මේ වනවිට සමාජ මාධ්යයන්හි දැඩි අවධානයට ලක් වී ඇති ශ්රී ලාංකිකයෙකු පිලිපීන ජාතිකයෙකුට පහර දෙන ආකාරය දැක්වෙන වීඩියෝව මීට වසරකටත් වඩා පෙර සිදුවූ සිද්ධියක් බවත් එම සිද්ධියට අදාලව සැකකරුවන් අත් අඩංගුවට ගෙන අවශ්ය සියලුම නෛතික පියවර ගෙන ඇති බවත් පොලිසිය නිවේදනයක් නිකුත් කරමින් පැහැදිලි කරයි.
පොලිසිය අවධාරණය කරන්නේ , සැකකරුවන් අත්අඩංගුවට ගෙන නීතිමය පියවර ගෙන ඇති සිදුවීම් මෑතකදී සිදු වූ සිද්ධීන් ලෙස නිරූපණය කර හිතා මතාම රටේ කීර්ති නාමයට කැළලක් ඇති කිරීමේ අරමුණින් ප්රචාරය කරන පුද්ගලයින්ට එරෙහිව විමර්ශනය කර අවශ්ය නීතිමය පියවර ගන්නා බවය.
පොලිස් මාධ්ය අංශය නිකුත් කළ නිවේදනයක දැක්වෙන්නේ අදාළ වීඩියෝව 2024 පෙබරවාරි මස 14 වැනිදා වැලිගම පොලිස් කොට්ඨාසය තුළ සිදු වූ සිදුවීමක් බවය.
පිලිපීන ජාතිකයෙකු වැලිගමට ගිය අවස්ථාවේදී ශ්රී ලාංකිකයෙකු විසින් තමාට පහර දුන් බවට චෝදනා කරමින් වැලිගම පොලිස් ස්ථානයට පැමිණිල්ලක් ඉදිරිපත් කර තිබී ඇත. ගැටුමට මුල් වී ඇත්තේ වැලිගම පොල්හේන වෙරළේ සර්ෆ් පුහුණු මධ්යස්ථානයක දර්ශන පටිගත කරමින් සිටියදී, එම මධ්යස්ථානයේ සේවකයෙකු එයට විරුද්ධ වෙද්දී එම දර්ශන පටිගත කිරීම හේතුවෙන් ඇති වූ ගැටුමක් බව විමර්ශනවලදී අනාවරණය වී තිබේ.
සිද්ධිය වූ දිනයේම වැලිගම පොලිසියේ නිලධාරීන් විසින් පහරදීම සම්බන්ධයෙන් පොල්හේන ප්රදේශයේ පදිංචි 24 හැවිරිදි සැකකරු අත්අඩංගුවට ගෙන ඔහු මාතර මහේස්ත්රාත් අධිකරණයට ඉදිරිපත් කර ඇත.
නඩුව 2025 සැප්තැම්බර් 11 වන දින නැවත විභාගයට ගැනීමට නියමිතය.
රටට පැමිණෙන විදේශීය ජාතිකයින් මුහුණ දෙන ගැටලු සහ හිරිහැර සම්බන්ධයෙන් පොලිස් ස්ථානවලට වාර්තා වන පැමිණිලි සහ සමාජ මාධ්යවල සංසරණය වන වීඩියෝ සම්බන්ධයෙන් අවශ්ය පියවර ගැනීමට කටයුතු කරන බව ද පොලිසිය අවධාරණය කර ඇත.
