මනම්පිටිය නිමල් ජයරත්න –
දිඹුලාගල පළවන පියවර ගම්මානයට අද ( 21) උදෑසන 6.00 ට පමණ කඩා වැදුණු වන අලියෙක් ගම්මානයේ නිවසක ඉදිරිපිට නවතා ත්රී රෝද රථයකට පහරදී එම ත්රීරෝද අඩි 300 ක් පමණ පාළු ගෙවත්තකට රැගෙන ගොස් දමා ඇති බව ගම්වාසීහු පවසති.
වන අලියා පහරදීමෙන් ත්රී රෝද රථයට දැඩි හානි සිදුවී ඇති අතර, නිවස අසල නවතා තිබූ පාපැදියක් ද වන අලියා හානි කර ඇත.
නිවසේ සිටි කාන්තාව ගේට්ටුව ඇරිමට යන විට එම අලියා ගෙවත්තේ ඉදිරියෙන් පැමිණ කාන්තාවටද පහරදීමට උත්සාහ දරා තිබේ. එම කාන්තාව අනූ නමයෙන් ජීවිතය බේරාගෙන තිබේ. ඒ වනවිට කාන්තාව ඇගේ දරුවන් තිදෙනා සමග නිවසේ සිට ඇති අතර ස්වාමියා ඉඳ ඇත්තේ කුඹුරේය.
වන අලියාගේ යැයි සිතිය හැකි ලේ පැල්ලම් ඒම නිවසේ බිත්තිවල සටහන්ව තිබු බවත් නිවෙස් හිමියෝ කියති. මේ පිළිබඳව නිවැසියන් සහ ගම්වාසින් විසින් මනම්පිටිය වනජීවී කාර්යාලයේ නිලධාරීන් දැනුවත් කර තිබේ.
