ජාතික ජන බලවේගයේ පාර්ලිමේන්තු මන්ත්රී හිටපු කථානායක අශෝක රන්වල විසින් පසුගිය 11 වැනිදා රාත්රියේ සිදුකළ රිය අනතුර සම්බන්ධයෙන් පොලිසිය රාජකාරී පැහැර හැර ඇතැයි මූලික විමර්ශනයේදී අනාවරණය වූ බවත්, රාජකාරී පැහැරහැරීමක් සිදුකර ඇති නිලධාරීන්ට එරෙහිව දැඩි විනය ක්රියාමාර්ග ගැනීමට පොලිස්පතිවරයා උපදෙස් ලබාදී ඇති බවත් පොලිස් මාධ්ය කොට්ඨාසය අද (18) නිවේදනය කළේය.
මෙම සිද්ධියට අදාලව සපුගස්කන්ද පොලිස් නිලධාරීන් නිසි පරිදි රාජකාරී කටයුතු සිදුකර ඇත්තේද යන්න පිළිබඳව සෙවීම සඳහා පොලිස්පතිවරයාගේ නියමයෙන් රථවාහන පාලන හා මාර්ග ආරක්ෂාව දිසාව භාර නියෝජ්ය පොලිස්පති W.P.J. සේනාධීර විමර්ශනයක් සිදුකර එහි වාර්තාව පොලිස්පති ප්රියන්ත වීරසූරිය වෙත භාර දී ඇතැයි වාර්තා වේ.
අදාළ විමර්ශනයේදී හෙළිවී ඇත්තේ, ඉකුත් 11 වනදා රාත්රී 7.25ට පමණ අනතුර සිදුව ඇති අතර ඉන් විනාඩි 25කට පසුව එනම් රාත්රී 7.50ට පමණ සපුගස්කන්ද පොලිසියේ සැරයන්වරයෙකු අදාළ ස්ථානයට ගොස් ඇති බවය.
අනතුරුව සපුගස්කන්ද පොලිසියේ ස්ථානාධිපතිවරයා හා රථවාහන අංශයේ ස්ථානාධිපතිවරයා එම ස්ථානයට පැමිණ ඇත්තේ රාත්රී 8.00ට පමණ බවත් ඒ වනවිටත් රන්වල මන්ත්රිවරයා හා ඔහු අනතුරට ලක් කිරීමෙන් තුවාල ලැබූ දරුවා හා කාන්තාවන් දෙදෙනා එම ස්ථානයේ සිට නොමැති බවත් අනාවරණය වී තිබේ.
එදින රාත්රී 9.30ට පමණ අනතුර සිදු වූ ස්ථානයට ගිය සපුගස්කන්ද පොලිසියේ සැරයන්වරයා කිරිබත්ගොඩ රෝහලට ගොස් ඇති අතර ඔහු එහි ගේට්ටුව අසල සිටි ආරක්ෂක නිලධාරියෙකුගෙන් අනතුර සම්බන්ධයෙන් විමසා, රෝහල් ගතකළ පිරිස වැඩිදුර ප්රතිකාර සඳහා කොළඹ ජාතික රෝහලට මාරුකර යවා ඇතැයි ආරක්ෂක නිලධාරියා කී කතාව අසාගෙන වෙනත් වගකිවයුතු කිසිවෙකුගෙන් විමසීමක් එතැනින් පිටව ඇති බව සිදුකළ විමර්ශනයේදී හෙළිවී ඇත.
අශෝක රන්වල කිරිබත්ගොඩ රෝහලෙන් පිටවී ගොස් ඇත්තේ රාත්රී 10.35ට පමණය. එම ස්ථානයට අදාල පොලිස් සැරයන්වරයා පැමිණ ඇති නමුත් අනතුරට ලක් වූ අයගේ ඥාතීන් විසින් ඇතිකළ විරෝධය නිසා තත්ත්වය උණුසුම් වෙත්ම පැමිනි රාජකාරිය පසෙක දමා සැරයන්වරයා හැරී ගොස් ඇතැයි විමර්ශනයේ දී අනාවරණය වී තිබේ.
මන්ත්රීවරයා රෝහල්ගතව සිටීම හේතුවෙන් ඔහු මත්පැන් පානය කර සිටියේද නැද්ද යන්න පිළිබඳව පරීක්ෂා කිරීම සඳහා භාවිත කරනු ලබන බීමත්කම පරීක්ෂා කරන නල පිම්බීමට ලබාදීමට පොලිසියට නොහැකි වී ඇති බව ද අදාළ වාර්තාවේ දැක් වේ.
එහෙත් එවැනි අවස්ථාවක පොලිසිය විසින් භාවිත කරනු ලබන අධිකරණ වෛද්ය පෝරමයවත් කිරිබත්ගොඩ රෝහලේදී සපුගස්කන්ද පොලිසියෙන් ලබාදීමක් කර නොමැත. එය ඔහුට ලබාදී ඇත්තේ අනතුර සිදුවීමෙන් පසුදින කොළඹ ජාතික රෝහලේ රෝහල් පොලිසිය විසිනි.
ඉන් අනතුරුව ඔහුගේ රුධිර හා මුත්රා සාම්පල ලබාගෙන ඇති බව වාර්තා වේ.
විමර්ශන සඳහා සපුගස්කන්ද පොලිසියේ ස්ථානාධිපතිවරයා හෝ රථවාහන අංශයේ ස්ථානාධිපතිවරයා අවම වශයෙන් කිරිබත්ගොඩ හෝ කොළඹ ජාතික රෝහලට ගොස් නොමැති බවත් පසුදින රන්වල මන්ත්රීවරයා අත්අඩංගුවට ගෙන ඇත්තේ පොලිස්පතිවරයාගේ සෘජුව මැදිහත්වීමෙන් බවත් සිදුකළ විමර්ශනයේදී බව ද වාර්තා වේ.
රිය අනතුරෙන් පසුව රන්වල මන්ත්රීවරයා මත්පැන් පානය කර ඇති බවට විවිධ පිරිස් චෝදනා කිරීම, ඔහු විසින් අනතුරට ලක් කළ තිදෙනෙකු රෝහල්ගතව සිටීම වැනි තත්ත්වයකදී නියත වශයෙන්ම ඔහුව අත්අඩංගුවට ගැනීමට සපුගස්කන්ද පොලිසිය කටයුතු කළ යුතු වූවද එසේ සිදුකර නොමැති බවත් පොලිස්පතිවරයාට ලබාදුන් වාර්තාවේ සඳහන් වේ.
අදාළ විමර්ශනයේදී නිරීක්ෂණය වී ඇත්තේ සපුගස්කන්ද පොලිස් ස්ථානාධිපතිවරයා, අනතුර සම්බන්ධව විමර්ශනය කළ රථවාහන අංශයේ ස්ථානාධිපති හා සපුගස්කන්ද පොලිස් ස්ථානය අධීක්ෂණය කරනු ලබන ජ්යෙෂ්ඨ පොලිස් අධීකාරීවරයා හා දිස්ත්රික්භාර නිලධාරීන් රාජකාරී පැහැරහැරීමක් සිදුකර ඇති බවය.
ඒ අනුව අදාළ නිලධාරීන්ට එරෙහිව පොලිස් විශේෂ විමර්ශන ඒ්කකය මඟින් මූලික විමර්ශනයක් ආරම්භ කර දැඩි විනය ක්රියාමාර්ග ගැනීමට පොලිස්පතිවරයා උපදෙස් ලබාදී ඇති බව පොලිසි මාධ්ය ප්රකාශක කොට්ඨාසය පවසයි.
අශෝක රන්වල මන්ත්රීවරයාගේ රිය අනතුරට අදාළ නඩුව හෙට (19) මහර මහේස්ත්රාත් අධිකරණයේදි කැඳවිමට නියමිතය.
