මනම්පිටිය නිමල් ජයරත්න –
පොලොන්නරුව මනම්පිටිය මහවැව ගම්මානයේ අක්කර 60 කින් යුත් ඖෂධීය ශාක ඇතුළු පලු, වීර, කුඹුක්, සහ තවත් අහස උසට වැඩුණු ශාක වර්ග සහිත රක්ෂිතයක් දිඹුලාගල අඩවි වන කාර්යාලය මගින්ම යාන්ත්රික කියත් යොදා ගනිමින් විනාශ කර ඇති බව මහවැව ගම්වාසීහු පවසති.
මීට දින 5කට පමණ පෙර සිදුකර ඇති මෙම දැවැන්ත පරිසර විනාශය හේතුවෙන් එහි සිටි මොනරුන්, ඉබ්බන්, හාවුන්, මීමින්නන් ඇතුලු විශාල තත්ත්ව ගහණයකගේ වාසස්ථාන විනාශ වී ඇති බවත්, මාදං කොන් ඇතුළු තවත් ශාක වර්ග රැසකට ගිනි තබා විනාශ කර ඇති බවත් මනම්පිටිය මහවැව ගම්වාසීහු චෝදනා කරති.
“ශ්රී ලංකා මහවැලි අධිකාරිය සතුව ඇති අක්කර 60කින් පමණ යුත් මේ රක්ෂිතය 1998 වසරේදී දිඹුලාගල අඩවි වන කාර්යාලය මගින් වන වගාවක් කිරීම සඳහා තාවකාලිකව ලබා ගත්තා. එම ඉඩම් කොටසේ ඔවුන් විසින් රෝපණය කළ ගස් 2018 වසරේ දී එම වන අඩවි කාර්යාලය නිල නිළධාරින්ම කපාගෙන ගියා. දැන් ,නැවත වරක් මෙම ස්වභාවික රක්ෂිතයෙ තියන ගස් ටික මුලින්ම කපාගෙන නැවත වන වගාවක් කරන්න හදනවා. මේ මොකක්ද මේ අය කරන්නෙ. ගම්මානයටත්, සතා සිවු සිවුපාවන්ටත් පරිසරයටත් දැඩි හානියක් මේ මිනිස්සු සිදු කරන්නෙ.“ මහවැව ඩී 6 මහසෙන් බෙදුම් ඇළ ගොවි සංවිධානයේ සභාපති ඩී.ආර්.ජේ.පී.දසනායක ලංකසරට කීවේය.
“මෙම රක්ෂිතයේ තිබූ ඖෂධීය ගුණයක් ඇති යකිනාරං ඇතුළු තවත් ඖෂධ වර්ග රැසක් යාන්ත්රික කියත් යොදා විනාශ කළා. තවත් ප්රදේශයක්, ඩෝසර් කර විනාශ කළා. “ මහවැව ගොවීහු කීහ.
මහවැව රක්ෂිතයේ විනාශ කර ඇති පරිසරය නැරඹීම් සඳහා දිඹුලාගල බුද්ධ ශ්රාවක සංඝ සභාවේ ලේඛකාධිකාරී පූජ්ය දිඹුලාගල රාහුලාලංකාර නාහිමියන් සහ මහවැව ශ්රී ශාන්ති නිකේතනාරාමාධිපති වල්පනේ ධම්මවංශ නාහිමියන් වහන්සේ වැඩම කර සිටියහ.
මනම්පිටිය මහවැව ප්රදේශයේ ඩෝසර් කර ඇති භූමිය පිළිබඳවත්, යාන්ත්රික කියත් මගින් විනාශ කර ඇති පරිසරය සම්බන්ධවත් අප දිඹුලාගල අඩවි වන කාර්යාලයෙන් දුරකථනයෙන් කරන ලද විමසීම්කදී එහි නිලධාරියකු මෙලෙස පැවසීය.
“නැහැ… අපි ඩෝසර කරලා නෑ එව්වා. ඒක බොරුවක්. ගමේ කට්ටිය තමයි ඔය වන වගාව කරන්නේ. ඔතන එක්කෙනෙක්ගේ ඉඩමක් තමයි ඩෝසර කරලා තියෙන්නෙ. අක්කර 60ක් ගණන් ඩෝසර කරල නෑ.“
“වන වගාවක් කරන්න ඔය ගමේ ඉඩම් දෙකක මිනිස්සු ඕක ඩෝසර් කළා. පස්සේ අපි එක නතර කළා. දැන් අතින් තමයි සුද්ද කරන්නේ.“ ඔහු කීවේය.
මේ සිදු වී ඇති වන විනාශය පිළිබඳ ශ්රී ලංකා මහවැලි අධිකාරියේ මහවැලි බී කලාපීය නේවාසික ව්යාපාර කළමනාකාර නොයෙල් ජයසිරි විමසීමේ දී ඔහු කීවේ මෙවැනි කතාවකි.
“ඔය ඉඩම නැවත වරක් මහවැලියට බාර දෙන්න කියලා ඉල්ලීමක් කළා. ඒ ඉඩම් කට්ටි ටික ගමේ අයට ලබා දෙන්න කියලා ගමේ අයගෙන් ඉල්ලීමකුත් තිබෙනවා. කැලේ කපලා ගස් වවන එකේ තේරුම්ක් තියෙනවද.“
“මා ඔය ගැන වහාම හොයා බලනවා. මහවැලි ඇමතිතුමත් ඔය සම්බන්ධව දැනුවම්ත් වෙලා මට දැනුම් දී තිබෙනවා ඒ සම්බන්ධව හොයා බලන්න කියලා.“
