ශ්රී ලාංකීය පොදු ප්රවාහන සේවයේ නව සන්ධිස්ථානයක් සනිටුහන් කරමින්, ආබාධ සහිත සහ විශේෂ අවශ්යතා සහිත පුද්ගලයන් වෙනුවෙන් නිර්මාණය වූ “පත්ල පහත්” (Low Floor) බස් රථ සේවාව අද (21) නිල වශයෙන් ආරම්භ විය.
“”අනාගතයට ගොඩවෙන්න” යන තේමාව යටතේ “ක්ලීන් ශ්රී ලංකා” ජාතික වැඩසටහන සහ ප්රවාහන, මහාමාර්ග සහ නාගරික සංවර්ධන අමාත්යාංශය එක්ව මෙම ව්යාපෘතිය ක්රියාත්මක කරයි. මාකුඹුර බහුවිධ ප්රවාහන මධ්යස්ථානයේදී පැවැති මෙම උත්සවයේදී මගීන්ට බස් රථ තොරතුරු කඩිනමින් ලබාගත හැකි “LMT GO” ජංගම දුරකථන යෙදුම ද හඳුන්වා දෙන ලදී.
මෙම අවස්ථාවට එක් වූ ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක පෙන්වා දුන්නේ රෝද පුටු භාවිත කරන පුද්ගලයන්, දෘෂ්යාබාධිතයන් සහ ගැබිණි මව්වරුන් වැනි විශේෂ ප්රජාවට මෙහිදී ප්රමුඛතාව හිමිවන බවයි. වසර අවසන් වීමට පෙර මෙවැනි බස් රථ 122ක් ධාවනයට එක් කිරීමට සැලසුම් කර ඇති අතර, මෙම සේවාව මහනුවර, මඩකළපුව, මාතර සහ යාපනය වැනි ප්රදේශ කරා ද ව්යාප්ත කිරීමට නියමිතය.
ආබාධ සහිත ප්රජාව නියෝජනය කරමින් අදහස් දැක් වූ ලසංග රත්නායක සඳහන් කළේ, පොදු ප්රවාහනයේදී තමන් මුහුණ දෙන පීඩාව අවම කිරීමට රජය ගත් මෙම පියවර ඉතා ඵලදායී බවයි. මෙම නියමු ව්යාපෘතිය යටතේ ආසන 30කින් යුත් බස් රථ 10ක් දැනට සේවයට එක් කර ඇත. මෙම බස් රථ මාකුඹුරේ සිට කොළඹ කොටුව සහ කඩවත දක්වා ධාවනය වන අතර, කොළඹ ජාතික රෝහල සහ මහරගම අපේක්ෂා රෝහල වැනි ප්රධාන සෞඛ්ය මධ්යස්ථාන ද ආවරණය කරයි.
“පත්ල පහත්” (Low Floor) බස් රථ සේවාව ධාවන මාර්ග
මාර්ග අංකය 01.
මහරගම සිට කඩවත දක්වා
මෙම ගමනාන්තයේදී බස් රථය නවත්වනු ලබන ප්රධාන නැවතුම්පොළවල් (Halts) පිළිවෙළින් පහත දැක්වේ:
- මහරගම අපේක්ෂා රෝහල
- නාවින්න
- නාරාහේන්පිට මංසන්ධිය
- කැම්බල් පාර්ක්
- කැලණිය විශ්වවිද්යාලය
- කඩවත
කඩවත සිට මහරගම දක්වා
නැවත පැමිණීමේදී බස් රථය නවත්වනු ලබන ප්රධාන නැවතුම්පොළවල් පිළිවෙළින් පහත දැක්වේ:
- කඩවත
- කැලණිය විශ්වවිද්යාලය
- කැම්බල් පාර්ක්
- නාරාහේන්පිට මංසන්ධිය
- නාවින්න
- මහරගම අපේක්ෂා රෝහල
මාර්ග අංක 02
මාකුඹුර සිට කොළඹ කොටුව දක්වා
මෙම ගමනාන්තයේදී බස් රථය පහත සඳහන් ප්රධාන ස්ථාන හරහා ගමන් කරයි:
- ආරම්භය: මාකුඹුර
- සෙත්සිරිපාය – බත්තරමුල්ල
- රාජගිරිය
- ටවුන් හෝල් – කොළඹ නගර ශාලාව
- පිටකොටුව
- අවසානය: කොළඹ කොටුව
කොළඹ කොටුව සිට මාකුඹුර දක්වා
ආපසු පැමිණීමේදී ගමන් මාර්ගය මෙසේය:
- ආරම්භය: කොළඹ කොටුව
- පිටකොටුව
- ටවුන් හෝල්
- රාජගිරිය
- සෙත්සිරිපාය
- අවසානය: මාකුඹුර
මෙම සමාරම්භක අවස්ථාවට ප්රවාහන සහ මහාමාර්ග නියෝජ්ය අමාත්ය ප්රසන්න ගුණසේන, පාර්ලිමේන්තු මන්ත්රීවරුන් වන සුගත් වසන්ත ද සිල්වා, දේවානන්ද සුරවීර, අමාත්යාංශ ලේකම් කපිල සී.කේ. පෙරේරා ඇතුළු නිලධාරීන් පිරිසක් සහභාගී වූහ.
