ස්ථාවර ශක්තිමත් පාලනයක් හා විනිවිදභාවයෙන් යුතු ආර්ථිකයක් පවතින ශ්රී ලංකාවේ ආයෝජනයට පැමිණෙන ලෙස ජනාධිපති අනුර කුමාර දිසානායක මහතා චීන ආයෝජකයින්ට ආරාධනා කළේය.
චීනයේ රාජ්ය හා පෞද්ගලික සමාගම් එක්ව අද (16) සංවිධානය කර තිබූ “ආයෝජන සැසියේ” ප්රධාන ආරාධිතයා ලෙස එක් වෙමින් ජනාධිපතිවරයා මෙම අදහස් පළ කළේය.
චීන ජනාධිපති ෂී ජින් පිං (Xi Jinping) මහතාගේ ආරාධනාවකට අනුව චීනයේ සිව් දින රාජ්ය සංචාරයක නිරත ජනාධිපති අනුර කුමාර දිසානායක තෙවැනි දිනය ආරම්භ කරමින් අද (16) පෙරවරුවේ මෙම සැසියට එක් වුනේය.
රාජ්ය හා පෞද්ගලික සමාගම් එක්ව සංවිධාන කර තිබූ එම සැසිය “Invest in Sri Lanka- Round table meeting 2025” ලෙස නම් කර තිබිණි.
හුවාවි (Huawei), බී.වයි. ඩී (BYD Auto), චයිනා ටියැන්යිං ඉන්කෝපරේෂන් (CNTY- China Tianying Inc), සීමාසහිත චයිනා හාබර් ඉංජිනේරු සමාගම ( China Harbour Engineering Company Ltd), සීමාසහිත චයිනා සන්නිවේදන ඉදිකිරීම් සමාගම (China Communications Construction Company Ltd), චයිනා පෙට්රොකෙමිකල් සංස්ථාව ( China Petrochemical Corporation -SINOPEC Group), සීමා සහිත මෙටලර්ජිකල් කෝපරේෂන් ඔෆ් චයිනා සමාගම (Metallurgical Corporation of China Ltd), චයිනා සිවිල් ඉංජිනේරු ඉදිකිරීම් සංස්ථාව (CCECC-China Civil Engineering Construction Corporation), සීමා සහිත චයිනා එනර්ජි ඉන්ටර්නැෂනල් සමූහ සමාගම (China Energy International Group Company Ltd), ගුවැන්ෂු පොදු ප්රවාහන සමූහය ( The Guangzhou Public Transport Group), ඇතුළු චීනයේ ප්රමුඛ සමාගම් රැසක් මෙම ආයෝජන සැසියට එක්ව සිටිති.
ජනාධිපති අනුර කුමාර දිසානායක මහතා එම සමාගම් ප්රධානීන් සමඟ සුහද පිළිසඳරකද නිරත විය.
විදේශ කටයුතු, විදේශ රැකියා සහ සංචාරක අමාත්ය විජිත හේරත්, ප්රවාහන, මහා මාර්ග, වරාය හා සිවිල් ගුවන් සේවා අමාත්ය බිමල් රත්නායක, ශ්රී ලංකාවේ චීන තානාපති චී ජෙන්හොන්ග්, චීනයේ ශ්රී ලංකා තානාපති මජින්ත ජයසිංහ යන මහත්වරුද මෙම අවස්ථාවට සහභාගි වූහ.
