අසේල කුරුළුවංශ –
වෛද්යවරයෙකුගේ නිල මුද්රාව සහ අත්සන ව්යාජ ලෙස යොදාගනිමින් අසනීප නිවාඩු ලබාගැනීම සඳහා ව්යාජ වෛද්ය සහතික ඉදිරිපත් කළ ශ්රී ලංකා ගමනාගමන මණ්ඩලයේ (ලංගම) මහනුවර ප්රාදේශීය බලප්රදේශයට අයත් ඩිපෝවල රියදුරන්, කොන්දොස්තරවරුන් සහ කාර්මික සේවකයින් පිරිසක් සම්බන්ධයෙන් විශේෂ විමර්ශනයක් ආරම්භ කර තිබේ.
මොවුන් නිවාඩු ලබාගැනීම සඳහා ඉදිරිපත් කළ වෛද්ය සහතික පිළිබඳව ඇති වූ සැකයක් මත, තෙල්දෙණිය ඩිපෝ කළමනාකාරවරයා ඒ පිළිබඳව තහවුරු කරගැනීම සඳහා මහනුවර ජාතික රෝහලේ අධ්යක්ෂවරිය වෙත ලිපියක් යොමු කර ඇත. ඒ අනුව සිදුකළ සොයාබැලීම්වලදී මෙම මහා පරිමාණ වංචාව අනාවරණය වී තිබේ.
අදාළ වෛද්ය සහතිකයේ නම සඳහන් විශේෂඥ වෛද්යවරයා මහනුවර ජාතික රෝහලේ සේවය කරන නමුත්, එහි ඇති අත්සන සහ නිල මුද්රාව එම වෛද්යවරයාගේ නොවන බව අධ්යක්ෂවරිය විසින් ඩිපෝ කළමනාකාරවරයා වෙත ලිඛිතව දැනුම් දී ඇත.
එමෙන්ම, ඉදිරිපත් කර ඇති වෛද්ය සහතික අතර මහනුවර ජාතික රෝහලේ බාහිර රෝගී අංශයේ (OPD) සේවය කරන බව ඇඟවෙන වෛද්ය නිලධාරීන් දෙදෙනෙකුගේ නමින් නිකුත් කළ සහතික ද පවතී. එහෙත් එම නම්වලින් යුත් කිසිදු වෛද්යවරයෙකු රෝහලේ සේවය නොකරන බව විෂයභාර නිලධාරීන් විසින් තහවුරු කරගත් බව ද රෝහල් අධ්යක්ෂවරියගේ ලිපියේ සඳහන් වේ.
තෙල්දෙණිය ඩිපෝවට අමතරව මහනුවර දකුණ ඩිපෝව ඇතුළු තවත් ඩිපෝ කිහිපයකින්ම මෙලෙස ව්යාජ වෛද්ය සහතික ඉදිරිපත් කර ඇති බවත්, ඒ පිළිබඳව ලංකා ගමනාගමන මණ්ඩලය මගින් පුළුල් විමර්ශනයක් ක්රියාත්මක කර ඇති බවත් ලංගම මහනුවර ප්රාදේශීය කළමනාකාර ප්රසන්න දෙල්අංග ප්රකාශ කළේය.
මේ වන විට මෙම වංචාව සම්බන්ධයෙන් තෙල්දෙණිය පොලිසියේ විශේෂ අපරාධ විමර්ශන ඒකකය වෙත ද නිල වශයෙන් පැමිණිල්ලක් ඉදිරිපත් කර තිබේ.
වත්මන් රියදුරු සහ කොන්දොස්තර හිඟය හේතුවෙන් විශේෂ අවසරයකින් තොරව නිවාඩු ලබා නොදීමට ලංගම කළමනාකාරීත්වය මීට පෙර තීරණය කර තිබුණි. එසේ තිබියදී, සේවකයින් පිරිසක් ව්යාජ වෛද්ය සහතික ඉදිරිපත් කර මෙලෙස අසනීප නිවාඩු ලබාගැනීම හේතුවෙන් මහනුවර ප්රාදේශිකයේ ඩිපෝ 07 කට අයත් බස් රථ 25 ත් 30 ත් අතර ප්රමාණයක් දෛනිකව ධාවනයෙන් ඉවත් කර තැබීමට සිදුව ඇති බව ද ප්රසන්න දෙල්අංග වැඩිදුරටත් සඳහන් කළේය.
