සංවිධානාත්මක අපරාධ කල්ලි මගින් සිදුකරන අපරාධ සමස්ත සමාජයටම බරක් වී ඇති බැවින් එම ව්යසනකාරී තත්ත්වය මර්ධනය කිරීම සඳහා අදාල පුද්ගලයින්ට එරෙහිව තරාතිරම නොබලා කටයුතු කරන ලෙසත්, එවැනි අපරාධකරුවන් සමාජයෙන් ඉවත් කිරීමට පියවර ගන්නා ලෙසත් මහජන ආරක්ෂාව පිළිබඳ අමාත්ය ටිරාන් අලස් පොලිස්පතිවරයා ඇතුළු ජ්යෙෂ්ඨ පොලිස් නිලධාරීන් එම අමාත්යාංශයට ගෙන්වා ඊයේ (16) නියෝග කළත් පාතාලයේ අපරාධ කරුවන්ට රැකවරණය සපයමින් අපරාධවලට අවස්ථාව ලබා දෙන සමහර කුප්රකට පොලිස් නිලධාරීන් සම්බන්ධවවත් රටේ නීතිය ක්රියාත්මක නොවන බව පොලිසියේ අභ්යන්තර ආරංචි මාර්ග පවසයි.
ආසන්නම උදාහරණය වෙන්නප්පුවෙන් වාර්තාවන බවත්, සාදයක දී පොලිස් රැකවරණය මැද පැමිණි පාතාල අපරාධකරුවෙක් තරුණයෙකුට තියුණු ආයුධ ප්රහාරයක් එල්ල කර බරපතල තුවාල සිදුකළ සිද්ධියට සම්බන්ධ පෑලියගොඩ අපරාධ කොට්ඨාසයේ පොලිස් පරීක්ෂකවරයා අත්අඩංගුවට ගැනීමට තවමත් පොලිසියට නොහැකි වී තිබෙන බව වාර්තා වේ.
මෙම පොලිස් නිලධාරියා සහ පාතාල අපරාධකරු සම්බන්ධ ඉදිරි විමර්ශන සඳහා වෙන්නප්පුව පොලිසියට දැඩි බලපෑම් ඉහළ පොලිස් නිලධාරීන් පිරිසකගෙන් එල්ල වෙමින් ඇති බව ද මෙම චූදිත පොලිස් නිලධාරියා ඉහළ නිලධාරීන් පිරිසකගේ රැකවරණය මත සිටින බව ද පොලිසියේ අභ්යන්තර ආරංචි මාර්ග පවසයි.
බස්නාහිර පළාත් උතුරු අපරාධ කොට්ඨාසයට අනුයුක්තව රාජකාරි කරන පොලිස් පරීක්ෂක ගිහාන් මනෝහර නැමැති මෙම පොලිස් නිලධාරියා කටුනායක වෙළෙඳ කලාපයේ කප්පම් ලබා ගැනීමේ අපරාධය මෙහෙයවන පොඩි කුමාර නැමැති පාතාල අපරාධකරු සහ පාතාලයට සම්බන්ධ තවත් පිරිසක් සමග පසුගිය 12 වැනිදා ඇලුයම වෙන්නප්පුව නයිනමඩමේ ශාන්ත තෙරේසා මාවතේ පිහිටි මූන් ලයින් ඔරෙල්ලා හෝටලයේ සාදයකට සහභාගී වී සිටිය දී ප්රශ්නගත අපරාධය සිදුවී තිබේ.
එහිදී බීමත්ව නටමින් සිටි පොලිස් නිලධාරියාගේ ඇඟේ හැපී ඇති තරුණයෙකුට එම පොලිස් නිලධාරියා පහර පිට පහර දෙන ආකාරයත්, අනතුරුව ඔහු සමග සිටි පාතාල අපරාධකරු බෝතලයක් රැගෙන තරුණයාගේ හිසට ගසා කැඩී ගිය තියුණු කොටසෙන් ඔහුගේ ඉණ ප්රදේශයට අනින ආකාරයත් සීසීටීවී දර්ශනවල සටහන් වී තිබෙන බව විමර්ශන අංශ කියයි.
මෙම ප්රහාරයට ලක් වී ඇත්තේ ප්රදේශයේ ව්යාපාරිකයෙක් මෙන්ම ශ්රී ලංකා නිදහස් පක්ෂයේ හිටපු ප්රාදේශීය සභා මන්ත්රීවරයෙකුගේ පුත්රයෙක් වන, අංක 86, ලන්සිගම, කටුනේරිය, පදිංචි එන්.එස්.ක්රිෂේන් ප්රනාන්දු නැමැති තරුණයෙකි. ඔහු තවමත් රෝහල් ගතව ප්රතිකාර ලබමින් ඇත.
කෙසේ වෙතත් ඉහළ පොලිස් නිලධාරීන් හා සම්බන්ධකම් පවත්වන මෙම නිලධාරියා මෙම පාතාල අපරාධකරු සිටියේ එවැනි උසස් නිලධාරියෙකුගේ අවශ්යතාවයකට ද යන්න පිළිබඳ ගැටලුවක් ඇති බව විමර්ශන අංශ කියයි.
මින් පෙර මිනුවන්ගොඩ ප්රදේශයේ දී පොලිස් වෙඩිපහරට ලක් වී මිය ගිය පාතාල අපරාධකරුවන් දෙදෙනා සමග ද මෙම පොලිස් නිලධාරියා සම්බන්ධතා පවත්වා ඇතැයි එම ආරංචි මාර්ග හෙළි කරයි.
ඉදිරි විමර්ශන කටයුතු පවත්වාගෙන යෑමට පොලිසිය තුළින්ම බාධා ඇතිවෙමින් පවතින පසුබිමක මෙම නිලධාරියා රටින් පිටවීම වැළැක්වීම සඳහා පොලිස් විමර්ශන අංශ තහනම් නියෝගයක් ලබාගෙන ඇත.
කෙසේ වෙතත් සංවිධානාත්මක අපරාධ මර්ධනය කිරීම සඳහා නියෝග දීමට ඊයේ ඇමතිවරයා විසින් මහජන ආරක්ෂාව පිළිබඳ අමාත්යාංශයට කැඳවූ උසස් නිලධාරීන් අතර පොලිස්පති සී.ඩී.වික්රමරත්න, බස්නාහිර පළාත් භාර ජේෂ්ඨ නියෝජ්ය පොලිස්පති දේශබන්දු තෙන්නකෝන් , පොලිස් විශේෂ කාර්ය බලකායේ අණදෙන නිලධාරි නියෝජ්ය පොලිස්පති වරුණ ජයසුන්දර, විශේෂ කාර්යංශයේ නියෝජ්ය පොලිස්පති ධනපාල, අපරාධ පරීක්ෂණ දෙපාර්තුමේන්තුවේ නියෝජ්ය පොලිස්පති ප්රසාද් රණසිංහ, කොළඹ අපරාධ කොට්ඨාසයේ අධ්යක්ෂක සහාකාර පොලිස් අධිකාරී නෙවිල් ද සිල්වා සහ අමාත්යංශ සම්බන්ධීකරණ කොට්ඨාසයේ සහාකාර පොලිස් අධිකාරී සුමිත් ගුණරත්න ඇතුළු පිරිසක් වූහ.
