2023 ලෝක කුසලාන ක්රිකට් තරගාවලියේ අද පැවති පාකිස්තානය නෙදර්ලන්ත තරගය නිමා වී ඇත්තේ පකිස්ථානය ලකුණු 81ක පහසු සහ විශිෂ්ට ජයග්රහණයක් අත් කරගනිමිනි.
හයිද්රාබාද් හී දිවා රාත්රී තරගයක් ලෙස පැවති තරගයේ කාසියේ වාසිය දිනුවේ නෙදර්ලන්ත කණ්ඩායමය. සිදුවිය යුතු ලෙසම ඔවුහු පන්දු රැකීම තේරූහ. මුලින්ම පන්දුවට පහර දුන් පකිස්ථානයට තරගය පහසු එකක් වූයේ නැත. ඔවුන් ඕවර 50 අවසානයේ දි ලබා ගත්තේ ලකුණු 286කි. එම ලකුණ ඉන්දියානු ක්රිඩාංගනවල සාපේක්ෂව මධ්යස්ථ ලකුණු ප්රමාණයක් විනා හොඳ ලකුණක් නොවේ.
පකිස්ථාන මුල් පෙළ ක්රීඩකයන්වන ෆඛාර් සමාන් ලකුණු 12කි. ඉමාම් උල් හක් ලකුණු 15කි. නායක බබාර් අසාම් ලකුණු 05කි.
ලකුණු 38ක් වනවිට පකිස්ථාන කඩුළු 03ක් දැවී ගොස්ය. එහෙත් කඩුළු රකින ක්රීඩක මොහොමඩ් රිස්වාන් ලකුණු 68ක්, සවුද් ශකීල් ලකුණු 68ක් සහිතව සිව්වන කඩුල්ල වෙනුවෙන් වර්ණවත් සම්බන්ධතාවයක් ගොඩනැගූහ. සම්බන්ධතාවය ලකුණු 120කි. මොහොමඩ් නවාස් ලකුණු 39ක්, ශඩාබ් ඛාන් ලකුණු 32ක්, ලබා ගත්හ. හොඳම පන්දු යැවීම බස් ඩි ලීඩේ ගෙනි. ඔහු ලකුණු 62ට කඩුලු 04ක් බිඳ හෙළුවේය.
එහෙත් පිළිතුරු ඉනිම ක්රීඩා කිරමින් ලකුණු 287ක ජයග්රාහී ඉලක්කයක් හඹා යෑමට පැමිණි නෙදර්ලන්ත කණ්ඩායම ලකුණු 205කට දැවී ගියේය. ආරම්භක පිතිකරු වික්රම්ජිත් සිං ලකුණු 52ක්, පන්දු යවා කඩුළු 04ක් දවා ගත් නෙදර්ලන්ත කණ්ඩායමේ බලාපොරොත්තු සහගත තුන් ඉරියව් ක්රීඩක බස් ඩි ලීඩේ වැඩිම ලකුණු සංඛ්යාවත් වාර්තා කරමින් පන්දු 68කට ලකුණු 67ක් ලැබුවේය. ලොන්ගන් වැන් බීක් ලකුණු 28ක් නොදැවී ලැබීය. නෙදර්ලන්ත කණ්ඩායම ලකුණු 205කට සියල්ලෝ දැවී ගියහ. ඒ පන්දු ඕවර 41ක් තුළය.
පන්දු යැවීමේ දී හරිස් රවුෆ් ලකුණු 43ට කඩුළු 03ක් ලැබුවේය.
