ජයකාන්ත ලියනගේ – බළපිටිය –
ඉදුරුව, අතුරුවැල්ලේ ධර්ම ශ්රී වර්ධනාරාම විහාරස්ථානයේ අයිතිය ඉල්ලා ගැටුමක් ඇති කරගෙන භික්ෂූන් වහන්සේලා දෙනමකට මෙන්ම පොලිස් නිලධාරියෙකුට තියුණු ආයුධ වලින් පහර දි බරපතල තුවාල සිදු කිරීම සම්බන්ධයෙන් රක්ෂිත බන්ධනාගාර කර සිටි දළුව, පුත්තලම, අන්තර් සමුද් පිරිවේනාධිපති, අස්ගිරි පාර්ශවයේ පුත්තලම් දිසාවේ ප්රධාන සංඝනායක සහ කල්පිටිය ශාසනාරක්ෂක මණ්ඩලයේ ප්රධාන ලේඛකාධිකාරී මිගෙට්ටුවත්තේ සුමිත්ත සහ ඉදුරුව, අතුරුවැල්ලේ ධර්ම ශ්රී වර්ධනාරාම විහාරාධිපති වයඹ පළාතේ ප්රධාන සංඝ නායක සහ කල්පිටිය ශාසන ආරක්ෂක බල මණ්ඩලයේ සභාපති ඉත්තෑපානේ සුමන යන හිමිවරුන් රුපියල් ලක්ෂ දෙක (2,00000/-) බැගින් වූ ශරීර ඇප 04 ක් මත මුදා හරිමින් විහාරස්ථානයේ අයිතිය මිගෙට්ටුවත්තේ සුමිත්ත හිමියන්ගේ පාර්ශවයට තාවකාලිකව ලබා දීමට බළපිටිය මහේස්ත්රාත් ආර් ඩී ජනක ඊයේ (22) නියෝග කළේය
විහාරස්ථානයේ අයිතිය සම්බන්ධයෙන් බෙන්තොට පොලීසිය ප්රාථමික අධිකරණ ආඥා පනතේ 66 වන වගන්තිය යටතේ පවරන ලද නඩුව 2024 අගොස්තු 05 වන දිනත්, පහර දීමට අදාල නඩුව 2024 නොවැම්බර් 19 වන දිනත් විභාගයට ගන්නා බවද මහේස්ත්රාත්වරයා බෙන්තොට පොලීසියට දැනුම් දුන්නේය.
ආරවුල ඇතිවන තෙක් විහාරස්ථානයේ වැඩ සිටි ඉත්තෑපාන සුමන හිමියන්ට 66 වන වගන්තිය යටතේ වූ නඩුව විභාග කොට අවසන් වන තෙක් විහාරස්ථානයේ අයිතිය තාවකාලිකව පවරන බවද මහේස්ත්රාත්වයා සිය තීන්දුව ප්රකාශයට පත් කරමින් මෙහිදී වැඩි දුරටත් දැනුම් දුන්නේය.
ආරවුලේදී පහර දීමෙන් තුවාල ලැබූ වෑවල, හොරණ ඉසිපතනාරාම විහාරවාසී තම්ජන්තැන්නේ හේමානන්ද (17), ඉදුරුව, අතුරුවැල්ලේ ධර්ම ශ්රී වර්ධනාරාම විහාරවාසී සියඔලාපේ අමිතරංෂි (20) යන භික්ෂූන් වහන්සේලා කළුතර නාගොඩ මහ රෝහලේ ප්රතිකාර ලැබීමෙන් පසු වෑවල, හොරණ ඉසිපතනාරාම විහාරස්ථානයට නැවත පැමිණ තිබෙන බවද බෙන්තොට පොලීසිය වැඩිදුර වාර්තාවක් ඉදිරිපත් කරමින් අධිකරණයට කරුණු වාර්තා කළේය.
ඉදුරුව, අතුරුවැල්ලේ ධර්ම ශ්රී වර්ධනාරාම විහාරස්ථානය, සියම් මහා නිකායේ මල්වතු පාර්ශවය විසින් වෑවල හොරණ ඉසිපතනාරාම විහාරවාසී ගල්තුඩුවේ සුනන්ද ස්වාමින් වහන්සේට පවරා දෙන ලදැයි කියන ලිපියක් හේතුවෙන් පසුගිය 14 දා රාත්රී මෙම ගැටුම ඇති විය.
ගල්තුඩුවේ සුනන්ද හිමියන් තුවාල ලැබූ භික්ෂූන් වහන්සේලා දෙනමත් සමග පැමිණ විහාරස්ථානය සියම් මහා නිකායේ මල්වතු පාර්ශවයට අයත් බව පැවසීමත් අස්ගිරි පාර්ශවයේ පුත්තලම් දිසාවේ සංඝනායක මිගෙට්ටුවත්තේ සුමිත්ත හිමියන් (45), වයඹ පළාතේ සංඝනායක ඉත්තෑපානේ සුමන (68) හිමියන් සමග පැමිණ විහාරස්ථානය සියම් මහා නිකායේ අස්ගිරි පාර්ශවයට විහාරස්ථානය අයත් බව පැවසීමත් මෙම ගැටුමට මූලික හේතුව වි තිබූ බව බෙන්තොට පොලීසිය අධිකරණයට ඉදිරිපත් කරන ලද වැඩිදුර වාර්තාවේ වැඩි දුරටත් සදහන් වේ.
ඉදුරුව, අතුරුවැල්ලේ ධර්ම ශ්රී වර්ධනාරාම විහාරස්ථානයේ අධිපතිව වැඩ සිටි නායක හිමියන් 2013 වර්ෂයේ අපවත් වීමෙන් පසු උන් වහන්සේගේ ශිෂ්ය ගල්තුඩුවේ සුනන්ද හිමියන්ට මෙම විහාරස්ථානය මල්වතු භික්ෂු කාරක සංඝ සභාව විසින් පවරා දි තිබෙන බව වෑවල, හොරණ ඉසිපතනාරාමය කියයි. නමුත් එවකට ගල්තුඩුවේ සුනන්ද හිමියන් උපසම්පදා නොවූ සාමනේර භික්ෂූන් වහන්සේ නමක් ලෙස සිට ඇති අතර ඒ නිසාම එම පවරා දීම ඊට පසු දිනම අවලංගු කර තිබේ.
පසුගිය ජූලි 07 දින ගල්තුඩුවේ සුනන්ද හිමියන් මල්වතු මහා විහාරයේදී උපසම්පදාව ලබා ඇති අතර එහිදී විහාරස්ථානයේ අයිතිය සම්බන්ධයෙන් මෙම ඉල්ලීම නැවත කර තිබෙන අතර එහිදී මල්වතු කාරක සංඝ සභාව විහාරස්ථානය පැවරීමට අදාල මෙම ලිපිය නිකුත් කර තිබෙන බව වෑවල, හොරණ ඉසිපතනාරාමය කියයි. එතෙක් ගල්තුඩුවේ සුනන්ද හිමියන් වෑවල, හොරණ ඉසිපතනාරාමයේ වැඩ වාසය කර තිබෙන අතර ඉදුරුව ධර්ම ශ්රී වර්ධනාරාම විහාරස්ථානයේ විහාරාධිපති ලෙස වැඩ වාසය කර ඇත්තේ ඉත්තෑපාන සුමන හිමියන්ය.
බෙන්තොට පොලිස් ස්ථානාධිපති ප්රධාන පොලිස් පරීක්ෂක තුෂාර කාරියවසම්, උප පොලිස් පරීක්ෂක සජිත් ද සිල්වාගේ මෙහෙයවිම මත උප පොලිස් පරීක්ෂක රන්බණ්ඩා සැකකරුවන් අධිකරණයට ඉදිරිපත් කරමින් නඩු කටයුතු මෙහෙයවීය.
