ගාසා තීරයේ මේ මොහොතේත් ඇවිලෙමින් ඇති බිහිසුණු යුද්ධයේ අඳුරු මරණය සෙවනැලි අතර හිඳිමින් ජේසුස් ක්රිස්තුස් වහන්සේ ඉපදුන බෙත්ලෙහෙමේ නත්තල් සැඳෑවක් සනිටුහන් විය. ඒ ඊයේ (24) සවසය.
නත්තල් සතියේ බටහිර ඉවුරේ සාමාන්යයෙන් පහළ වන ප්රීතිය කොතැනකවත් සොයාගත නොහැකි වූ ආකාරය අන්තර්ජාතික පුවත් ඒජන්සි වාර්තා කරයි.
සාමාන්යයෙන් මැන්ගර් චතුරශ්රය අලංකාර කරන උත්සව විදුලි පහන් සහ යෝධ නත්තල් ගස නොවීය. ඒ අසිරිය දකින්නට රොද බැඳගෙන පැමිණෙන විදේශීය සංචාරකයින් ද දක්නට නොලැබිනි.
සම්ප්රදායික විචිත්ර තූර්යවාදනයෙන් තොරව පලස්තීන බාලදක්ෂයෝ නිශ්ශබ්දව වීදි හරහා ගමන් කළහ. ඔවුන්ගෙ අත්වල “ගාසා තීරයට සහ එහි ජනතාවට සාමය” යනුවෙන් පෝස්ටර් විය. ජේසුස් වහන්සේ උපත ලැබූ බවට විශ්වාස කෙරෙන ස්ථානයට ඉහළින් ඉදිකරන ලද නේටිවිටි දේවස්ථානය අසල ආරක්ෂක හමුදා බාධක යොදා තිබිණි. කුඩා පිරිමි ළමයෙක් විකිණීම සඳහා බැලූන් ගොඩක් අතැතිව සිටගෙන සිටියත් ඒවා මිලදී ගැනීමට ගනුදෙනුකරුවන් නොවුනි.
Pizzaballa ගාසා නගරයේ ශුද්ධ වූ පවුලේ දේවස්ථානයේ විශේෂ පූර්ව නත්තල් දේව මෙහෙයක් පවත්වන ලදී. පලස්තීන කිතුනුවන් කිහිප දෙනෙකු ඇසෝසියේටඩ් ප්රෙස් වෙත පැවසුවේ පසුගිය වසරේ ඔක්තෝම්බර් මාසයේදී යුද්ධය ආරම්භ වූ දා සිට යන්තම් ප්රමාණවත් තරම් ආහාර සහ ජලය නොමැතිව ඔවුන් පල්ලියේ අවතැන් වූ බවයි.
“ලබන වසරේම එදිනම අපගේ නිවෙස්වල නත්තල් සමරමින් බෙත්ලෙහෙමට යාමට හැකිවනු ඇතැයි අපි බලාපොරොත්තු වෙනවා” යැයි යුද්ධය අවසන් කිරීමට යාඥා කළ අවතැන් වූ කාන්තාවක් වන නජ්ලා තරාසි පැවසුවාය. “අපිට සතුටක් දැනෙන්නේ නැහැ.”
බෙත්ලෙහෙම යනු ක්රිස්තියානි ඉතිහාසයේ වැදගත් මධ්යස්ථානයකි, නමුත් ශුද්ධ වූ දේශය පුරා විසිරී සිටින මිලියන 14ක පමණ පදිංචිකරුවන්ගෙන් කිතුනුවන් සිටින්නේ කුඩා ප්රතිශතයකි. එක්සත් ජනපද රාජ්ය දෙපාර්තමේන්තුවට අනුව ඊශ්රායලයේ 182,000 ක්, බටහිර ඉවුරේ සහ ජෙරුසලමේ 50,000 ක් සහ ගාසා තීරයේ 1,300 ක් පමණ කිතුණුවෝ සිටිති.
මේ අතර අඛණ්ඩ රුසියානු ප්රහාර හමුවේ විදුලිය නොමැති හිම මිදෙන සීතලේ යුක්රේනයේ කිතුනු බැතිමත්හු අද සහ හෙට දෙදින තුළ නත්තල සැමරීමට සූදානමින් සිටිති. 2023 වසර පෙර ජුලියන් දින දර්ශනයට අනුව ඔවුන් නත්තල සැමරුවේ ජනවාරි 7 වැනිදාය.
වසර පහකට පෙර ගිනිගෙන හානි වූ පැරීසියේ නෝත්රදාම් ආසන දෙව් මැදුර යළි විවෘත කිරීමෙන් අනතුරුව මුල්ම නත්තල් දේව මෙහෙය පැවැත්වුනේය.
රාජකීය නත්තල් කැරොල් ප්රසංගය කේට් කුමරියගේ සහභාගීත්වයෙන් උත්කර්ෂවත් අයුරින් වෙස්ට්මින්ස්ටර් ඇබේ දේවස්ථානයේදී පැවැත්විය.
සිය සමීපතමයින්ගේ දුරස්ව කල් ගෙවන ජාත්යන්තර අභ්යාවකාශ මධ්යස්ථානයේ ගගනගාමීන්ද සිය නත්තල් සුබ පැතුම් පෘථිවියට එවනු ලැබුවේය.
