මනම්පිටිය නිමල් ජයරත්න –
වී වලට නිසි මිළක් ලබාදෙන ලෙසට හා වී මිළදී ගැනීමට රජය මැදිහත්වන ලෙසට බල කරමින් දම්මින්න මහවැලි කොට්ටාසයේ ගොවීහු අරලගංවිල – දම්මින්න ප්රධාන මාර්ගය හරස් කරමින් 13 වෙනිදා උද්ඝෝෂණයක නිරත වූ ගොවීහු කෘෂිකර්ම අමාත්ය මහින්ද අමරවීරගේ පඹයෙක් පුලුස්සා දමමින් උද්ඝෝෂණයක නිරත වූහ.
අරලගංවිල – දම්මින්න ප්රධාන මාර්ගයේ දිවුල්දමන මංසන්ධියට එක්වූ දම්මින්න මහවැලි කොට්ටාසයට අයත් ගම්මාන රැසක ගොවි ගෙවිලියන් එම ප්රධාන මාර්ගය හරස් කොට කියා සිටියේ, මෙවර යල කන්නයේ තමන් විසින් නෙලා ගන්නා ලද වී අස්වනු වලට නිසි මිළක් ලබාදෙන ලෙසය. රජය මැදිහත් වී තම වී අස්වනුවලට සාධාරණ මිලක් ලබා දෙන ලෙස ගොවීහු ඉල්ලා සිටියහ.
පොළොන්නරුව මහවැලි බි කලාපයේ මෙවර යල කන්නයේ ගොවි පවුල් 25,000 කට වැඩි පිරිසක්, අක්කර 65,000 කට වැඩි ප්රමාණයක් වී වගා කර තිබෙන අතර, ඉන් සියයට අසුවක් පමණ වී අස්වනු නෙලා අවසන් බවත්, පොළොන්නරුවේ මහා පරිමාණ වී මෝල් හිමියන් ගම්මානවලට පැමිණ අසරණ ගොවියන්ගේ වී අස්වනු තුට්ටු දෙකට ලබාගනිමින් සිටින බවත්, මේ පිළිබඳ රජය කිසිදු වචනයක්වත් කතා නොකරන බවත් උද්ඝෝෂකයෝ මෙහිදී චෝදනා කළහ.
මෙම උද්ඝෝෂණයට එක් වූ ගොවීන් සඳහන් කළේ වී වගා කිරීම සඳහා අවශ්ය තෙල් පොහොර මෙන්ම වෙනත් කෘෂිකාර්මික ණය ලබාගත් ගොවීන්ගේ අස්වනු නෙලන මොහොතේම ව්යාපාරිකයින් ඔවුන්ගේ කුඹුරුවලට පැමිණ, ලබාගත් ණය සහ තෙල් පොහොර වල මුදල් පියවා ගැනීමට ඉතා අඩු මිලට වී අස්වනු හිලවු කරගන්නා බවය.,
මේ වනවට ගොවීන් පත් වී ඇති දැඩි අසරණ තත්ත්වය මේ අඳ ගොළු බිහිරි ආණ්ඩුවට නොපෙනේ දැයි උද්ඝෝෂණයට එක් වූ ගොවීහු ප්රශ්න කර සිටියහ.
මේ වනවිට සම්බා කිලෝවක් රුපියල් 90ක් දක්වාත්, නාඩු වී කිලෝවක් රුපියල් 102 ක් දක්වාත් මිල පහළ වැටී ඇති බව පවසන ගොවීන් කීරි සම්බා වී කිසිදු ලෙසකින්වත් අලෙවි කරගැනීමට නොහැකි තත්ත්වයක් උද්ගත වී ඇති බව පවසයි.
මෙම මිල ගණන් යටතේ වී අලෙවි කිරීමෙන් තම ගොවිතැන් වෙනුවෙන් වියදම් කළ මුදල පවා පියවා ගත නොහැකිව අද වන විට තමන් අන්ත අසරණ තත්වයකට පත්ව ඇති බවද ගොවීහු පවසා සිටියහ.
මේ බිිහිසුණු ජීවිත සූරාකෑමට ඉඩ දී රජය තව දුරටත් නිහඬව සිටින්නේ නම් ඉදිරියේ එන ජනාධිපතිවරණයේදී ඡන්දය පමණක් ලබා ගැනීමට නොපැමිණෙන ලෙසත්, ඡන්දය ලබා ගැනීමට පැමිණිය හොත් ඊට එරෙහිව පිලිතුරු සැපයීමට ගොවීන් මග බලා සිටින බවත් ගොවීහු කීහ.
පොළොන්නරුව දම්මින්නෙන් ආරම්භ කළ මේ ගොවි සටන රට පුරා දියත් කර, වී සදහා නිසි මිලක් ලබා ගැනීමට අනෙකුත් ගොවියන් සමග අත්වැල් බැඳගන්නා බවද උද්ඝෝෂකයෝ මෙහිදී සපථ කළහ.
