කොළඹ කොටුව සහ කොම්පඤ්ඤවීදිය යා කරන”බාලදක්ෂ මාවත” නව ගුවන් පාලම අද (19) පෙරවරුවේ විවෘත කෙරිනි.
මහාමාර්ග දෙපාර්තමේන්තුව යටතේ මාර්ග සංවර්ධන අධිකාරියේ අධීක්ෂණයෙන් දියත් කළ මෙම ව්යාපෘතියට වැය කළ මුදල රුපියල් බිලියන 3.1 කි.
කොම්පඤ්ඤවීදය දුම්රිය හරස් මාර්ගය හේතුවෙන් ඇතිවන අධික රථ වාහන තද බදය අවම කිරීමේ අභිලාෂයෙන් මෙම ගුවන් පාලම සැලසුම් වන්නේ වර්ෂ 2018 -2019 කාලයේ දීය. කොළඹ ගුවන් පාලම් තුනක් එම වකවානුවේ සැලසුම් කර තිබිණි. ඉන් දෙකක වැඩ කටයුතු නිම වූ අතර මෙම ගුවන් පාලමේ කටයුතු නිම කිරීමට නියමිතව තිබුණේ 2022 වසරේදී ය.
එහෙත් පැවති ආර්ථථික අර්බුදය හේතුවෙන් එහි කටයුතු ඇනහිටියේය. වසර 03කට පසු අද විවෘතවන මෙම ගුවන් පාලම ඔස්සේ ගමන් කළ හැක්කේ ගාලු මුවදොර සිට කොම්පඤ්ඤවීදිය චිත්තම්පලම් ඒ. ගාඩිනර් මාවත දෙසට පමණි. ගුවන් පාලම මං තීරු 02කින් යුක්තය. මීටර 320ක් දිග මෙම ගුවන් පාලම පළල මීටර 11කි.
ප්රවාහන මහා මාර්ග සහ නාගරික සංවර්ධන අමාත්ය බිමල් රත්නායක සහ කොළඹ නරගාධිපති ව්රායි කැලී බල්තසාර් ප්රධානත්වයෙන් අද මෙම ගුවන් පාලම විවෘත කෙරිනි.
රට තුළ පැවති අර්බුදකාරී තත්ත්වයන් හේතුවෙන් පාලමේ කටයුතු නිමා වීම වසර තුනක් ප්රමාද වී ඇති බවත් ඒ වෙනුවෙන් අමතරව රුපියල් බිලියනක් ගෙවීමට සිදුවූ බවත් ප්රවාහන හා මහාමාර්ග අමාත්ය බිමල් රත්නායක අද පැවසුවේය.
“ මේ ස්ථානය දැඩි මාර්ග තදබදයක් තිබුණු තැනක්. එම මාර්ග තදබදයට පිළියම් ලෙස 2018 -19 වකවානුවේ දි යෝජනා කරලා තියනවා ගුවන් පාලම් 03ක් ඉදි කරන්න. ඒ ගුවන් පාලම් තුනෙන් දෙකක් හදලා ඉවර කරලා තිබුණා. නමුත් මේ ගුවන් පාම 2022 දි හදලා අවසන් කරන්න තිබුණු ගුවන් පාලමක්. නමුත් විවිධ හේතු නිසා මේ ගුවන් පාලම හදන්න විශාල කාලයක් ප්රමාද වුනා. ඒ නිසා ප්රමාද ගාස්තු ඇතුළු ප්රමාද ගෙවීම් මිලියන 1000ක් වැඩි වෙලා තිබුණා නීත්යානුකූළ ගෙවන්න ඕන ගාස්තුත් එක්ක.”
“ අපි ජනතාවට තේරුම් කරලා දෙන්න ඕන රට බංකොලොත් කරලා සිදුකළ ආරථික අපරාධවල ප්රතිවිපාක දිගටම එනවා. ඒ අභියෝග මැඩගෙන වැඩ කරන්න පුලුවන් වීම ගැන අපි සතුටු වෙනවා. “ ප්රවාහන හා මහාමාර්ග අමාත්යවරයා පැවසුවේය.
