සමගි ජන බලවේගයේ ඉතිරි ජාතික ලැයිස්තු මන්ත්රී ධුර සඳහා නම් කරන පුද්ගලයින් සම්බන්ධයෙන් වන අවසන් තීරණය අද (22) දිනයේ ගැනීමට නියමිතව එම පක්ෂයේ ජ්යෙෂ්ඨ ප්රකාශකයෙකු සඳහන් කළේය.
සමගි ජන බලවේගය පක්ෂය සඳහා ජාතික ලැයිස්තු මන්ත්රී ධුර 5ක් හිමිවු අතර මේ වනවිටත් ඉන් එක් මන්ත්රී ධුරයක් සඳහා එහි මහලේකම් රංජිත් මද්දුම බණ්ඩාර දිවුරුම්දී තිබේ.
ඒ අනුව ඉතිරි ජාතික ලැයිස්තු මන්ත්රී ධුර 4 සඳහා වන නම් අද දිනයේ මැතිවරණ කොමිෂන් සභාව වෙත යොමු කරන බව එම ප්රකාශකයා වැඩිදුරටත් පැවසීය.
මේ වනවිට සමගි ජන බලවේගය ගොඩනැගීම සඳහා මුල් වුන පක්ෂ සමූහය සහිත සමගි ජන සන්ධානයේ පක්ෂ කීපයක් ස්වකීය පක්ෂ වෙනුවෙන් ජාතික ලයිස්තු මන්ත්රී ධූර අපේක්ෂාවෙන් පසුවේ. පාර්ලිමේන්තු මන්ත්රි මනෝ ගනේෂන්ගේ නායකත්වයෙන් යුතු ප්රජාතන්ත්රවාදී ජනතා පෙරමුණ, පලනි දිගම්බරම්ගේ නායකත්වයෙන් යුතු කම්කරු ජාතික සංගමය සහ වී. රාධාක්රිෂ්ණන්ගේ නායකත්වය දරන කඳුරට ජනතා පෙරමුණ දෙමළ ප්රගතිශීලී සන්ධානය ලෙස සමගි ජන බලවේගයට එක් වි සිටි අතර මනෝ ගනේෂන්ගේ කණ්ඩායම ඔහු වෙනුවෙන් දැනටමත් ජාතික ලයිස්තු ආසනයක් ඉල්ලා තිබේ.
එමෙන්ම හිරුණිකා ප්රේමචන්ද්ර මීට දින දෙකකට පෙර මාධ්ය සාකච්ඡාවක් කැඳවා ජාතික ලයිස්තු මන්ත්රී ධූරයක් සඳහා ඇති තමන්ගේ සුදුසුකම කියා පෑවාය. හර්ෂ ද සිල්වා ඊයේ පාර්ලිමේන්තුවේ දී පැවසුවේ ඉරාන් වික්රමරත්න, හිරුණා ප්රේමචන්ද්ර, ජාතික ලයිස්තුවෙන් පාර්ලිමේන්තුවට පැමිණීමට සුදුසු බවය
ඒ අතර ඩලස් අලප්පෙරුම, ජී.එල් පිරිස්, සමගි ජන බලවේගයේ සභාපති ඉම්තියාස් බකීර් මාකර්, ජාතික සංවිධායක ලෙස කටයුතු කළ සුජීව සේනසිංහ වැනි පිරිසක් ද මෙම මන්ත්රීධූර අපේක්ෂාවෙන් පසුවෙත්.
