ලෝක කුසලානයට සුදුසුකම් ලැබීමේ තරගාවලියේ දී අසිරිමත් පෙරළියක් සිදු වී තිබේ.
ස්කොට්ලන්තයේ ලෝක කුසලාන සුදුසුකම් ලැබීමේ බලාපොරොත්තුව සුනු විසුනු වී ඇත. විශ්මයජනක ජයග්රහණයකින් පසු නෙදර්ලන්තය ලෝක කුසලාන තරගාවලියට සහභාගීවන 10 වැනි කණ්ඩායම ලෙස ස්වකීය ස්ථානය තහවුරු කරගෙනය.
ටෙස්ට් ක්රීඩා කරන බටහිර ඉන්දීය කොදෙව්වන් මෙන්ම සිම්බාබ්වේ කණ්ඩායම ද විසිවී යද්දී ලෝක කුසලානය වෙනුවෙන් සිය ස්ථානය වෙන් කරගැනීමට තරග කරනු ලැබුවේ ටෙස්ට තත්ත්වය නැති ස්කොට්ලන්තය සහ නෙදර්ලන්ත කණ්ඩායම් දෙකය. ස්ථානය තහවුරු කරගැනීමට වැඩි අවස්ථාව තිබුනේ ස්කොට්ලන්තයටය. නෙදර්ලන්තයට ස්කොට්ලන්තය අභිබවා ගොස් ලෝක කුසලානයට සුදුසුකම් ලැබීම සඳහා මෙම තරගය හඹා යෑමේ දී පන්දු 33කට පෙර අදාල ඉලක්කය සපුරා ගත යුතුව තිබිණි. ඔවුහු ඒ අසීරු ඉලක්කය ලබා ගත්හ.
බුලවායෝ හි පැවති තරගයේ දී නෙදර්ලන්තය කාසියේ වාසිය දිනාගෙන මුලින්ම පන්දු රැකීම තේරුවේය.
ස්කොට්ලන්තය වෙනුවෙන් විශිෂ්ට පිතිකරණයක යෙදුන බ්රෙන්ඩන් මැක්මුලන් පන්දු 110ක දී ලකුණු 106ක් ලැබුවේය. ඊට හතරේ පහර 11ක් සහ හයේ පහර 03ක් ඇතුළත් විය.
නායක රිචර් බෙරන්ග්ටන් පන්දු 84ක දී ලකුණු 64ක් ලබා ගත්තේය. තෝමස් මැක් කින්ටොෂ් ලකුණු 38කි. ආරම්භක පිතිකරු ක්රිස්ටෝපර් මැක්බ්රයිඩ් ලකුණු 32කි. අනෙක් එක පිතිකරුවෙක්වත් සාර්ථක වූයේ නැත. ස්කොට්ලන්ත කන්ඩායම පන්දු ඕවර 50 අවසානයේ දී කඩුළු 09ක් දැවී ලකුණු 277ක් රැස් කළහ.
තරගය අමරණීය කළ ක්රීඩකයා නෙදර්ලන්ත කණ්ඩායමේ තුන් ඉරියව් ක්රීඩක බස් ඩි ලීඩ්ය. දකුණත් වේග පන්දු යවන ලිඩ් ලකුණු 52කට ස්කොට්ලන්ත කඩුළු 05ක් දවා ගතතේය.
පන්දුවට පහරදීමට පැමිණි නෙදර්ලන්ත කණ්ඩායමේ විශිෂ්ටම පිිතිකරණයත් බස් ඩි ලීඩ්ගේය. ඔහු පන්දු 92ක දී දැවැන්ත හයේ පහර 05ක් සහ හතරේ පහර 07ක් සමගින් ලකුණු 123ක් රැස් කළේය.
මේ පිතිකරණ වික්රමය සහ ස්කොට්ලන්ත කණ්ඩායමේ කඩුළු 05ක් දවා ගැනීම නෙදර්ලන්ත කණ්ඩායම ලෝක කුසලාන තරගාවලියේ 10 වැනි කණ්ඩායම බවට පත් කළේය.
පන්දු ඕවර 42.5ක් තුළ ඉලක්කය ලබා ගත් නෙදර්ලන්ත කන්ඩායම කඩුළු 04ක ජයග්රහණයක් වාර්තා කළේය.
බාස් ඩි ලීඩ් වැනි වික්රමයක් ක්රිකට් ලොව මෙපමණ කාලයක් කර ඇත්තේ ක්රීඩකයින් සිව් දෙනෙක් පමණි. එනම් කඩුළු 05ක් සමගින් ශතකයක් ලබාගෙන එක් දින තරගයක දී දක්ෂතා දැක්වීමය.
මේ දක්ෂතාව මුලින්ම දැක්වූයේ මේ වනවිට ලෝක කුසලානයෙන් ඉවත් වී ඇති බටහිර ඉන්දීය කොදෙව් කණ්ඩායමේ හිටපු පුරාවෘතයක් වූ විවියන් රිචඩ්ස් ය. දෙවැන්නා එංගලන්ත තුන් ඉරියව් ක්රීඩක පෝල් කොලින්වුඩ්ය. තෙවැන්නා එක්සත් අරාබි එමීර් රාජ්යයේ තුන් ඉරියව් ක්රීඩක රොහාන් මුස්තාෆාය.
මෙම තරගයේ වීරාය බස් ඩී ලීඩ් ය.
