අමායා උඩුවැරැල්ල –
මේ දිනවල පවතින දැඩි උණුසුම් කාලගුණ තත්වය නිසා ශ්රී ලංකාවේ පමණක් නොව ලොව පුරා ඇතැම් රටවල වෙසෙන පුද්ගලයින් ද පීඩාවට පත් ව සිටිනවා. ඒ අනුව අප වෙසෙන මේ පෘථිවියේ උණුසුමින් අධිකම ස්ථාන මොනවාද යන්න පිළිබඳව සොයා ලැයිස්තුගත කිරීමට පර්යේෂණ කණ්ඩායමක් කටයුතු කර තිබෙනවා.
උණුසුමින් වැඩිම ස්ථාන 10 ක් එලෙස ලැයිස්තුගත කර තිබෙනවා. නමුත් ඔවුන් පවසන්නේ ලැයිස්තුවේ ඇති ස්ථානවල උෂ්ණත්වය සෑම විටම නියත අගයක නොපවතින බවයි.
10 සෞදි අරාබියේ ජෙඩා නගරය
පෘථිවියේ උණුසුම්ම ස්ථාන ලැයිස්තුවේ 10 වන ස්ථානයේ පවතින්නේ සෞදි අරාබියේ ජෙඩා නගරය වන අතර එහි වාර්තා වුනු වැඩිම උෂ්ණත්වය වන සෙල්සියස් අංශක 52 (125.6 ° F) 2010 වසරේ ජුනි මස 22 වන දා වාර්තා වී තිබුනා. ජෙඩා, වරාය නගරයක් වන අතර එය සෞදි අරාබියේ නවීන වාණිජ මධ්යස්ථානයක් ද වනවා. එමෙන්ම ජෙඩා නගරය යනු, ඉස්ලාමීය ශුද්ධ නගර වන මක්කම සහ මෙඩිනා වෙත සිදු කරන වන්දනා ගමන් සඳහා වන දොරටුවක් ලෙසද හැඳින්වෙනවා.
9 මෙක්සිකෝවේ මෙක්සිකාලි නගරය
1995 වසරේ ජුලි මස 28 වන දා මෙක්සිකෝවේ මෙක්සිකාලි නිම්නයේ සෙල්සියස් අංශක 52 ක (125.6°F) උෂ්ණත්වයක් වාර්තා වී තිබුනා. මෙය පෘථිවියේ ඕනෑම තැනක වාර්තා වූ 9 වැනි උණුසුම්ම උෂ්ණත්වය බව වාර්තා වනවා. මෙක්සිකානු ප්රාන්තයේ බජා කැලිෆෝනියා ප්රාන්තයේ උතුරේ පිහිටි මෙම ප්රදේශය උණුසුම සඳහා ප්රසිද්ධියක් උසුලන අතර එය හැඳින්වෙන්නේ ‘සූර්යයා ග්රහණය කරගත් නගරය’ යන අන්වර්ථ නාමයෙන්. මෙක්සිකාලි නගරයේ සාමාන්ය ජූලි මාසයේ හි පවතින ඉහළ උෂ්ණත්වය සෙල්සියස් අංශක 42.2 (108°F), සහ ජනවාරි මාසයේ උපරිම උෂ්ණත්වය 70°F බව වාර්තා වනවා.
8 එක්සත් අරාබි එමීර් රාජ්යයේ අල් ජසීරා දේශසීමා දොරටුව
2002 වසරේ ජූලි මාසයේදී එක්සත් අරාබි එමීර් රාජ්යයේ අල් ජසීරා දේශසීමා දොරටුවේ සෙල්සියස් අංශක 52.1 ක (125.8°F) උෂ්ණත්වයක් වාර්තා වී තිබෙනවා. ඉන් පසු 2013 වසරේ ජූලි මාසයේ දී, කලාපයේ වාර්තාගත ඉහළ උෂ්ණත්වය නැවතත් සෙල්සියස් අංශක 51.2 ක අගයකට ආසන්න වූ අතර එම උෂ්ණත්වය විනාඩි 15 ක් පමණ පැවතී තිබූ බව වාර්තා වනවා. සෙල්සියස් අංශක 50 ක අගය යනු දරාගත නොහැකි මට්ටමක් ය.
7 පකිස්ථානයේ ටර්බට් නගරය
ලැයිස්තුවේ හත්වන උණුසුම්ම ස්ථානය පකිස්ථානයේ ටර්බට් නගරය වන අතර 2017 වසරේ මැයි 28 වන දා එහි සෙල්සියස් අංශක 53.7 ක (128.7°F) උෂ්ණත්වයක් වාර්තා වී තිබුනා. ලෝක කාලගුණ විද්යා සංවිධානය තහවුරු කර තිබුනේ ටර්බට් හි වාර්තා වූ එම උෂ්ණත්වය ඒ වසරේ වාර්තා වූ සිව්වන අධි උෂ්ණත්වය බවයි. ටර්බට්, ආසියාවේ උණුසුම්ම නගරවලින් එකක් ලෙස ද හැඳින්වෙනවා.
6 ඉරාකයේ බස්රා නගරය
මැදපෙරදිග යනු ලෝකයේ උණුසුම් කලාපයක් වන අතර එහි වාර්තාගත උෂ්ණත්වය සෙල්සියස් අංශක 50 ට වඩා ඉහළ යන බව සඳහන් වනවා. 2016 වසරේ ජූලි 22 වන දා සෙල්සියස් අංශක 53.9 ක(129°F) ඉහළ අගයක උෂ්ණත්වයක් බස්රා නගරයෙන් වාර්තා වී තිබෙනවා. බස්රා නගරයේ මිලියන 1.4 ක පමණ ජනගහනයක් ජීවත් වනවා.
5 කුවේට් හි මිත්රිබා කාලගුණ මධ්යස්ථානය
ලෝක කාලගුණ සංවිධානය වාර්තා කරනු ලැබූ පස්වන ඉහළම උෂ්ණත්වය කුවේට් හි මිත්රිබා කාලගුණ මධ්යස්ථානයෙන් වාර්තා වී තිබෙනවා. එම අගය දැක්වෙන්නේ සෙල්සියස් අංශක 53.9 ක් (129 ° F) ලෙසයි. එය 2016 වසරේ ජූලි මස 21 වන දා වාර්තා වූ අතර ආසියාවේ වාර්තාගත උණුසුම්ම ස්ථානය වන්නේ ද මිත්රිබා කාලගුණ මධ්යස්ථානයයි.
4 ඊශ්රායලයේ ටිරට් ස්වී නගරය
1942 වසරේ ජුනි මස 21 වන දා ඊශ්රායලයේ ටිරට් ස්වී හි උෂ්ණත්වය සෙල්සියස් අංශක 54 ක් (129°F) ලෙස වාර්තා වී තිබෙනවා. ටිරට් ස්වී ඊශ්රායල-ජෝර්දාන් දේශ සීමාව ආසන්නයේ, ජෝර්දාන් ගඟට බටහිරින් පිහිටා තිබෙන අතර එහි ජනගහනය දැක්වෙන්නේ පුද්ගලයින් 980 කට ආසන්න ලෙසයි.
3 ඉරානයේ අහ්වාස් නගරය
2017 වසරේ ජූනි මස 29 වන දින එහි වේලාවෙන් පස්වරු 4:51 සිට පස්වරු 5 දක්වා ඉරානයේ අහ්වාස් හි වාර්තාගත ඉහළ උෂ්ණත්වය, සෙල්සියස් අංශක 54 ක් (129.2°F) ලෙස සඳහන් ව තිබෙනවා. ඉරානයේ කුසෙස්ටන් පළාතේ අගනුවර වන අහ්වාස් හි මිලියන 1.3 ක පමණ ජනගහනයක් සිටින බව සඳහන් වනවා. එහි ඇති පාලම් නවයක්, අහ්වාස් නගරයේ ප්රසිද්ධියට හේතුවනවා.
2 ටියුනීසියාවේ කෙබිලි නගරය
1931 වසරේ ජූලි මස 7 වන දා සෙල්සියස් අංශක 55 ක (131 ° F) උෂ්ණත්වයක් කෙබිලි නගරයෙන් වාර්තා වී තිබූ අතර එය පෘථිවියේ වාර්තා වූ දෙවන ඉහළම උෂ්ණත්වයයි. කෙබිලි යනු ටියුනීසියාවේ සහ උතුරු අප්රිකාවේ පැරණිතම ක්ෂේම භූමියක්. ටියුනීසියාවේ මිනිස් වාසය සම්බන්ධව වසර 200,000 පමණ පැරණි සාක්ෂි කෙබිලි නගරයෙන් හමු වී තිබෙන බව ද වාර්තා වනවා.
1 කැලිෆෝනියාවේ මරණයේ නිම්නය
පෘථිවියේ උණුසුම්ම ස්ථානය ලෙස ලැයිස්තුවේ පලමු තැන හිමි කර ගන්නේ 1913 වසරේ ජූලි මස 10 වන දින සෙල්සියස් අංශක 56.7 ක (134 ° F) උෂ්ණත්වයක් වාර්තා වූ කැලිෆෝනියාවේ පිහිටා තිබෙන මරණයේ නිම්නයයි. ගිම්හාන කාලයේ දී එහි සාමාන්ය දෛනික ඉහළ අගය සෙල්සියස් අංශක 45 ක් (113°F) වේ. මෙය වාතයේ උෂ්ණත්වය පමණක් වන අතර මතුපිට තාපය ඊට බෙහෙවින් වැඩි බව සඳහන් වනවා. 1972 වසරේ ජූලි මස 15 වන දා මරණයේ නිම්නයේ සෙල්සියස් අංශක 93.9ක (201 °F) භූ උෂ්ණත්වයක් වාර්තා වී තිබුනා.
