සීදූව වෑත්තෑව නන්දාරාම විහාරස්ථානයේ විහාරාස්ථානාධිපති හිමියන්ව වැඩ විසූ මැදගමුවේ මහානාම හිමියන් ඝාතනය කර තිබේ.
උන්වහන්සේ ඝාතනය කර ඇත්තේ විහාරස්ථානයේ ආවාස ගෙය තුළදී ය.
විමර්ශකයන් පවසන්නේ මෙම ඝාතනය දින කීපයකට ඉහත දී සිදුවී ඇති බවය. දින කීපයක් පන්සල වසා තිබීම නිසා සැක සිතී සොයා බැලූ දායකයින්ට පන්සලේ ආවාස ගෙය දෙසින් දුඟදක් හමන බව දැනී ඒ බව සීදුව පොලිසියට පැමිණිලි කර තිබේ.
මේ පැමිණිල්ලට අනුව සීදුව පොලිසියේ නිලධාරීන් පිරිසක් පැමිණ දුඟද හමමින් ඇති නා හිමියන් වැඩ වසන ආවාසගෙයි දොරගුලු කඩා ඇතුළු වීමේ දි මුහුණ රෙදිවලින් ඔතා සිවුරකින් වසා දැමූ නා හිමියන්ගේ සිරුර හමුවී තිබේ.
පොලිස් විමර්ශකයන් සැක කරන්නේ ගෙල සිරකර නා හිමියන් ඝාතනය කර ඇති බවකි.
50 හැවිරිදි විහාරාධිපති හිමියන් සමග මෙම විහාරස්ථානයේ 18 හැවිරිදි හිමි නමක් ද වැඩ සිට ඇත. පෙරේදා පෙනෙන්නට සිටියත් ඊයේ උදෑසන සිට එම හිමිනම පෙනෙන්නට නොසිටි බවත් විහාරස්ථානය අගුළුලා තිබුණු බවත් ප්රදේශවාසීන් සීදුව පොලිසියට පවසා තිබේ.
පොලිස් විමර්ශකයන් කියන්නේ මෙම 18 හැවිරිදි හිමිනම තමන්ගේ බඩු බාහිර ද රැගෙන විහාරස්ථානයෙන් අතුරුදහන්ව ඇති බවය..
පොලිසිය කියන්නේ මෙම තරුණ හිමියන් හා විහාරාධිපති හිමියන් අතර මුදල් ගනුදෙනු සහ විහාරස්ථානයේ හිමිකම් සම්බන්ධව ඇති වී තිබූ ආරවුල පොලිස් පැමිණිලි දක්වා දුරදිග ගොස් ඇති බවය. එවැනි පැමිණිලි කීපයක් දෙපාර්ශවයෙන්ම සීදුව පොලිසියට පැමිණ තිබුණු ඉතිහාසය ගැන විමර්ශකයන්ගේ විශේෂ අවධානයට ලක් වී තිබේ.
පොලිසිය සැක කරන්නේ මෙම ගෝල හිමියන් අතින් නායක හාමුදුරුවන් ඝාතනය වී ඇති බවකි. දැනට පලා ගොස් ඇති ගෝල හිමියන් සොයා ගැනීමෙන් පසු මෙම ඝාතනයේ මුල මැද අග හෙළිවනු ඇතැයි විමර්ශන අංශ විශ්වාසය පල කරයි.
මේ වනවිට පලාගිය හිමියන් සොයා විශේෂ පොලිස් කණ්ඩායම් දෙකක් විමර්ශන අරඹා ඇත.
.
