මනම්පිටිය නිමල් ජයරත්න –
මහවැලි සී කලාපයට අයත් දමනේවැව, නවගහඇල, මීවත්පුර, පහළ යක්කුරේ, යන ගම්මාන හා කුඹුරු බිම් ආවරණය වන පරිදි මීට වසර තුනකට ඉහතදී වනජීවී දෙපාර්තමේන්තුව මගින් රුපියල් ලක්ෂ අසූවක වියදමකින් ඉදි කරන ලද, විදුලි වැට සූර්ය පැනල් කුටි මෙතෙක් විවෘත නොකිරීම නිසා ගම්මානවලට වන අලි තර්ජන එල්ල වී ඇති බව පහළ යක්කුරේ හා අවටගම්වාසීහු සඳහන් කරති.
තම ගම්මානය වටා පැවැති විදුලි වැටේ සහ සුර්ය පැනල් කුටිවල කොටස් වනජීවී දෙපාර්තමේන්තුව මගින් ගලවාගෙන ගිය බවත්, මෙම තත්ත්වය මත තමන්ට ඉපැරණි විදුලි කුටි සඳහා ශ්රි ලංකා විදුලි බල මණ්ඩලයෙන් මාසිකව රුපියල් 2000 ක විදුලි බිලක් ලැබෙන බවත්, එම බිල ගම්මානයේ ගොවීන් 267 දෙනෙකු විසින් වසර දෙකක කාලයක සිට ශ්රී ලංකා විදුලිබල මණ්ඩලයට ගෙවීමට සිදුව ඇති බවත් පහල යක්කුරේ ගොවි සංවිධානයේ හිටපු සභාපති එච්.එම්. තිලකරන සඳහන් කළේය.
මෙම විදුලිමට ඉදිකිරීමට කොන්ත්රක් ලබාගත් පුද්ගලයා අනුරාධපුරේ පුද්ගලයෙකු බවත්, ඔහු වනජීවී දෙපාර්තමේන්තු මගින් අදාළ කොන්ත්රාක් මුදල් ලබාගෙන ප්රදේශයෙන් පිටව ගොස් ඇති බවත් තම ගොවි සංවිධානයට දැනගන්නට ඇති බවද ඔහු සඳහන් කලේය.
ගම්මාන හතරක ගොවීන් දෙදහකට ආසන්න සංඛ්යාවක ගොවීන්ගේ ජිවිත හා දේපල වස්ගමුව ජාතික වනෝද්යානයෙන් හා හුංගමාල ඔය රක්ෂිතයෙන් ගම්වදින වන අලින්ගෙන් බේරා ගැනීමට නම් ඉදිකර තිබෙන විදුලි වැටේ අඩුපාඩු සකසා ක්රියාත්මක කර දෙන ලෙස ගම්මු ඉල්ලා සිටිති.
අප මේ පිළිබඳව වෙහෙරගල සහ නුවරගල වනජීවී නිලධාරි කාර්යාලවලින් දුරකථනයෙන් කළ විමසීමකදී එම නිලධාරීන් සඳහන් කළේ ගම්මාන වටා ඉදිකර තිබෙන විදුලි වැටවල් ඉතා කඩිනමින් ගොවින්ගේ අයිතියට පත්කරීමට අවශ්ය කටයුතු සිදුකරමින් පවතින බවයි.
