ශ්රියානි විජේසිංහ –
විකිරණ තාක්ෂණවේදීන් අද ආරම්භ කර තිබෙන සංකේත වැඩ වර්ජනය හේතුවෙන් දිවයිනපුරා රෝහල්වල විකිරණ පරික්ෂණ සහ ප්රතිකාර මුළුමනින්ම නතර වී ඇතැයි රෝහල් ආරංචි මාර්ග සඳහන් කරයි.
මෙම වැඩ වර්ජනය හේතුවෙන් දෛනිනව සිදුකරන විකිරණ පරීක්ෂණ 30000ක් පමණ නතර වී ඇතැයි විකිරණ විද්යා තාක්ෂණ වේදීන්ගේ සංගමයේ ලේකම් ඈපා ධර්මකීර්ති පවසයි.
විකිරණ පරික්ෂණ මේ අනුව අද දිනයේදී නතර වීමෙන් ඇතැම් සැත්කම් හා පරික්ෂණද නතර වී ඇතැයි හෙතෙම කියයි.
විකිරණ තාක්ෂණවේදීන්ගේ රාජකාරිවලින් කොටසක් පිළිකා ඒකකවල රාජකාරියේ නියුතු භෞතික විද්යාඥයින්ට පැවරීමට සෞඛ්ය අමාත්යංශය කටයුතු කිරීම හේතුවෙන් එයට විරෝධය පල කරමින් මෙම සංකේත වැඩ වර්ජනය ආරම්භ කළ බව ධර්මකීර්ති පැහැදිලි කරයි.
සෞඛ්ය අමාත්යංශය අවශ්යතාවටත් වැඩියෙන් භෞතචිකිත්සකවරුන් බඳවා ගෙන ඇති බවත් ඔවුන්ට රාජකාරී ලබා දීම සඳහා තමන් කරනු ලබන රාජකාරියෙන් කොටසක් ලබාදීමට පියවර ගෙන ඇති බවත් පෙන්වා දෙන සභාපතිවරයා මෙය රජයේ මුදල් නාස්තියක් පමණක් යැයිද සදහන් කරයි.
වැඩ වර්ජනය ආරම්භ කළද රෝහල්වල හදිසි විකිරණ පරික්ෂණ සිදුකරන බව හෙතෙම පැවසීය.
කෙසේ නමුත් රෝහල්වල පිළිකා ඒකකවල සේවයේ නියුතු භෞතික විද්යාඥයින්ගේ සංගමයේ සභාපති ජගත් ද සිල්වා සඳහන් කළේ තමන්ගේ රාජකාරී කටයුතු වලට විකිරණ තාක්ෂණවේදීන්ගේ රාජකාරී පැවරීමක් කර නොමැති බවත් සෞඛ්ය අමාත්යංශය පවරා ඇත්තේ තමන්ට හිමි රාජකාරිය පමණක් බවත්ය.
තමන්ගේ රාජකාරි ලැයිස්තුව සකස් කිරීමට සෞඛ්ය අමාත්යංශය වසර අටකට වඩා වැඩිකාලයක් ගතකළ අතර මෙම රාජකාරී ලැයිස්තුව අනුමත කිරීම සඳහා පරිපාලන හා තාක්ෂණික කමිටු මගින් නිර්දේශයන් ලබා ගැනීමක්ද සිදු කළ බව සභාපතිවරයා වැඩිදුරටත් සඳහන් කළේය.
මෙම රාජකාරී ලැයිස්තුවට අනුව විකිරණ තාක්ෂණවේදීන්ට අයත් රාජකාරි කිසිවක් භෞතික විද්යාඥයින්ට පවරා නොමැති බවද හෙතෙම පැවසීය.
කෙසේ නමුත් අද දිනය තුළ භෞතික විද්යාඥයින් රෝගීන්ට ලබා දිය යුතු විකිරණ ප්රතිකාරයන් සැලසුම් කළද විකිරණ තාක්ෂණවේදීන් විකිරණ යන්ත්ර ක්රියාත්මක නොකිරීම හේතුවෙන් පිළිකා රෝගීන්ට ප්රතිකාර ලබාගැනීමට නොහැකි වී ඇතැයි රෝහල් ආරංචි මාර්ග සඳහන් කරයි.
මේ අනුව මහරගම අපේක්ෂා රෝහලේ පමණක් විකිරණ ප්රතිකාර ලබාගැනීමට පැමිණි රෝගීන් විශාල පිරිසක් මහත් දුෂ්කතාවන්ට ලක්ව ඇතැයි වාර්තාවේ.
විකරණ තාක්ෂණවේදීන්ගේ වැඩවර්ජනය හේතුවෙන් විකිරණ යන්ත්ර ක්රියාත්මක නොවීම හේතුවෙන් පිළිකා රෝගීන්ගේ ප්රතිකාරයන් සිදු නොවන බව රෝහල් ආරංචි මාර්ග සදහන් කරයි.
