සදෙව් රත්නායක –
ශ්රී ලංකා ක්රිකට් ආයතනය විසින් ආරම්භ කිරීමට බලාපොරොත්තුවන ශ්රී ලංකා ප්රිමියර් ලීග් ( එල්.පී.එල්.) තරගාවලියේ සියළු මෙහෙයුම් කටයුතු ඩුබායි හි ක්රියාත්මක වන ඉන්දීය සමාගමක් වන අයි.පී.ජී. ක්රීඩා ප්රවර්ධන සමාගමට පවරා තිබේ.
අමෙරිකානු ඩොලර් මිලියන 2ක වාර්ෂික මුදලකට වසර 5ක කාලයක් සඳහා එල්.පී.එල්. තරගාවලිය එම සමාගමට පැවැරීමේ ගිවිසුම්ප්රකාරව ක්රිකට් ආයතනය විසින් සිදු කරනු ලබන්නේ ක්රීඩාංගණ හා විනිසුරුවන් මෙහෙයවීමේ කටයුතු පමණි. තරගාවලියේ රූපාවාහිනි විකාශන අයිතිය, ක්රීඩකයන් තේරීම, කණ්ඩායම් අයිතිය, ඇතුළු සියලු වානිජ කටයුතු අයි.පී.ජී. සමාගමට පැවරී තිබේ.
එල්.පී.එල්. තරගාවලියට ක්රීඩකයන් 223කගෙන් සමන්විත ලැයිස්තුවක් සකස් වී තිබේ. තරගාවලියට ක්රීඩා කිරීමට කැමැත්ත ප්රකාශ කර ඇති විදෙස් ක්රීඩකයන් 93ක් සහ ක්රිකට් ආයතනය විසින් සංචිත ගත කරනු ලැබූ දේශීය ක්රීඩකයන් 130ක් ඒ අතර වෙති.
කණ්ඩායම් 5ක් තරග වදින එල්.පී.එල්. තරගාවලියට විදෙස් ක්රීඩකයන් 30 දෙනකු සමග දේශීය ක්රීඩකයන් 45ක් තෝරා ගැනීමට නියමිත වන්නේ එම ලැයිස්තුව අතරිනි. කොළඹ, ගාල්ල, දඹුල්ල, මහනුවර සහ යාපනය කණ්ඩායම් නියෝජනය කරමින් එක් කණ්ඩායමකට විදෙස් ක්රීඩකයන් 6 දෙනකු බැගින් එක්වන අතර දේශීය ක්රීඩකයන් 70ක් තෝරා ගැනෙන්නේ එක් කණ්ඩායමකට 14 දෙනකු බැගින් ය. ඊට යොවුන් ක්රීඩකයකු ද ඇතුළත් වනු ඇත.
එහෙත්, මේ මස 28 වැනිදා ආරම්භ කිරීමට නියමිත එල්.පී.එල්. තරගාවලිය සඳහා ක්රීඩා අමාත්යාංශයේ අනුමැතිය හිමිවූව ද, සෞඛ්ය අමාත්යාංශයේ අනුමැතිය මෙතෙක් ලැබී නොමැත. මේ පිළිබඳ පැවැති සාකච්ඡාවකින් පසු තරගාවලිය පැවැත්වීමේ හැකියාව සොයා බැලීමට ක්රිකට් ආයතනය, ක්රීඩා අමාත්යාංශය සහ සෞඛ්ය අමාත්යාංශය නියෝජනය වන පරිදි කමිටුවක් පත් කර ඇත. එහි වාර්තාව දින 7ක් ඇතුළත සෞඛ්ය අමාත්යාංශයට ඉදිරිපත් කළ යුතු බවත්, අනතුරුව රජයේ අනුමැතිය ලබාගැනිමට කටයුතු කෙරෙනු ඇති බවත් වාර්තා වෙයි.
කොවිඩ් සෞඛ්ය නීතිරීති අනුව විදෙස් රටවලින් පැමිණෙන සංචාරකයන් දින 14 කාලයක් නිරෝධායනය විය යුතු බැවින් තරගාවලියට සහභාගි වන විදෙස් ක්රීඩකයන් මේ මස 12 හෝ ඊට පෙර ශ්රී ලංකාවට පැමිණිය යුතුව තිබේ.
