දූෂණ චෝදනාවලට වරදකරු වී බරපතළ වැඩසහිත වසර 16ක සිරදඬුවම් සහ දඩ නියම වූ හිටපු නියෝජ්ය අමාත්ය සරණ ගුණවර්ධන, එම දඬුවම්වලින් තමන්ව නිදොස් කොට නිදහස් කරන ලෙස ඉල්ලා අභියාචනාධිකරණය වෙත ඇපැල් පෙත්සම් හතරක් ඉදිරිපත් කර තිබේ.
නීතිඥ රන්ජන් ද සිල්වා මාර්ගයෙන් ගොනුකර ඇති මෙම අභියාචනා පෙත්සම්, අභියාචනාධිකරණය වෙත යොමු කිරීම සඳහා කොළඹ මහාධිකරණය වෙත භාරදී ඇතැයි අධිකරණ වාර්තාකරුවන් සඳහන් කරයි.
2006 වසරේ සංවර්ධන ලොතරැයි මණ්ඩලයේ සභාපතිවරයා වශයෙන් කටයුතු කරමින් සිටියදී, එම ආයතනයට කුලී පදනම මත වාහන ලබා ගැනීමේදී නියමිත ප්රසම්පාදන ක්රියාවලිය අනුගමනය නොකර රජයට පාඩු සිදුකළ බවට චෝදනා කරමින් අල්ලස් කොමිසම විසින් සරණ ගුණවර්ධනට විරුද්ධව කොළඹ මහාධිකරණය හමුවේ නඩු හතරක් ගොනුකර තිබුණි.
එම නඩු විභාග කිරීමෙන් අනතුරුව විත්තිකාර සරණ ගුණවර්ධන අදාළ චෝදනාවලට වරදකරු කෙරුණු අතර, ඔහුට එක් නඩුවකට බරපතළ වැඩසහිත වසර හතර බැගින් නඩු හතරටම වසර 16ක සිරදඬුවම් නියම කෙරුණි.
එම සිරදඬුවමට අමතරව මහාධිකරණ විනිසුරුවරයා විසින් විත්තිකරුට රුපියල් ලක්ෂ 18ක දඩයක් ද නියම කරනු ලැබීය.
තමන්ට නියම වූ මෙම සිරදඬුවමෙන් සහ දඩ මුදල්වලින් තමන්ව නිදොස් කොට නිදහස් කරන ලෙස ඉල්ලා සරණ ගුණවර්ධන විසින් අභියාචනාධිකරණය වෙත මෙම ඇපැල් පෙත්සම් ඉදිරිපත් කර ඇත.
