තවත් විශිෂ්ට තරගයක් නිමා වූයේය. එය ලෝක කුසලාන තරගාවලිය වර්ණවත් කළ තරගයකි. ඔස්ට්රේලියාව සහ නවසීන්තය අතර පැවති තරගයෙන් ඔස්ට්රේලියාව නවසීලන්තය පරදවා තියුණු ලකුණු 05ක ජයග්රහණයක් අත් කරගත්තේය.
එය වාර්තාගත හඹා යෑමක් සනිටුහන් කළ තරගයකි. මේ තරගය නවසීලන්තය දිනුවා නම් ලෝක කුසලාන ඉතිහාසයේ වැඩිම ලකුනු සංඛ්යාවක් හඹා විත් පරාජයට පත් කළ රට ලෙස පකිස්ථානය අපව පරදා තැබූ වාර්තාව බිඳෙන්නේය. ඒත් නවසීලන්තය පරාදය. 388ක ජයග්රාහී ඉලක්කයක් හඹා ගිය නවසීලන්ත කණ්ඩායම ඕවර 50 අවසානයේ දී ලකුනු 383කට සීමා වුනේය. කඩුළු 09ක් දැවී ගියේය.
එය ගිනි පිටවුන තරගයකි. ධර්මශාලා පිටියේ දිවා ගරතයක් ලෙස පැවති තරගයේ කාසියේ වාසිය දිනුවේ නවසීලන්තය ය. අද නවසිලන්ත කන්ඩායම මෙහෙයවූයේ ටොම් ලැතම්ය. නිත්ය නායක කේන් විලියම්සන් හිටියේ බංකුවේය. ඔහු ක්රීඩකයන්ට අවශ්ය වතුර, අඩුපාඩු ක්රීඩා භාණ්ඩ රැගෙන විටින් විට ක්රීඩා පිටිය මැදට දිව එනු දක්නට ලැබුනේය.
නායක ටොම් ලැතම් පන්දු රැකීම තේරුවේය. ඒ තේරීම ප්රශ්න කරන්නාක් සේ ඔස්ට්රේලියාව දැවැන්ත ප්රහාරයක් දියත් කළේය.
ඔස්ට්රේලියානු ඉනිමේ මුල්ම කඩුල්ල බිඳ වැටෙන්නේ ලකුණු 175 දීය. ආරම්භක පිතිකාර යුගල වූ ට්රෙවිස් හාර්ඩ් සහ මිචෙල් මාර්ෂ් එල්ල කළ ප්රහාරය නවසීලන්ත කණ්ඩායම විසින් බලාපොරොත්තු නොවූ එක්ක බව පැහැදිලි විය. මුල් කඩුල්ල ලෙස ඩේවිඩ් වෝනර් දැවි යන විට ඔහු ලකුණු 81ක් ලබා සිටියේ පන්දු 65කට පමණක් මුහුණ දෙමිනි. ඊට හතරේ පහර පහක් සහ හයේ පහර හයක් ඇතුළත් විය. මුල්ම කඩුල්ල දවා ගන්නේ නවසීලන්ත දකුණත් ඔෆ් බ්රේක් පන්දු යවන ග්ලෙන් පිලිප්ස්ය. ඒ වනවිට යවා තිබුනේ තරගයේ පන්දු ඕවර 19.1ක් පමණි.
අනෙක් පසින් පිතිකරණය ආරම්භ කළ ට්රෙවිස් හෙඩ් පන්දු 67ක දී ලකුනු 109ක් වාර්තා කර සිටිය දී ග්ලෙන් පිලිප්ස්ටම ගොදුරු වූයේ කෙලින්ම පන්දුව කඩුල්ලේ දැවටීමෙනි. ට්රෙවිස් නවසීලන්ත පන්දු යවන්නට පන්දු යැවීම එපා කළේය. ඔහු ලකුණු 109ට හතරේ පහර 10ක් සහ හයේ පහර 7ක් එල්ල කළේය. ට්රෙවිස් ලකුණු 82ක් ලබාගෙන තිබුණේ හයේ සහ හතරේ පහර වලිනි. ලකුණු 200 ක් ලකුණු පුවරුවේ සටහන්ව තිබිය දී ට්රෙවිස් දැවී යන්නේ පන්දු ඕවර 23.2 දී ය.
ආරම්භයේ දී තැබූ ස්ථානය ශක්තිමත්ව ස්ථාවර කරමින් ග්ලෙන් මැක්ස්වෙල් පන්දු 24ක දී වේගවත් ලකුණු 41ක් ලැබුවේය. ඒ හතරේ පහර 5ක් සහ හයේ පහර 02ක් සමගිනි. කඩුළු රකින ක්රීඩක ජොෂ් ඉන්ග්ලිස් පන්දු 28ක දි ලකුණු 38ක් ලැබුවේය. තරගය ප්රවේගවත් කළේ නායක පැට් කුමින්ස්ය. කුමින්ස් පන්දු 14ක් තුළ ලකුණු 38ක් ලැබුවේ හයේ පහර 04ක් සහ හතරේ පහර 2ක් සමගිනි. මිෂෙල් මාර්ෂ් පන්දු 51ක දී ලකුණු 36ක් ලැබුවේය. පන්දු ඕවර 49.2ක් තුළ දැවී ගිය ඔස්ට්රේලියානු කණ්ඩායම ලකුණු 388ක් ලබා ගත්තේය.
පන්දු යැවීමේ දී ග්ලෙන් පිලිප්ස් ලකුණු 37ට කඩුළු 03ක්, ට්රෙන්ට් බෝල්ට් ලකුණු 77ට කඩුළු 03ක් ලැබුහ.
මිෂෙල් සැන්ට්නර් ප්රහාරයට ලක් විය. ඔහු ලකුණු 80ක් ලබා දුන්නත් කඩුළු 02ක් දවා ගත්තේය. මැට් හෙන්රි සහ ජේම්ස් නීෂම් කඩුල්ල බැගින් ලැබූහ.
නවසීලන්ත ඉනිම.
හඹා යෑම සඳහා පිටියට පැමිණි නවසීලන්ත කණ්ඩායමේ මුල් කඩුල්ල පන්දු ඕවර 7.2ක දී ලකුණු 61කට දැවී යන්නේය. ඒ පන්දු 17ක දී ලකුණු 28ක් ලබා ගන්නා ඩෙවොන් කොන්වේ ය. කොන්වේ ලකුණු 28න් 24ක් ලබා ගන්නේ හතරේ පහර වලිනි. ලකුණු 72 වනවිට විල් යන්ග් ද දැවි ගියේය. ඒ පන්දු ඕවර 9.4ක දීය.
ඉන් අනතුරුව තරගය මුලුමනින්ම වෙනස් උනුසුම් තැනක් කරා රැගෙන එන්නේ නවසීලන්තයේ බලාපොරොත්තු සහගත යෞවනයා වූ රචින් රවීන්ද්ර ය. ඔහු සහ ඩේරි මිෂෙල් අතර සම්බන්ධතාවය ලකුණු 96කි. පන්දු ඕවර 23 වැනි පන්දු වාරයේ අවසන් පන්දුවේ ඔහු දැවි යන විට ලකුණු සංඛ්යාව කඩුළු 03කට 168කි.
එක් අන්තයක රචින් රවීන්ද්ර රැඳී සිටිමින් මනරම් ලකුණු 116ක් රැස් කරන්නේ හතරේ පහර 09ක් සහ හයේ පහර 05ක් සමගිනි. තරගය අවසන් උණුසුම් මෙහොත නිර්මාණය වන්නේ ඔස්ට්රේලියානු කණ්ඩායම සහ ජේම්ස් නීෂම් අතරය. නීෂම් ලකුණු 58ක් ලබා සිටිය දී දැවී යන්නේ නවසීලන්ත කණ්ඩායම ලකුණු 383ක් ලබා සිටිය දී ය. ඔහු දුවද්දී දැවී යෑමට ලක් නොවන්නට තරගයේ ප්රතිඵලය මීට වඩා වෙනස් වන්නට ඉඩ තිබිණි. නමුත් ඕස්ට්රේලියානුවන්ගේ තියුණු පන්දු රැකීම හමුවේ නීෂම් දුවද්දී දැවී යෑමට හසු විය.
අවසන් පන්දුවේ දී ජයග්රහණය සදහා නවසීලන්තයට ලකුණු 06ක් ලබා ගත යුතු විය. නමුත් අවසන් පන්දුව ලකුණු නොදී නවත්වා ගන්නට මිෂෙල් ස්ටාක් සමත් විය.
පන්දු යැවීමේ දී ඇඩම් සම්සා ලකුණු 74ට කඩුළු 03ක්, ජොස් හෙසල්වුඩ් ලකුණු 70ට කඩුලු 02ක්, පැට් කුමින්ස් ලකුණු 66ට කඩුළු 02ක්, ග්ලෙන් මැක්ස්වෙල් ලකුණු 62ට කඩුල්ලක් ලබා ගත්තේය.
තරගයේ වීරයා ඔස්ට්රේලියානු පිතිකරු ට්රෙවිස් හෙඩ් ය. මේ තරගය දිනුවත් තවමත් ප්රසාද ලකුණු සටහනේ උඩින් ඉන්නේ නවසීලන්ත කණ්ඩායමය. ඔස්ට්රේලියාව ඉන්නේ සිවුවන තැනය.
