ශ්රී ලංකාව සමග පැවැත්වෙන තරග තුනකින් සමන්විත විස්සයි20 තරගාවලියේ අවසන් තරගය අද පස්වරු 07 ආරම්භ වීමට නියමිතය.
පූර්ණ තරගාවලි ජයග්රහණයක් අපේක්ෂාවෙන් තරග වදින ඉන්දියාව ලංකාවට ගෞරවය වෙනුවෙන් සටන් කිරීමේ අවස්ථාව ලබා දී තිබේ.
ධර්මසාලාහිදී කඩුලු 7ක ජයග්රහණයක් වාර්තා කරමින් තරගාවලිය 2-0ක් ලෙස ඊයේම ජයග්රහණය කිරීමට සත්කාරක ඉන්දියානුවෝ සමත් වූහ. ක්රික් ඉන්ෆො වෙබ් අඩවිය දක්වා ඇති ආකාරයට මෙම තරගය ශ්රී ලංකාව ජයගහ්රණය කිරීමේ සම්භාවිතාව සියයට 14කි.
ශ්රී ලංකාව විස්සයි විස්ස ආකෘතියේ විචක්ෂණ ක්රීඩා විලාශයක් මෑතක දී පෙන්වා නැත. ඔවුන් ඔවුන්ගේ අවසන් විස්සයි විස්ස තරඟ හතෙන් ජයග්රහණ කර ඇත්තේ එක් තරගයක් පමණි. හයකම අමිහිරි පරාජයම අත්වින්දහ.
තුන්වැනි විස්සයි20 තරගයට පිවිසීමේදී කමිල් මිෂාර වෙනුවට නිරෝෂන් දික්වැල්ල කණ්ඩායමට ඇතුළත් කළ හැකි අතර පිතිකරණයේ දී පැතුම් නිශ්ශංක, දසුන් ශානක සහ චරිත් අසලංකගේ අත්දැකීම් මත විශ්වාසය තැබීමට සිදුවී තිබේ. ධර්මසාලාවේ දී මෙන් දුර්වල පන්දු රැකීම, ඉලක්කකින් තොර පන්දු යැවීම මෙන් උඩ පන්දු අත්හැරීම සිදුවන්නේ නම් මේ තරගය ඉන්දියාවට වඩාත් පහසු වනු ඇත. එක් ලකුණක් වළක්වා ගත නොහැකි වීමේ වටිනාකම ලකුණකින් ඔබ්බට යන බවත් එහි දී පන්දුවට පහර දෙන්නා තුළ ඇතිවන විශ්වාසය මෙන්ම පීඩනය ලිහිල් වීම තරගයට තීරණාත්මක බලපාන බවත් ක්රිකට් ප්රවීනයෝ පෙන්වා දෙති.
අනෙක් අතට ඉන්දියාව දෙවැනි විස්සයි20 තරගයෙන් කඩුලු 7ක විශිෂ්ට ජයක් වාර්තා කළේය.
ආරම්භක පිතිකරුවන් වන රෝහිත් ශර්මා සහ ඉෂාන් කිෂාන් වේලාසනින් දැවී ගියත් සෙසු ක්රීඩකයෝ ඉන්දීය බලාපොරොත්තු ඉටු කළහ.
තරඟාවලිය අතැතිව සිටින ඉන්දීය කණ්ඩායම, වෙනස්කම් කිහිපයක් සිදු කළ හැකි අතර, හර්ෂල් පටෙල් සහ යුස්වේන්ද්ර චාහල් වෙනුවට වේග පන්දු යවන ක්රීඩක මොහොමඩ් සිරාජ් සහ දඟ පන්දු යවන ක්රීඩක රවී බිෂ්නෝයි ඇතුළත් විමට ඉඩ ඇති බව විදෙස් ආරංචි මාර්ග කියයි.
