ශ්රියානි විජේසිංහ –
වෘත්තිකයන්ට පයින් ගැසූ ආන්ඩුවලට හැමදාම අත්වුයේ කුණු බක්කිය බවත් මේ ආණ්ඩුවටත් වෘත්තිකයන්ට කන්නොදීමෙන් අනාගතයේදී සිදුවන්නේ කුණු බක්කියට වැටෙන්නට බවත් වෘත්තීයවේදීන්ගේ වෘත්තීය සමිති සන්ධානය පවසයි.
ජනවාරි 01 දා වන විට රජය පාර්ශ්වයෙන් බදු සංශෝධනයන් වහාම ප්රකාශයට පත්විය යුතු බවත් එසේ නොවුවහොත් නව ආණ්ඩුවක් බලයට ගෙනැවිත් හෝ වෘත්තිකයන් ඇතුළු සමස්ත ජනතාවට සිදුවන අසාධාරණයන්ට විසදුම් ලබා ගැනීමට කටයුතු කරන බවත් සන්ධානයේ සාමාජික වෛද්ය හරිත අලුත්ගේ පැවසුවේය.
වෘත්තිකයන්ගෙන් වසරක කාලයක් සදහා උපයන විට බද්ද ලෙස රුපියල් බිලියන 100ක් එකතු කර ගැනීමේ බලාපොරොත්තුව වූ වද මේ වන විට බිලියන 140ක මුදලක් එකතු කර ඇතැයි ද තවදුරටත් වෘත්තියන්ගෙන් බදු ලෙස උපයා ගැනීම කොතරම් අසාධාරණ දැයි තමා විමසන්නේ යැයි ද වෛද්ය අලුත්ගේ කියයි.
මේ වන විට රජයට දේශීය ආදායම් දෙපාර්තමේන්තුව, සුරාබදු දෙපාර්තමේන්තුව සහ රේගුවෙන් අයවිය යුතු බදු මුදල රුපියල් බිලියන 917ක් බව පාර්ලිමේන්තු කාරක සභාවේදී හෙළි වුවද එම මුදල් අයක කර ගැනීමට කටයුතු නොකරන ආණ්ඩුව වෘත්තිකයන් තව දුරටත් තලා පෙලා දැමීම මොනතරම් අසාධාරන යැයිද වෛද්ය හරිත අලුත්ගේ විමසා සිටියේය.
මේ රටේ වෘත්තිකයන්ව නැවත වරක් පාරට කැන්දන ස්වාභාවයක් බලධාරීන්ගේ පැත්තෙන් පෙනෙන්නට තිබෙන බවත් වෘත්තීයවේදීන්ගේ වෘත්තීය සමිති එකමුතුව යම් ඉඟි සහිතව ජනාධිපතිවරයාට මේ පිළිබඳව ලිඛිතව දැනුම්වත් කිරීමට තීරණය කළ බවත් එම සංධානය වැඩිදුරටත් කීවේය.
