හැටන් රංජිත් රාජපක්ෂ –
පුද්ගල ඝාතන හතරකට අදාළව නුවරඑළිය මහාධිකරණයේ විභාග වූ නඩු හතරක විත්තිකරුවන් සිව් දෙනෙකුට අද (29) නුවරඑළිය මහාධිකරණ විනිසුරුවරයා විසින් මරණ දණ්ඩනය නියම කරනු ලැබීය. මෙලෙස මරණ දඬුවම නියම කරනු ලැබුවේ නුවරඑළිය මහාධිකරණ විනිසුරු විරාජ් වීරසූරිය විසිනි.
මරණ දඬුවම නියම වූ එක් චූදිතයෙකු තීන්දුව ප්රකාශ කිරීමෙන් පසු සිරමැදිරියේ වැසිකිළියේදී වස පානය කර ඇති අතර, ඔහුව බේරාගෙන ප්රතිකාර සඳහා නුවරඑළිය රෝහලට ඇතුළත් කර තිබේ. පනස් දෙහැවිරිදි මෙම පුද්ගලයා 2015 වසරේදී නුවරඑළිය උඩුපුස්සැල්ලාවේදී තම බිරිඳගේ සිරුරේ ස්ථාන 23කට තියුණු ආයුධයකින් ඇන ඝාතනය කිරීමේ චෝදනාවට වැරදිකරු වී තිබිණි.
මරණ දණ්ඩනය නියම වූ අනෙක් පුද්ගලයා වලපනේ තෙරිපැහැ ප්රදේශයේ පදිංචි 56 හැවිරිදි එස්. නන්දසේන නැමැත්තෙකි. ඔහු 1997 වසරේදී උප තැපැල් ස්ථානාධිපතිවරයෙකුගේ ගෙළ කපා ඝාතනය කිරිම සම්බන්ධයෙන් මීට පෙර මරණ දඬුවම නියමව සිටි අයෙකු වන අතර, එම තීන්දුවට එරෙහිව ශ්රේෂ්ඨාධිකරණය හමුවේ ඇපෑලක්ද ගොනුකර තිබුණි. ශ්රේෂ්ඨාධිකරණය මගින්ද නියෝග කර ඇත්තේ ඔහුගේ මරණ දඬුවම ක්රියාත්මක කරන ලෙසයි. මෙම නඩුව වසර 29ක් තිස්සේ විභාග වූ එකක් වීම විශේෂත්වයකි.
මරණ දඬුවම නියම වූ තෙවැනි පුද්ගලයා තලවකැලේ පොලිස් වසමේ පදිංචි 75 හැවිරිදි මුත්තුවිරන් නැමැති අයෙකි. පුද්ගලයෙකුට පහරදී ඝාතනය කිරීම ඔහුට එල්ල වී තිබූ චෝදනාවයි.
සිව්වැනි චූදිතයා ලෙස ගිනිගත්හේන කෙනිල්වත්තේ පදිංචි 51 හැවිරිදි ශන්මුගම් සිවරාජා නැමැත්තාට මරණ දඬුවම නියම විය. ඔහු 2000 වසරේදී පුද්ගලයෙකුට ගල්වලින් පහරදී ඝාතනය කිරිම සම්බන්ධයෙන් මෙලෙස වැරදිකරු බවට ප්රකාශ කෙරිණි.
