ජනාධිපති ගෝඨාභය රාජපක්ෂගේ ප්රධානත්වයෙන් අනිද්දා (23) පැවැත්වෙන සර්ව පාක්ෂික සමුළුවට සහභාගීවනවාද නැද්ද යන්න පිළිබඳව අද (21) වනවිටත් නිශ්චිත එකඟතාවයකට එළඹීමට ප්රධාන විපක්ෂයවන සමගි ජන බලවේගයට බැරි වී ඇතැයි වාර්තා වේ.
මේ සඳහා බලපා ඇති ප්රධානම හේතුව වන්නේ සර්ව පාක්ෂික සමුළුව නියෝජනය කළ යුතු බවට මෙන්ම එම සමුළුව නියෝජනය නොකළ යතු බවට පක්ෂ අභ්යන්තරයේ මත දෙකක් මතුවීම බව සමගි ජන බලවේගයේ අභ්යන්තර ආරංචි මාර්ග ලංකාසරට පැවසීය.
කෙසේ වෙතත් මේ සම්බන්ධව සාකච්ඡා කර තීරණයක් ගැනීමට තම පක්ෂයේ කෘත්යාධිකාරී මණ්ඩලයේ සාකච්ඡාවක් අද (21) පැවැත්වෙන බව ද එම ආරංචි මාර්ග සදහන් කළේය.
රට මෙවැනි විනාශයකට තල්ලු නොවී සිටීමට අවශ්ය යෝජනා සහ අදහස් සමගි ජන බලවේගය මීට දිගු කාලයක සිට ඉදිරිපත් කළ ද ආණ්ඩුවේ අවධානය ඊට යොමු නොකර හදිසියේ සර්ව පාක්ෂික සමුළුවක් කැඳවා ආණ්ඩුවේ නොහැකියාව වසා ගැනීමට උත්සාහ කරන බව සමගි ජන බලවේගයේ ප්රධානම මතය වී ඇතැයි දැනගන්නට ඇත. සර්ව පාක්ෂික සමුළුව හුදෙක් මීඩියා ෂෝ එකක් බවත් එවැනි සමුළුවකට සහභාගී වීමෙන් කිසිම පලක් නැති බවත් පක්ෂයේ බොහෝ මන්ත්රීවරුන්ගේ මතය වී ඇතැයි වාර්තා වේ
කෙසේ හෝ නායක සජිත් ප්රේමදාස සහ කෘත්යාධිකාරී මණ්ඩලය ගන්නා තීන්දුව මත අවශ්ය ක්රියාමාර්ගය තීරණය වනු ඇතැයි ද එම ආරංචි මාර්ග හෙළිදරවු කළේය.
මේ අතර සර්ව පාක්ෂික සමුළුව වර්ජනය කිරීමට ජනතා විමුක්ති පෙරමුණ ඍජු තීන්දුවක් ගෙන ඇත. ආණ්ඩුව නියෝජනය කරන පක්ෂ 10ක් සමුළුව වර්ජනය කිරීමට තීරණය කර තිබුණ ද ශ්රී ලංකා නිදහස් පක්ෂය නිසා එම තීරණය වෙනස් කර නියෝජිතයන් දෙදෙනෙක් සමුළුවට සහභාගී කරවීමට තීරණය කර ඇත.
ඒ අනුව අතුරලියේ රතන හිමියන් සහ මහාචාර්ය තිස්ස විතාරණ ඊට එක් වනු ඇත.
සර්ව පාක්ෂික සමුළුව සඳහා එක්සත් ජාතික පක්ෂය, දෙමළ ජාතික සන්ධානය, ශ්රී ලංකා නිදහස් පක්ෂය සර්ව පාක්ෂික සමුළුව නියෝජනය කිරීමට තීරණය කර තිබේ.
