මැදපෙරදිග කලාපයේ පවතින යුදමය වාතාවරණය හේතුවෙන් මෙරට බලශක්ති සැපයුම් ජාලයට එල්ල විය හැකි බලපෑම් අවම කරගැනීම සඳහා වන විශේෂ සමාලෝචන රැස්වීමක් අද (15) පස්වරුවේ ජනාධිපති අනුර කුමාර දිසානායක ප්රධානත්වයෙන් පැවැත්විණි.
ගෝලීය වශයෙන් ඇති වී තිබෙන මෙම තත්ත්වය හමුවේ ගල්අඟුරු, ගෑස් සහ තෙල් සැපයුම් අඩාල වීම වැළැක්වීමට ගත යුතු විකල්ප ක්රියාමාර්ග පිළිබඳව මෙහිදී දීර්ඝ වශයෙන් සාකච්ඡා කෙරිණි.
බලශක්ති අර්බුදයට යෝජිත විකල්ප ක්රමවේද
ඉන්ධන සහ බලශක්ති පරිභෝජනය කළමනාකරණය කිරීම සඳහා ජනාධිපතිවරයා විසින් පියවර කිහිපයක් යෝජනා කරන ලදී:
- ඩිජිටල් කේත (QR) ක්රමය: දැනට පවතින ක්රමවේදයේ ඇති බාධා ඉවත් කර වඩාත් විධිමත් ලෙස ක්රියාත්මක කිරීම.
- නිවසේ සිට රාජකාරී කිරීම (WFH): අනවශ්ය ඉන්ධන පිරිවැය අවම කරගැනීම සඳහා රාජ්ය හා පෞද්ගලික අංශයට විකල්ප වැඩමුර හඳුන්වා දීම.
- විධිමත් සන්නිවේදනය: පවතින තත්ත්වය පිළිබඳව ජනතාව නිරන්තරයෙන් දැනුවත් කරමින් විනිවිදභාවයකින් යුතුව කටයුතු කිරීම.
ජාතික ආර්ථිකය ආරක්ෂා කර ගැනීම
මැදපෙරදිග යුද්ධය ලංකාවට පමණක් නොව සමස්ත ලෝකයටම බලපාන කරුණක් බව පෙන්වා දුන් ජනාධිපතිවරයා, පසුගිය කොරෝනා සමයේ අත්දැකීම්වලට වඩා වෙනස් ප්රවේශයකින් යුතුව මෙම අර්බුදයට මුහුණ දිය යුතු බව අවධාරණය කළේය. විශේෂයෙන් කර්මාන්ත ක්ෂේත්රය බිඳ වැටීමට නොදී පවත්වාගෙන යාමට රාජ්ය හා පෞද්ගලික අංශ ඒකාබද්ධ සැලසුමක අවශ්යතාව මෙහිදී මතු විය.
සැපයුම් ජාල අධීක්ෂණය කරමින් ජාතික ආර්ථිකයට වන හානිය අවම කිරීමට නිරන්තර අවධානයෙන් පසුවන ලෙස ජනාධිපතිවරයා නිලධාරීන්ට උපදෙස් ලබා දුන්නේය.
සාකච්ඡාවට සහභාගී වූ පිරිස
මෙම අවස්ථාවට අමාත්යවරුන් වන අනිල් ජයන්ත, කුමාර ජයකොඩි, විජිත හේරත් සහ ජනාධිපති ලේකම් නන්දික සනත් කුමානායක ඇතුළු පිරිසක් එක්ව සිටියහ.
එමෙන්ම ජනාධිපති උපදේශකවරුන් වන හාන්ස් විජේසූරිය, දුමින්ද හුලංගමුව, කාර්යය මණ්ඩල ප්රධානී ප්රභාත් චන්ද්රකීර්ති, මහබැංකු අධිපති නන්දලාල් වීරසිංහ, මුදල් අමාත්යංශ ලේකම් හර්ෂණ සුරියප්පෙරුම, ආරක්ෂක ලේකම් සම්පත් තුයියකොන්තා, ලංකා ඛණිජ තෙල් නීතිගත සංස්ථාවේ සභාපති ජානක රාජකරුණා සහ ලිට්රෝ ගෑස් සමාගමේ සභාපති චන්න ගුණවර්ධන ඇතුළු නිලධාරීන් පිරිසක් ද මීට සහභාගී වූහ.
