රුසියානු සමූහාණ්ඩුවේ සෞඛ්ය අමාත්ය මිහායිල් මුරාෂ්කෝ (Mikhail Murashko) ඇතුළු නියෝජිත පිරිසක් තෙදින නිල සංචාරයක් සඳහා හෙට (මැයි 03) ශ්රී ලංකාවට පැමිණීමට නියමිතය.
දෙරට අතර සෞඛ්ය ක්ෂේත්රයේ සහයෝගීතාව තවදුරටත් ශක්තිමත් කිරීම අරමුණු කරගත් මෙම සංචාරය මැයි 05 වැනිදා දක්වා පැවැත්වෙන බව සෞඛ්ය අමාත්යාංශය නිවේදනය කරයි.
මෙම සංචාරය අතරතුර රුසියානු දූත පිරිස ශ්රී ලංකා සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස සමග විශේෂ සාකච්ඡා පැවැත්වීමට නියමිතය. එහිදී දෙරට අතර සෞඛ්ය සබඳතා වර්ධනය කිරීම පිළිබඳව අවධානය යොමු කෙරෙන අතර, විදේශ කටයුතු, විදේශ රැකියා සහ සංචාරක අමාත්ය විජිත හේරත් සමග ද රුසියානු අමාත්යවරයා සාකච්ඡා පවත්වනු ඇත.
මැයි 04 වැනිදා රුසියානු දූත පිරිස කොළඹ ජාතික රෝහලේ සහ කොළඹ විශ්වවිද්යාලයේ වෛද්ය පීඨයේ නිරීක්ෂණ චාරිකාවක නිරත වීමට නියමිත අතර දෙරටේ සෞඛ්ය අමාත්යාංශ අතර නව අවබෝධතා ගිවිසුම් (MoUs) කිහිපයකට එළඹීමට ද අපේක්ෂිතය.
ඖෂධ හා වෛද්ය උපකරණ ලබා ගැනීම, වෛද්ය විශේෂඥයින් පුහුණු කිරීම, අධ්යයන සහයෝගීතාව, ආයුර්වේද වෛද්ය ක්ෂේත්රය සහ සංචාරක සෞඛ්ය සේවා වැනි ක්ෂේත්ර පිළිබඳව මෙහිදී වැඩිදුරටත් අදහස් හුවමාරු කර ගැනීමට නියමිතය. මෙම සංචාරය නිම කරමින් රුසියානු නියෝජිත පිරිස මැයි 05 වැනිදා දිවයිනෙන් පිටත්ව යාමට නියමිතව තිබේ.
