බළපිටිය – ජයකාන්ත ලියනගේ
දකුණේ පාතාල කල්ලි නායක සමන් කොල්ලාගේ මත්කුඩු ජාවාරම මෙහෙයවූ බව කියන 15 හැවිරිදි පාසල් සිසුවා 2026 ජුනි 30 වන දින දක්වා පරිවාස බාරයට පත් කිරීමට බළපිටිය මහේස්ත්රාත් පවිත්රා සංජීවනී පතිරණ ඊයේ (16) නියෝග කළාය.
සැකකරු සන්තකයේ තිබී අත්අඩංගුවට ගන්නා ලද මත්දව්ය තොගය රජයේ රස පරීක්ෂකවරයා වෙත යැවීමටත්, රස පරීක්ෂක වාර්තාව ලැබෙන තෙක් සැකකරු උසාවියට නොකැඳවා ස්කයිප් තාක්ෂණය ඔස්සේ නඩුව විභාගයට ගැනීමටත් මහේස්ත්රාත්වරිය වැඩිදුරටත් නියෝග කළාය.
සැකකරු හා මත්දව්ය අයත් බව කියන පාතාල නායකයා සම්බන්ධයෙන් සහ සැකකරුට මත්දව්ය ලැබෙන ක්රමය සම්බන්ධයෙන් තවදුරටත් විමර්ශනය කර ප්රගති වාර්තාවක් මගින් අධිකරණයට ඉදිරිපත් කරන ලෙස ද මහේස්ත්රාත්වරිය අම්බලන්ගොඩ පොලීසියට දැනුම් දුන්නාය. මෙසේ පරිවාස බාරයට පත්කරන ලද්දේ අම්බලන්ගොඩ, මාදම්පේ පදිංචි 15 හැවිරිදි පාසල් සිසුවෙකි. සැකකාර පාසල් සිසුවා අම්බලන්ගොඩ අධ්යාපන කලාපයට අයත් පාසලක 10 වන ශ්රේණියේ අධ්යාපනය ලබන අයෙකු බව ද අම්බලන්ගොඩ පොලීසිය කියයි.
සැකකාර සිසුවා පෙරේදා (15) රාත්රියේ මාදම්පේ, සුදුවැල්ල ප්රදේශයේදී අම්බලන්ගොඩ පොලීසියේ නිලධාරීන් පිරිසක් විසින් අත්අඩංගුවට ගෙන තිබේ. ඔහු සන්තකයේ තිබී රුපියල් ලක්ෂ පහක (05) පමණ වටිනාකමකින් යුත් හෙරොයින් තොගයක් ද පොලිස් භාරයට ගෙන ඇත. අම්බලන්ගොඩ පොලීසියේ අපරාධ අංශයේ ස්ථානාධිපති පොලිස් පරීක්ෂක ප්රභාත් ගුණරත්න වෙත පෞද්ගලික ඔත්තුකරුවෙකුගෙන් ලැබුණු තොරතුරකට අනුව මෙම වැටලීම සිදුකර තිබේ.
සැකකාර පාසල් සිසුවා දකුණේ පාතාල නායක අම්බලන්ගොඩ, මාදම්පාගම පදිංචි අගම්පොඩි සජිත් සමන් ප්රියන්ත (30) නොහොත් ‘සමන් කොල්ලා’ නමැති අපරාධකරුගේ මත්දව්ය ජාවාරම්කරුවෙකු බව පොලිස් පරීක්ෂණවලදී තහවුරු වී ඇත. මෙම සිසුවා සමන් කොල්ලා නමැති අපරාධකරුගෙන් මත්දව්ය පැකට් ලබාගෙන, ඔහු ලබාදෙන තොරතුරු ඔස්සේ විවිධ මාර්ග අසල සඟවා අලෙවි කර තිබෙන බව ද පොලීසිය අනාවරණය කරගෙන තිබේ.
සිසුවාගේ ජංගම දුරකථනය පරීක්ෂා කිරීමේදී සමන් කොල්ලා සමඟ කළ සංවාද සහ මත්දව්ය පැකට් සැඟවූ ස්ථාන රැසක ගමන් මාර්ග (Locations) නිරීක්ෂණය වූ බව අම්බලන්ගොඩ පොලීසියේ ප්රකාශකයෙක් සඳහන් කළේය. දුරකථනයට ලැබෙන උපදෙස් සහ ගමන් මාර්ග ඔස්සේ සිසුවා මෙම ජාවාරම මෙහෙයවා ඇත.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
අම්බලන්ගොඩ පොලීසියේ අපරාධ අංශයේ ස්ථානාධිපති පොලිස් පරීක්ෂක ප්රභාත් ගුණරත්න ඇතුළු නිලධාරීන් කණ්ඩායමක් විසින් සැකකරු අත්අඩංගුවට ගෙන ඇති අතර, පොලිස් සැරයන් අමරසිරි (3164) සැකකාර සිසුවා අධිකරණයට ඉදිරිපත් කරමින් නඩු කටයුතු මෙහෙයවීය.
