්‍රමයකි. එම වික්‍රමය අද අපි ආර් ප්‍රේමදාස පිටියේ දී දුටුවෙමු.

විශිෂ්ඨම පන්දු යැවීම වාර්තාකළ මහීෂ් තීක්ෂණ ලකුණු 40කට කඩුළු 04ක් දවා ගත්තේය. අසිත ප්‍රනාන්දු ලකුණු 23ට කඩුළු 2ක්, දුනිත් වෙල්ලාලගේ ලකුණු 33ට කඩුළු 2ක්, වනිඳු හසරංග ලකුණු 46ට කඩුල්ලක් සහ චරිත් අසලංක ලකුණු 5ට කඩුල්ලක් ලබා ගත්තේය.

පන්දු ඕවර 33.5ක් තුළ ඔස්ට්‍රේලියානු කණ්ඩායම ලකුණු 165කට දැවී ගියේය.

අප තවමත් ඒ වික්‍රමයේ චමත්කාරය විඳිමිනි. තරගයේ වීරයා චරිත් අසලංකය. එය වීරයෙක් ලැබිය යුතු සම්මානයක් බව සහතිකය.