මනම්පිටිය නිමල් ජයරත්න –
දිඹුලාගල ආරණ්ය සේනාසනයට අනුබද්ධිත විහාරස්ථානයක, විහාරාධිපති ස්වාමීන් වහන්සේ නමකට, පහරදී මරණ තර්ජන කර වසරකට ආසන්න කාලයක් වරින් වර රුපියල් තුන්ලක්ෂ හතලිස් පන්දාහක මුදලක් බලහත්කාරයෙන් කප්පම් ලෙස ලබාගත් බව කියන සැකකරුවන් දෙදෙනෙකු ඊයේ ( 12 ) සවස අත්අඩංගුවට ගත් බව පොළොන්නරුව කොට්ටාස අපරාධ විමර්ශන අංශය සඳහන් කරයි.
අත්අඩංගුවට ගත් සැකකරුවන් දෙදෙනා දෙහිඅත්තකන්ඩිය ප්රදේශයේ පදිංචි, වයස අවුරුදු 23 හා 29 යන වයසේ පසුවන්නන් බව කොට්ටාශ අපරාධ විමර්ශන අංශය පවසයි.
සැකකරුවන් දෙදෙනා සතුව තිබූ, යතුරුපැදියක්, කප්පම් ලබාගැනීමට භාවිතා කෙරු ජංගම දුකරථන සිම් කාඩ් පතක්, මුදල් ගෙන්වා ගැනීමට භාවිතා කරන ලද බැංකු ගිණුම් පොත, මෙහිදී අත්අඩංගුවට ගත් බව ද විමර්ශන අංශය සඳහන් කරයි.
2023 වසරේ දිනකදි මෙම තරුණයින් දෙදෙනා අදාළ විහාරස්ථානයට පැමිණ විහාරාධිපති ස්වාමීන් වහන්සේට පහරදී, මරණ තර්ජනය කර, උන්වහන්සේ නිරුවත් කර ඡායාරූප හා වීඩියෝ දර්ශන ලබාගෙන ඒවා ප්රදර්ශනය කරන බවට පවසමින්, වරින් වර රුපියල් තුන් ලක්ෂ හතළිස් තුන් දහසක මුදලක් සැකකරුවන් දෙදෙනා බලහත්කාරයෙන් ලබාගෙන ඇති බවද මූලික තොරතුරුවලින් අනාවරණය වී ඇති බව කොට්ඨාස අපරාධ විමර්ශන අංශයේ උසස් නිලධාරියකු අප කළ විමසීමකදී සඳහන් කළේය.
සැකකරුවන් දෙදෙනා අවසන් වරට ඉකුත් 09 වෙනිදා රුපියල් එක්ලක්ෂ විසි නව දහසක මුදලක් ජංගම දුරකථනය හරහා බලපෑම් කර බලහත්කාරයෙන් ඉල්ලා ඇති අතර මේ පිළිබඳව අදාළ විහාරාධිපති ස්වාමීන් වහන්සේ පොළොන්නරුව කොට්ඨාස විමර්ශන අංශය දැනුවත් කිරීමෙන් අනතුරුව, කළ මෙහෙයුමකදී ඔවුන් දෙදෙනා අත්අඩංගුවට ගැනීමට හැකි වූ බවද උසස්
නිලධාරියා කීවේය.
පොළොන්නරුව ජ්යෙෂ්ඨ පොලිස් අධිකාරී නිශාන් ද සිල්වා ගේ උපදෙස් මත පොළොන්නරුව කොට්ඨාස අපරාධ විමර්ශන අංශයේ ස්ථානාධිපති, ප්රධාන පොලිස් පරීක්ෂක ජේ.පී.ආර්.කේ ජාගොඩගේ, මැදිහත්වීමෙන්, කොට්ඨාස අපරාධ විමර්ශන අංශයේ පොලිස් පරීක්ෂක ඒ .ටී බණ්ඩාරගේ මෙහෙයවීමෙන්, පොලිස් කොස්තාපල් 79012 සේනාධීර යන නිලධාරිහු මෙම වැටලීම සිදුකළහ.
අත්අඩංගුවට ගත් මෙම සැකකරුවන් දෙදෙනා මනම්පිටිය පොලිසිය මගින් 13 වෙනිදා පොළොන්නරුව මහේස්ත්රාත් අධිකරණයට ඉදිරිපත් කිරීමට නියමිතව ඇත.
