ආසියානු සංවර්ධන බැංකුව (ADB) විසින් මෙම වසර සඳහා ශ්රී ලංකාවට අනුමත කර තිබූ ඩොලර් මිලියන 380ක මුදල, ඩොලර් මිලියන 480 දක්වා ඉහළ නැංවීමට තීරණය කර තිබේ. පවතින තත්ත්වය සැලකිල්ලට ගනිමින් ඉන් ඩොලර් මිලියන 200ක මුදලක් කඩිනමින් ලබා දීමට ද එම බැංකුව එකඟතාව පළ කර ඇත.
මෙරටට පැමිණ සිටින ආසියානු සංවර්ධන බැංකුවේ සභාපති මසට්සුගු අසකාවා (Masato Kanda) ඇතුළු නියෝජිත කණ්ඩායම අද (24) පස්වරුවේ ජනාධිපති කාර්යාලයේදී ජනාධිපති අනුර කුමාර දිසානායක හමු වූ අවස්ථාවේදී මේ බව අනාවරණය විය.
ශ්රී ලංකාවේ ඉදිරි සංවර්ධන අරමුණු සාක්ෂාත් කර ගැනීමට ආසියානු සංවර්ධන බැංකුවේ සහාය ලබා ගත හැකි ආකාරය පිළිබඳව මෙහිදී දීර්ඝ ලෙස සාකච්ඡා කෙරිණි. දිට්වා ආපදා තත්ත්වයෙන් පසු රට යළි ගොඩනැඟීමේ රජයේ වැඩපිළිවෙළට ආසියානු සංවර්ධන බැංකුවේ සහාය අපේක්ෂා කරන බව ජනාධිපතිවරයා මෙහිදී ප්රකාශ කළේය.
පශ්චාත් ආපදා තත්ත්වය සහ වත්මන් මැදපෙරදිග යුදමය වාතාවරණය හමුවේ වුවද ආර්ථික ස්ථාවරත්වය පවත්වාගෙන යාම වෙනුවෙන් රජය ගෙන යන වැඩපිළිවෙළ මෙහිදී ආසියානු සංවර්ධන බැංකු සභාපතිවරයාගේ ඇගයීමට ලක් විය. දිට්වා සුළි කුණාටුවෙන් විනාශ වූ යටිතල පහසුකම් යළි ගොඩනැඟීම සඳහා අවශ්ය ඕනෑම සහායක් ලබා දීමට සූදානම් බවද ඔහු පැවසීය.
දිට්වා සුළි කුණාටු ආපදා තත්ත්වයේදී ආසියානු සංවර්ධන බැංකුව මෙතෙක් ලබා දුන් ආධාර මෙන්ම පවත්වාගෙන යන සංවර්ධන සහයෝගීතාව අගය කළ ජනාධිපති අනුර කුමාර දිසානායක, මෙරට ආර්ථිකය ස්ථාවරව පවත්වා ගනිමින් ආර්ථික සංවර්ධනය අත්පත් කර ගැනීම රජයේ මූලික අපේක්ෂාව බව අවධාරණය කළේය.
මධ්යම කඳුකරයේ ජල පද්ධතීන් ආරක්ෂා කර ගනිමින් මෙවැනි ආපදා තත්ත්වයන් යළි ඇති නොවීමට ක්රියාත්මක කළ යුතු වැඩසටහන් සඳහා සහාය වීමට ද ආසියානු සංවර්ධන බැංකුව එකඟතාව පළ කර ඇත.
මෙම අවස්ථාවට ආසියානු සංවර්ධන බැංකුව වෙනුවෙන් එහි දකුණු ආසියානු කලාපීය දෙපාර්තමේන්තුවේ අධ්යක්ෂ ජනරාල් සෝනා ශ්රෙස්තා (Sona Shrestha), සභාපති කාර්යාලයේ ප්රධාන උපදේශක කේයිචිරෝ ඉනුයි (Keiichiro Inui), ජ්යෙෂ්ඨ උපදේශක මනීෂා ප්රධානංග (Manisha Pradhananga) ඇතුළු පිරිසක් එක්ව සිටියහ.
ශ්රී ලංකා රජය වෙනුවෙන් කම්කරු අමාත්ය සහ ආර්ථික සංවර්ධන නියෝජ්ය අමාත්ය අනිල් ජයන්ත ප්රනාන්දු, ජනාධිපති ලේකම් ආචාර්ය නන්දික සනත් කුමානායක, මුදල් අමාත්යාංශයේ ලේකම් ආචාර්ය හර්ෂණ සූරියප්පෙරුම, ජනාධිපති ජ්යෙෂ්ඨ ආර්ථික උපදේශක දුමින්ද හුලංගමුව ඇතුළු පිරිසක් සහභාගි වූහ.
