සූරියවැව නුවන් ජයසේකර –
කලක සිට හම්බන්තොට, අම්බලන්තොට, තිස්සමහාරාම, සූරියවැව ඇතුළු අවට ප්රදේශ රැසකට අයිස් මත් ද්රව්ය බෙදා හැරීමේ ජාවාරමක නිරත වූ හම්බන්තොට මහ රෝහලේ භෞත චිකිත්සකවරයෙකු (අතුරු වෛද්ය) අයිස් මත් ද්රව්ය ග්රෑම් 04යි මිලි ග්රෑම් 500ක් සමග තංගල්ල කොට්ඨාශ දූෂණ මර්ධණ ඒකකයේ නිළධාරීන් විසින් පෙරේදා (05) රාත්රී හම්බන්තොටදී අත්අඩංගුවට ගෙන තිබේ.
මෙලෙස අත්අඩංගුවට පත්ව ඇත්තේ හම්බන්තොට මහ රෝහලේ භෞත චිකිත්සකවරයෙකු ලෙස සේවය කල 40 හැවිරිදි එක් දරු පියෙකි.
සැකකරු සූරියවැව පොල පහළ පදිංචි කරුවෙකු වන අතර දැනට කලක සිට සැකකරු හම්බන්තොට ප්රදේශයේ තාවකාලික පදිංචියේ සිටිමින් මෙම ජාවාරම කරගෙන ගොස් තිබුණි.හම්බන්තොට සාමෝදාගම ප්රදේශයේ අයිස් මත් ද්රව්ය අලෙවි කරන බවට ලද තොරතුරකට අනුව තංගල්ල කොට්ඨාශ දූෂණ මර්ධණ ඒකකයේ නිළධාරීන් කණ්ඩායමක් විසින් වැටලීමක් සිදුකෙරුණි.එහිදි සාමෝදාගම පදිංචි පුද්ගලයෙකු අයිස් මත් ද්රව්ය මිලි ග්රෑම් 570ක් සමග අත්අඩංගුවට ගැණුනු අතර ඔහුගෙන් සිදුකල ප්රශ්න කිරීමේදී එම පුද්ගලයා පොලිසියට පවසා ඇත්තේ හම්බන්තොට මහ රෝහලේ අතුරු වෛද්යවරයෙකු විසින් මෙම ජාවාරම මෙහෙයවන බවයි.
ඒ අනුව හම්බන්තොට දොදොල් කඩ ප්රදේශයේ පිහිටි සැකකාර වෛද්යවරයාගේ නිවස පරීක්ෂා කිරීමේදි ඔහුගේ නිවසේ තිබී අයිස් මත් ද්රව්ය ග්රෑම් 04 යි මිලි ග්රෑම් 500 ක ප්රමාණයක් සමග සැකකරු අත්අඩංගුවට ගෙන තිබේ. එම අවස්ථාවේදීම සැකකරුගෙන් සිදුකල ප්රශ්න කිරීමේදි ලද තොරතුරුවලට අනුව ඇඹිලිපිටිය පදිංචි 38 හැවිරිදි පුද්ගලයෙකු ද අයිස් මත් ද්රව්ය මිලි ග්රෑම් 470 ක් සමග අත්අඩංගුවට ගෙන තිබේ. සැකකරුගෙන් සිදුකල ප්රශ්න කිරීමේදී අනාවරණය වී ඇත්තේ භෞත චිකිත්සක වරයා විසින් කොළඹ මාලිගාවත්ත ප්රදේශයෙන් අයිස් ග්රෑම් 01ක් රුපියල් 13000ක මුදලකට මිලදී ගෙනවිත් හම්බන්තොටදි ග්රෑම් එකක් රුපියල් 25,000ක මුදලකට අලෙවි කරන බවයි.සැකකරුගෙන් සිදුකල ප්රශ්න කිරීමේදී අයිස් මත් ද්රව්ය ජාවාරම සම්බන්ධ තොරතුරු රැසක් අනාවරණය කර ගැනිමට පොලිසිය සමත්ව තිබේ.
අත්අඩංගුවට පත් භෞත චිකිත්සකවරයා ඇතුළු සැකකරුවන් තිදෙනා වැඩිදුර විමර්ශණ කටයුතු සදහා හම්බන්තොට මුලස්ථාන පොලිසියට බාර දී ඇති අතර සැකකරුවන් හම්බන්තොට මහේස්ත්රාත් අධිකරණයට ඉදිරිපත් කිරිමට නියමිතය.
තංගල්ල කොට්ඨාශ භාර ජ්යෙෂ්ඨ පොලිස් අධිකාරී කේ.බි.කීර්තිරත්නගේ උපදෙස් පරිදි තංගල්ල කොට්ඨාශ දූෂණ මර්ධණ ඒකකයේ ස්ථානාධිපති උප පොලිස් පරික්ෂක ජයවිර,පොලිස් සැරයන් වරුන් වන (70223)රසික, (71452)ඉංදික (72939)සංජය, (75587)අමිල හා පොලිස් කොස්තාපල් වරුන් වන (84229)සමන්,(91504)සදරුවන් ඇතුළු නිළධාරීන් කණ්ඩායමක් විසින් මෙම වැටලීම සිදුකර සැකකරුවන් අත්අඩංගුවට ගෙන තිබේ.
