අමායා උඩුවැරැල්ල –
රුසියානු ජනාධිපති ව්ලැඩිමීර් පුටින් අද (18) එනම් අඟහරුවාදා දෙදින නිල සංචාරයක් සඳහා උතුරු කොරියාව වෙත පැමිණීමට නියමිත බව විදෙස් මාධ්ය වාර්තා කර තිබෙනවා.
ඔහු මෙලෙස උතුරු කොරියාවේ සංචාරයක නිරත වන්නේ වසර 24 කට පමණ පසු වීම ද විශේෂත්වයක්.
රුසියානු ජනාධිපතිවරයාගේ මෙම සංචාරය අතරතුර උතුරු කොරියානු නායකයා සමග මොස්කව් සහ ප්යොංග්යන්ග් (උතුරු කොරියාවේ අගනුවර) අතර පුළුල් සහයෝගීතා ගිවිසුමකට අත්සන් තැබීමට අපේක්ෂා කරන බව රුසියානු රාජ්ය මාධ්ය නිවේදනය කර තිබෙනවා.
ඒ පිළිබඳව වෙනත් කිසිදු විස්තරයක් එහි සඳහන් කර නොමැති අතර රුසියානු රාජ්ය මාධ්ය පෙර දිනක සඳහන් කර තිබුනේ එම ගිවිසුම මගින් ආරක්ෂක කරුණු ආවරණය කරනු ඇති බවයි.
රුසියාව දිගු කලක් පුරා උතුරු කොරියාවේ ආධාරකරුවෙකු ලෙස කටයුතු කරයි. එමෙන්ම ලොව න්යෂ්ටික බලයෙන් සන්නද්ධ ප්රබල රාජ්යයන් දෙකක් වන රුසියාව සහ උතුරු කොරියාව, රුසියානු හමුදා යුක්රේනය ආක්රමණය කිරීමෙන් පසුව වඩාත් සමීපව කටයුතු කරන බවට විදෙස් මාධ්ය සඳහන් කර තිබෙනවා.
මේ අතර, යුක්රේනයට එරෙහිව යුධ පිටියේ ප්රයෝජනය සඳහා උතුරු කොරියාව රුසියාවට යුධෝපකරණ බහාලුම් 11,000 ක් මෙන්ම බැලස්ටික් මිසයිල ලබාදී ඇති බව එක්සත් ජනපද නිලධාරීන් පවසා තිබෙනවා. බොහෝ දෙනා යුක්රේන හමුදාවන්ට එරෙහිව රුසියාව උතුරු කොරියානු ආයුධ භාවිතා කරන බවට ප්රකාශ කර ඇතත් උතුරු කොරියාව සහ රුසියාව එවැනි ආයුධ ගනුදෙනු සම්බන්ධ ප්රකාශ ප්රතික්ෂේප කර තිබෙනවා. කෙසේවෙතත් ආරක්ෂක බැඳීම් සම්බන්ධ උතුරු කොරියාවේ න්යෂ්ටික වැඩසටහනට අදාළව රුසියාව විසින් දියුණු ආයුධ හෝ වෙනත් ආධාර සැපයිය හැකි බවට එක්සත් ජනපද නිලධාරීන් කනස්සල්ල පළ කරන බවද එක්සත් ජනපද මාධ්ය වාර්තා සඳහන් කර තිබෙනවා.
