දිගනින් අසුවූ ලොහාන්ගේ යැයි කී හොර ජිප් එක රත්තරන් පොරවන් ඉන්නා ගාලතැන්නේ කපුවාගේ බවත් ඔහු තමන් කරමින් සිටි අපරාධය හිටපු රාජ්ය ඇමති ලොහාන් රත්වත්තේ ගේ ගිනුමට බැර කිරීමට උත්සාහ කර තිබූ බවත් පොලිස් විමර්ශන අංශ දැන් කියයි!
දිගන අයි.සී.සී නිවාස සංකීර්ණයට අයත් නිවසක තිබී ඊයේ (31) පස්වරුවේ සොයාගෙන පොලිස් අත් අඩංගුවටපත් වාහනය ලොහාන් රත්වත්තට අයත් එකක් නොව, මහනුවර ප්රකට ගාලතැන්නේ කපුවාට අයත් වාහනයක් බව මේ වනවිට විමර්ශනවලින් අනාවරණය වී තිබේ.
සිද්ධියට ලොහාන් රත්වත්තව සම්බන්ධ වන්නේ 1997 දුරකථන අංකයට ලද පැමිණිල්ලක් අනුව පොලිස් විමර්ශනයට ගිය කණ්ඩායමට මෙම නිවස හිමි ගාලතැන්නේ කපුවාගේ පුතා වාහනය ගැන තමන් කිසිවක් නොදන්නා බවත්, වාහනය ලොහාන් රත්වත්තගේ සිය දිවි නසාගත් ලේකම්වරයා විසින් තම නිවසට ගෙනත් දැමූ බවත් ප්රකාශ කිරීමත් සමගය. මීට පෙර ලොහාන් රත්වත්ත සහ ඔහුගේ බිරිය රශී පබා රත්වත්ත තම මිරිහාන නිවසේ තිබූ නීති විරෝධී වාහනය සම්බන්ධව මුලින්ම ප්රකාශ ලබා දී තිබුණේත් සිය දිවි නසා ගත් ලේකම්වරයා විසින් එම වාහනය නිවසට ගෙනත් දැමූ බවටය.
කෙසේ නමුත් ඊයේ දිගනදී අත් අඩංගුවට ගත් වාහනය පොලිස් භාරයට ගෙන විමර්ශන කරනවිට වාහනයේ තිබී 2022 වසරේ ගාලතැන්නේ කපුවා විසින් විදුලි බිලක් ගෙවූ රිසිට් පතක් හමුවී ඇත. අනතුරුව වාහනය සේවා කළ ස්ථානයෙන් පරික්ෂා කර බලද්දී වාහනය සේවා කර තිබෙන්නේත් ගාලතැන්න කපුවාගේ නමට බව අනාවරණය වී තිබේ.
විමර්ශනය වැඩි දුර පවත්වාගෙන යන විට හිටපු ජනාධිපති ගෝඨාභය රාජපක්ෂ නුවර යන අවස්ථාවක ඔහුගේ ආරක්ෂක රථයටත් වෙට්ටු දමාගෙන ගොස් පොලිස් අත් අඩංගුවට පත් වන්නේ ගාලතැන්නේ කපුවා විසින් පදවන ලද මේ රථයය. අනතුරුව රථය සම්බන්ධ සිදුකළ පරීක්ෂණවලදී එය නීති විරෝධීව භාවිතා කළ රථයක් බව අනාවරණය වී තිබේ. මෙවැනි වාහන දෙකක් ගාලතැන්නේ කපුවාගේ සන්තකයේ තිබී මහනුවර විශේෂ අපරාධ විමර්ශන අංශය විසින් ඒ වකවානුවේ දී අත් අඩංගුවට ගෙන උසාවියට කරුණු වාර්තා කළ ද එහිදී අතාර්කික ලෙස මෙම රථ නිදහස් කිරීමට අධිකරණය පියවර ගත් බවට කියමින් විනිසුරුවරයාට එරෙහිව අධිකරණ සේවා කොමිසමට පැමිණිලි කිරීමට ද විමර්ශන නිලධාරීන් කටයුතු කර තිබිණි.
ඊයේ (31) සවස පොලිස් අත් අඩංගුවට පත් වන්නේ එම නීති විරෝධී රථය ය. එය භාවිතා කිරීම සඳහා කපුවා විසින් ව්යාජ අංක තහඩු යොදාගෙන ඇති බව අනාවරණය වී ඇත. පොලිසිය නොමග යවන ප්රකාශ කරමින් නීති විරෝධී වාහනයක් ලඟ තබාගෙන එය ව්යාජ අංක තහඩු සහිතව භාවිතා කිරීම සම්බන්ධව ගාලතැන්න කපුවා සහ කපුවාගේ පුතා පිළිබඳව ඉදිරි විමර්ශන පවත්වන බව පොලිස් විමර්ශන කණ්ඩායම් කියයි…
