දිනසේන රතුගමගේ –
අසනීපයෙන් හා වයෝවෘද්ධභාවයෙන් සිටින ආර්.සම්පන්ධන් මන්ත්රීවරයා දෙමළ ජාතික සන්ධානයෙන් ඉවත් විය යුතු බවට එම පක්ෂයේ මන්ත්රී එම්.ඒ.සුමන්තිරන් මන්ත්රීවරයා කළ ප්රකාශයක් නිසා පක්ෂය තුළ විශාල මතභේදාත්මක තත්ත්වයක් හටගෙන තිබේ.
සුමන්තිරන් මන්ත්රීවරයා එම ප්රකාශය කොට ඇත්තේ පෞද්ගලික රූපවාහිනී නාලිකාවක් සමග පැවති සාකච්ඡාවකදීය.
එහිදී අදහස් දැක්වූ සුමන්තිරන් මන්ත්රීවරයා පාර්ලිමේන්තුව පවත්වන ලද දින 288 කින් සම්පන්ධන් මන්ත්රීවරයා පාර්ලිමේන්තුවට සහභාගී වී ඇත්තේ දින 39 ක් පමණක් බවද ප්රකාශ කොට තිබේ.
මෙම පැමිණීම ප්රතිශතයක් වශයෙන් සලකා බලන විට 13.6 % බව පවසන සුමන්තිරන් මන්ත්රීවරයා සම්පන්ධන් මන්ත්රීවරයා එවැනි අඩු සහභාගිතවයකින් පාර්ලිමේන්තුවට පමිණියද ඒ වෙනුවෙන් ඔහුට රුපියල් ලක්ෂ හතළිහක මුදලක් වැටුප් වශයෙන් ගෙවා ඇති බවද සදහන් කොට ඇත.
ඊට අමතරව ඉන්ධන දුරකතන හා වෙනත් දීමනා වෙනුවෙන් සම්පන්ධන් මන්ත්රීවරයාට රුපියල් හාරලක්ෂ දහනව දහසක් ලබා දී ඇති බව පවසන සුමන්තිරන් මන්ත්රීවරයා ඔහු අඩු සහභාගිත්වයකින් පාර්ලිමේන්තුව නියෝජනය කිරීම ගැන සෙසු මන්ත්රීවරුන් සිටින්නේ දැඩි කනස්සල්ලෙන් බවද පෙන්වා දී තිබේ.
සුමන්තිරන් මන්ත්රීවරයා තමන්ගේ පෞද්ගලික අදහස වශයෙන් ඉදිරිපත් කරනු ලබන යෝජනාව වන්නේ සම්පන්ධන් මන්ත්රීවරයා දෙමළ ජාතික සන්ධානයෙන් ඉවත් වී එහි නායකත්වය වෙනත් අයෙකුට ලබා දීම පමණක් බවද ප්රකාශ කොට තිබේ.
සම්පන්ධන් මන්ත්රීවරයාගේ අසනීප තත්ත්වය හා වයෝවෘද්ධභාවය නිසා සිදුවන අතපසුවීම් සම්බන්ධයෙන් පක්ෂය වෙනම ක්රියා මාර්ග අනුගමනය කරණ බවද ඔහු සඳහන් කොට ඇත.
සුමන්තිරන් මන්ත්රීවරයාගේ මෙම ප්රකාශයෙන් පසුව දෙමළ ජාතික සන්ධානයේ බොහෝ මන්ත්රීවරු සුමන්තිරන් මන්ත්රීවරයා සම්බන්ධයෙන් විවිධ විවේචනයන් එල්ල කරන්නට පටන් ගෙන තිබේ.
දෙමළ ජාතික සන්ධානයේ පහල පෙළ මන්ත්රීවරු ප්රකාශ කොට ඇත්තේ පක්ෂයේ නායකයා සම්බන්ධයෙන් ප්රසිද්ධියේ මෙවැනි ප්රකාශයක් කිරීම සම්බන්ධයෙන් සුමන්තිරන් මන්ත්රීවරයාට එරෙහිව නීතිමය හා පක්ෂ ව්යවස්ථාවට අනුව තීන්දුවක් ගත යුතු බවය.
