බංගලියන්ට සුපිරි ජයක්… මේ තරගයේ අපට උනේ කුමක් ද?

අද නියම ක්‍රිකට් ක්‍රීඩා කළේ ඔවුන්ය. පිටියේ සංයමය, විනය,   වර්ණවත් ක්‍රීඩා ශීලී ගුණය මෙන්ම වෘත්තිය ක්‍රිකට් ක්‍රීඩාවේ පරිණතිය සහිතව තරග වැදුන බංගලාදේශ කණ්ඩායමට හිස නමා ආචාර කළ යුතු බව විශ්වාස කරමු.

අන්තර්ජාතික එක් දින තරගයක මූලිකම දේ පන්දු ඕවර 50 ක්‍රීඩා කිරීමය. කරුමය වන්නේ මෑතක සිට බොහෝ අවස්ථාවල අපට ඕවර 50 ක්‍රීඩා කරගන්නට නොහැකි වීමය. අද චටොග්‍රෑම් හි සහුර් අහමඩ් චෞද්‍රි ක්‍රීඩාංගනයේ දී කාසියේ වාසිය දිනාගෙන මුලින්ම පන්දුවට පහරදීම තේරූ ශ්‍රී ලංකා කණ්ඩායම පන්දු ඕවර 48.5 ක් තුළ සියල්ලෝ දැවී ගියහ. ඒ ලකුණු 255කට ය. මේ තණතිරුවේ දී ඒ ලකුණු ගණන කොටය.  ආශ්චර්යයක් නොවේ නම් ඒ තරගය ජයගත නොහැකි බව අපි මුලින්ම ලියා තැබුවෙමු.

• කාසියේ වාසියත් බංගලියන්ට පූජා කළ අයුරු

අනෙක කාසියේ වාසිය දිනා නායකයා පිතිකරණය තෝරාගත් ආකාරය  මොන ගොබ්බ තීන්දුවක් දැයි විමසුවේ අප නොව අන්තර්ජාතික ක්‍රිකටට් විචාරකයන්ය. දෙවැනි ඉනිමේ පන්දු ඕවර 20ක් යවනවිට පිටියට පින්න පාත් වුනේය. ඉන් අනතුරුව මොන පන්දු යැවීමක් ද. පිතිකරුවන්ට පන්දු යැව්වා නොව පූජා කළාක් බඳු විය. මොනම තර්ජනයක්වත් නැත. පන්දු දඟ කැවෙන්නේ නැත. දෝලනයක් නැත.  සැන්ටෝ අපට වඩාගෙන නෙළුවේය.

බංගලාදේශ කණ්ඩායම අපහසුවෙන් ක්‍රීඩා කළේ මුල් පන්දු ඕවර 10 පමණි. ඩිල්ෂාන් මධුශංක එවූ ඉනිමෙ මුල්ම පන්දුවේ දී ආරම්භක පිතිකරු ලින්ටන් දාස් දැවී ගියේය. ඔහුගේ ඊලඟ ඕවරයේ දි සෞම්‍යා සකාර් ලකුනු 03කට දැවී යන්නේ මහීෂ් තික්ෂණ අතට පහසු උඩපන්දුවක් ලබා දෙමිනි. දෙවැනි කඩුල්ල දැවී යන්නේ ලකුණු 13 දී ය. ලකුණු 23 වනවිට කඩුළු 3ක් දැවී ගොස්ය. ප්‍රමෝද් මධුශාන් සිය පළමු පන්දුවෙන්ම කඩුල්ල කුඩුකරමින් ටොවිඩ් හ්‍රිඩෝයි දවා ගන්නේය.

අනතුරුව සිව්වන කඩුල්ලට නායක නජ්මුල් හොසේන් සැන්ටො සහ මහ්මුදුල්ලාහ් අතර ලකුනු 69ක සම්බන්ධතාවයක් ගොඩනැගෙන්නේය. 4වන කඩුල්ල බිඳවැටෙන්නේ    ලකුණු 92 දී ය. කඩුල්ල දවා ගන්නේ ලහිරු කුමාරය.  යවා තිබුණේ පන්දු ඕවර 15.3 කි.

• නායකයෙකුගේ පෞරුෂවත් ඉනිම

ඉන් පසු කඩුළු බිඳ වැටුනේ නැත. පස්වන කඩුල්ල වෙනුවෙන් නොබිඳුන ලකුනු 165ක සම්බන්ධතාවයක් ගොඩනැගුනේය.  බංගලාදේශය අද පළමු එක් දින තරගයෙන් සුපිරි  ජයග්‍රහණ්‍ය වාර්තා කරන්නේ  කඩුළු 04ක් පමණක් දැවී ගොස්ය. මේ කඩුළු 06ක ජයග්‍රහණය     ලබනවිට ඔවුන්ට පන්දු 32ක්    ඉතිරිව තිබිණි. තුන්සියයකට ඉහළ ඉලක්කයක් හඹා ගොස් ජයග්‍රහණය කිරීමේ පහසු ප්‍රවේශය තමන් සතු බව බංගලාදේශය අපට කීවේය.

නායක නජිමුල් හොසෙයින් සැන්ටො පෞරුෂවත් නායකත්වයේ ඉනිමක් ක්‍රීඩා  කරනු බලා සිටියෙමු.  ඔහු පන්දු 129ක් තුළ නොදැවී ලකුණු 122කි. හතරේ පහර 13කි. හයේ පහර 2කි.

ඔහු සමග මනරම් සම්බන්ධතාවයක් ගොඩනගන බංගලාදේශ කඩුලු රකින්නා මෙන්ම කණ්ඩායමේ අත්දැකීම් සහිත පරිණත ක්‍රීඩක මුෂ්ෆිකර් රහීම් ලකුණු 72කි.

මුලින් කී ලෙස  මුෂ්ෆිකර් රහීම් කඩුල්ලට එන්නේ ලකුණු 92ට කඩුළු 04ක් බිඳී ගිය අවස්ථාවේ දී ය. සිව්වන කඩුල්ල ලෙස දැවී යන්නේ පන්දු 37ක දී ලකුණු 37ක් ලබා සිටි මහ්මුදුල්ලාය. අනතුරුව මුෂ්ෆිකර් සහ නායක ෂන්ටො එක්ව  පස්වන කඩුල්ල වෙනුවෙන්   නොබිඳුන සම්බන්ධතාවය ලකුණු 165ක සම්බන්ධතාවයක් ගොඩනගමින් කණ්ඩායම ජයග්‍රහණය කරා රැගෙන යන්නේය.

පළමු විස්සයි විස්ස තරග 03ත් එකතු කළ විට මේ අප බංගලාදේශය සමග තරග වැදුන සිව් වන තරගය ය. ආරම්භක එක් දින තරගය වූ ඒ 4 වැනි තරගය බංගලාදේශය ජයග්‍රහණයෙන්  නිමා කරන්නේ පන්දු 44.4ක දී ය. ඔවුන්ගේ දැවී ගියේ කඩුළු 04ක් පමණි. හතරේ තරගය… එය ඔවුන්ගේය.

• ශ්‍රි ලංකා පිතිකරණය

මෙම ක්‍රීඩාංගනයේ පිතිකරණයට යෝග්‍ය  පැතිලි තණ තීරුවේ මුලින්ම පන්දු රැකීම තෝරනවා නම් නිසැක දීර්ඝ ඉනිම් කීපයක් සහිතව ලකුණු 300ක ඉලක්කයක් ඉක්මවා යා යුතු බව යථාර්ථය වී තිබිණි. එහෙත් එතෙන්ට කිසිවෙක් ගියේ නැත. ආරම්භක පිතිකරුවන් දෙදෙනා මුල් ඕවර 10 තුළම තණතීරුවේ ස්වරූපය පෙන්වා දුන්නේය. ලකුණු ඕනෑතරම් තිබිණි. 300 ඉක්මවා යා යුතුවම ඇති බව අපට පෙනුනේය. එය ඔවුන් නොදන්නා දෙයක් නොව ඉතාම සරල කතාවකි. පිටියේ ඉන්නේ ඔවුන්ය

ලකුණු 30 සීමාවට පහසුවෙන් පැමිණි  පසු  අන්ර්ජාතික තලයේ ක්‍රීඩකයෝ  තමන්ගේ අවස්ථාව විවර වී ඇති බවත්  කල්පනාවෙන් කළමනාකාරණය කරගෙන දීර්ඝ ඉනිමක් ක්‍රීඩා කළ යුතු බවත් දනිති. එමෙන්ම නායකයා තෝරා දී ඇත්තේ ලකුණු 300 ඉක්මවා යා යුතු ඉලක්කයක් බවත් සැලසුම සැකසෙන්නේ ඒ වෙනුවෙන් බවත් හොඳින්ම දැනෙගන සිටිති.

එහෙත්  අපේ ක්‍රීඩකයින්ගෙන්  දුටුවේ සැලසුම් රහිත විකල් ස්වරූපයකි.

අආරම්භක පිතිකරුවන්වන පැතුම් නිශ්ශංක සහ අවිශ්ක ප්‍රනාන්දු මුල් කඩුල්ල වෙනුවෙන් ලකුණු 71ක සම්බන්ධතාවයක් ගොඩනැගූහ.  පළමු කඩුල්ල ලෙස දැවී යන්නේ ලකුණු 33ක් ලබා ගත් අවිශ්ක ප්‍රනාන්දුය.  ඔහු හතරේ පහර 5ක් සහ හයේ පහරක් එල්ල කළේය.

මුළු ලකුණු සංඛ්‍යාව 72 දී ලකුණු 36කට පැතුම් නිශ්ශංක දැවී ගියේය. ඔහුත් හතරේ පහර 5කි. හයේ පහර 1කි. ආරම්භක පිතිකරුවන් යුවල නිරායාශයෙන් ලකුණු රැස් කළ බව පෙනුණි.  පිටත පිටිය ඉතාම වේගවත් විය. පන්දුව තියුණු ලෙස හතරේ සීමාව ඉක්මවා ගියේය.

එහෙත් සධීර සමරවික්‍රමට වෙනදා කළ වික්‍රමය කළ නොහැකි වූයේය. ඔහු ලකුණු 3කි. චරිත් අසලංක මෙහිදි හසන් මිරාස් එවූ පන්දුවකට සිය පා ඉන්න ගලවාගෙන ලකුණු 18කට දැවී ගියේය.  තරගයේ මනරම්ම සම්බන්ධතාවය ගොනැගෙන්නේ කුසල් මෙන්ඩිස් සහ මැද පෙළ යොවුන් පිතිකරු ජනිත් ලියනගේ අතරය. ලකුණු 68ක සම්බන්ධතාවයක් ඔවුන් දෙපල අතර ඇතිවන්නේය. කුසල් මෙන්ඩිස් ලකුණු 57කට දැවී ගොස් අනෙක් අන්තයෙනක් පෙරහර යනවාක් සේ කඩුළු වැටෙන විට ලකුණු ලබා ගැනීමේ වේගය වැඩි කරන්නට ගිය ජනිත් ලියනගේ ෂොරිෆුල් ඉස්ලාම්ගේ පන්දුවකට ප්‍රවීන කඩුළු රකින ක්‍රීඩක මුෂ්ෆිකර් රහ්මාන්ට උඩ පන්දුවක් දී දැවී යන්නේය.

• ට්‍රයි කරන්න  තිබුණා…

සධීර සමරවික්‍රමට සහ චරිත් අසලංකට අද ඔවුන්ගේ දිනය නොවූ බව සිතන්නට පුලුවන. එහෙත්  ලකුණු 59ක් ලබා ගත් නායක කුසල් මෙන්ඩිස්ට,  තමන් කණ්ඩායමේ අවසන් පිතිකරුවා බව හොඳින්ම දැනගෙන පිටියට එන වනිඳු හසරංගටත් ඔවුන්ගේ සැලසුම ගැන හිතන්නට තිබිණි.  ක්‍රිකට් ඇඟේ හයියටම ගහන ක්‍රීඩාවක් නොවන බව වනිඳු හසරංගට තේරී තිබුණා නම් හයේ පහරක් සහ හතරේ පහරක් ගසා ලකුණු 13ක් සහිතව දැවී යන්නේ නැත.

තරගය දිනා ගත් සැන්ටෝ මෙසේ කීවේය.

“නව පන්දුවේදී   තරමක් අපහසු බව අපි දැන සිටියා. ඒ නිසාම මම වෙලා අරන් තමයි පන්දුවට පහර දුන්නේ.   මහමුදුල්ලා ඔහුගේ ඉනිම ආරම්භ කළ ආකාරය කණ්ඩායම ස්ථාවර කරමින් ඉනිම ගොඩනගන්න ගොඩක් උදව් කළා. පසුව පිනි නිසා කඩුල්ල ඉතා පහසු වුනා. ඉන් පසුව මුෂි ඔහුගේ අත්දැකීම් පෙන්නුවා.  අපි හැමෝම දන්නවා ඔහුගේ දක්ෂතාවය. “

කුසල් මෙන්ඩිස් කීවේ පිතිකරණයේ දී  පළමු ඕවර 10 තුළ හොඳ ආරම්භයක් පැතුම් සහ අවිශ්ක ලබා ගත්තත් මැදපෙළ බිඳවැටුන බවය.

පන්දු යැවීමේ දීත් පළමු ඕවර 10 ඩිල්ෂාන් සහ ප්‍රමෝද් හොඳන් පන්දු යැවූ නමුත්   20 වැනි ඕවරයෙන් පසු සිදුවූ පිනි වැටුන බවය . පිනිවලින් පන්දුව තෙත් වී ගියවිට පන්දු යවන්නන්ට පන්දුව පාලනය කිරීමට අපහසු වූ බවය.

අපට අහන්නට ඇත්තේ ටොස්ට් එක දිනා අහවල් පරිඇටයක් කළාද යන්නය.