මෙරට දෛනික බලශක්ති පරිභෝජනය උපරිම වන පස්වරු 6 සිට රාත්රී 10 දක්වා කාලය තුළ විදුලිය මනා කළමනාකරණයකින් යුතුව භාවිත කිරීම පිළිබඳව ජනතාව දැනුවත් කරන ලෙස ජනාධිපති අනුර කුමාර දිසානායක නිලධාරීන්ට උපදෙස් ලබා දී තිබේ. ජනතාවගේ දායකත්වය ඇතිව රටේ බලශක්ති සුරක්ෂිතතාව පවත්වාගෙන යාම සඳහා ගතහැකි සියලු ක්රියාමාර්ග ගන්නා ලෙස ජනාධිපතිවරයා මෙහිදී අවධාරණය කළේය.
බලශක්ති සුරක්ෂිතතාව සම්බන්ධයෙන් ගතහැකි ඉදිරි ක්රියාමාර්ග පිළිබඳව අද (23) පෙරවරුවේ ජනාධිපති කාර්යාලයේ පැවති සාකච්ඡාවකදී ජනාධිපතිවරයා මේ බව සඳහන් කළේය.
අභියෝග ජය ගැනීමට සාමූහික වගකීමක්
මැදපෙරදිග පවතින යුද තත්ත්වය හේතුවෙන් ලෝකයේ සෑම රටක්ම බලශක්ති සැපයුම අඛණ්ඩව පවත්වාගෙන යාමේ අභියෝගයකට මුහුණ දී සිටින බව ජනාධිපතිවරයා පෙන්වා දුන්නේය. එවන් පසුබිමක බලශක්තිය අරපිරිමැස්මෙන් භාවිත කරමින් රට හමුවේ ඇති අභියෝග ජය ගැනීමට දායක වීම ආයතනික මෙන්ම පුද්ගල මට්ටමින් ද සැම දෙනා සතු වගකීමක් බව ඔහු සඳහන් කළේය.
රාජ්ය අංශයට නව මාර්ගෝපදේශ
පසුගිය සති කිහිපය තුළ බලශක්ති කළමනාකරණය සම්බන්ධයෙන් රජය ගත් තීරණ ප්රායෝගිකව ක්රියාත්මක කිරීමේ වැදගත්කම මෙහිදී සාකච්ඡා විය. විශේෂයෙන් රාජ්ය සේවය සඳහා ලබාදිය යුතු නව මාර්ගෝපදේශ පිළිබඳව මෙහිදී අවධානය යොමු කෙරිණි. එමෙන්ම පළාත් පාලන ආයතන මට්ටමින් බලශක්ති පරිභෝජනය විධිමත් කිරීම සඳහා එම ආයතන සමඟ සාකච්ඡා කරන ලෙස ද ජනාධිපතිවරයා උපදෙස් දුන්නේය.
ප්රදර්ශන පුවරු සහ වීදි ලාම්පු සීමා කිරීම
විශාල වශයෙන් විදුලිය වැයවන ප්රචාරක පුවරු (Billboards) සහ අලංකරණ විදුලි පද්ධති භාවිතය සීමා කිරීම මඟින් රටේ විදුලි පරිභෝජනයෙන් සැලකිය යුතු ප්රමාණයක් ඉතිරි කරගත හැකි බව මෙම සාකච්ඡාවේදී අනාවරණය විය.
නාගරික ප්රදේශවල අනවශ්ය වීදි ලාම්පු නිවා දැමීම සහ බලශක්ති කළමනාකරණය වෙනුවෙන් ප්රවාහන හා මහාමාර්ග අමාත්යාංශය ඉදිරිපත් කළ යෝජනා පිළිබඳව ද මෙහිදී දීර්ඝව සාකච්ඡා කෙරිණි. මේ සඳහා අනුගමනය කළ හැකි විකල්ප ක්රමවේද පිළිබඳව සියලු පාර්ශ්ව එක්ව කඩිනම් තීන්දුවකට එළඹීමේ අවශ්යතාව ජනාධිපතිවරයා අවධාරණය කළේය.
මෙම සාකච්ඡාව සඳහා රාජ්ය පරිපාලන, පළාත් සභා හා පළාත් පාලන අමාත්ය චන්දන අබේරත්න, ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක, බලශක්ති අමාත්ය කුමාර ජයකොඩි, ජනාධිපති ලේකම් ආචාර්ය නන්දික සනත් කුමානායක ඇතුළු අමාත්යාංශ ලේකම්වරුන් සහ ජ්යෙෂ්ඨ නිලධාරීන් පිරිසක් සහභාගී වූහ.
