සංවිධානාත්මක අපරාධකරුවකු වන නදුන් චින්තක හෙවත් ‘හරක් කටා’ නමැත්තා රැඳවුම් නියෝග වෙනුවට රක්ෂිත බන්ධනාගාරගත කිරීම සඳහා රුපියල් කෝටි 12ක අල්ලස් මුදලක් ලබාගත් බව කියන චෝදනාවට අදාළව අල්ලස් හෝ දූෂණ විමර්ශන කොමිෂන් සභාව විසින් අත්අඩංගුවට ගත් සැකකරුවන් තිදෙනා ලබන ජූලි මස 03 වැනිදා දක්වා රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් අධිකරණය අද නියෝග කළේය.
මෙලෙස රක්ෂිත බන්ධනාගාරගත කෙරුණේ හිටපු අමාත්ය විජේදාස රාජපක්ෂගේ පුත් රඛිත රාජපක්ෂ, සමගි ජන බලවේගයේ හොරණ ආසන සංවිධායක චරිත් අබේසිංහ සහ සිවිල් ගුවන්සේවා අධිකාරියේ ගුවන්තොටුපළ හා ගුවන් සේවා සමාගමේ හිටපු අධ්යක්ෂවරයකු වන වරුෂ හැන්නැදිගේ අරුණ ශ්රී චතුරංග යන අයයි. අද පෙරවරුවේ ස්ථාන තුනකදී මෙම සැකකරුවන් තිදෙනා අත්අඩංගුවට ගෙන තිබුණි.
අද දින සැකකරුවන් අධිකරණයට ඉදිරිපත් කළ අවස්ථාවේදී, ඉන් සැකකරුවන් දෙදෙනෙකු බරපතල රෝගාබාධවලින් පීඩා විඳින බව ඔවුන්ගේ නීතිඥවරුන් අධිකරණයට දැනුම් දුන්නේය.
එහිදී රඛිත රාජපක්ෂ වෙනුවෙන් පෙනී සිටි ජ්යෙෂ්ඨ නීතිඥ අනිල් ද සිල්වා අධිකරණයට පෙන්වා දුන්නේ සිය සේවාදායකයා නින්දේදී හුස්ම සිරවීමේ රෝගී තත්ත්වයක් වන ‘ස්ලීප් ඇප්නියා’ (Sleep Apnea) රෝගයෙන් දරුණු ලෙස පීඩා විඳින බවයි.
මේ අතර දෙවැනි සැකකාර චරිත් අබේසිංහ වෙනුවෙන් පෙනී සිටි නීතිඥවරයා අධිකරණයට දැනුම් දුන්නේ ඔහු හෘද රෝගියකු බවත්, මේ වන විටත් ඔහුගේ සිරුරට ස්ටෙන්ට් (Stent) තුනක් බද්ධ කර ඇති අතර තවත් ස්ටෙන්ට් පහක් බද්ධ කිරීමට නියමිතව ඇති බවත්ය. හැට හැවිරිදි වියේ පසුවන පුද්ගලයකුට වැළඳෙන සියලු රෝගී තත්ත්වයන්ට අවාසනාවන්ත ලෙස චරිත් අබේසිංහ ගොදුරු වී ඇති බවද නීතිඥවරයා වැඩිදුරටත් සඳහන් කළේය.
මෙම අත්අඩංගුවට ගැනීම සිදුවූයේ 2024 මාර්තු මස 04 වැනිදා අල්ලස් හෝ දූෂණ විමර්ශන කොමිෂන් සභාව වෙත ලැබුණු නිර්නාමික පැමිණිල්ලකට අනුව සිදුකළ දීර්ඝ විමර්ශනයකින් පසුවය.
අපරාධ පරීක්ෂණ දෙපාර්තමේන්තුවේ රඳවා සිටින නදුන් චින්තක හෙවත් හරක් කටා, පොලිසිය විසින් ඝාතනය කිරීම වැළැක්වීම සඳහා ඔහුගේ රැඳවුම් නියෝග ඉවත් කර, ගාල්ල බූස්ස අධි ආරක්ෂිත බන්ධනාගාරය හැර වෙනත් බන්ධනාගාරයකට යොමු කර දීමට සහ විමර්ශන කටයුතුවලින් නිදහස් කර දීම සඳහා සැකකරුවන් විසින් රුපියල් කෝටි 50ක මුදලක් අල්ලස් වශයෙන් ඉල්ලා ඇතැයි විමර්ශනවලදී හෙළි වී තිබේ.
පසුව 2023 වර්ෂයේදී ඩුබායි රාජ්යයේදී හරක් කටාගේ බිරිඳ වන මධුශිකා මධුවන්තිගෙන් මෙම මුදල ඉල්ලා ඇති අතර, පසුව එය කෝටි 20 දක්වා අඩු කර ඉන් අත්තිකාරම් මුදලක් ලෙස රුපියල් කෝටි 12ක් ලබාගෙන ඇති බව අල්ලස් කොමිසම අධිකරණය හමුවේ අනාවරණය කළේය.
අද පෙරවරුවේ අත්අඩංගුවට ගත් සැකකරුවන් තිදෙනා අල්ලස් හෝ දූෂණ විමර්ශන කොමිෂන් සභාව වෙත රැගෙන විත් ප්රකාශ සටහන් කරගැනීමෙන් අනතුරුව මෙලෙස අධිකරණයට ඉදිරිපත් කෙරිණි.
