සූරියවැව විශේෂ –
සූරියවැව රම්මුදුවැව විද්යාලයේ විදුහල්පතිවරයා විසින් සිදුකළ අමානුෂික දඬුවමක් හේතුවෙන් දින අටක් තිස්සේ සිය දරුවාට රෝහලේ ප්රතිකාර ලැබීමට සිදු වූ බවත්,මේ සම්බන්ධයෙන් සූරියවැව පොලිසියට පැමිණිල්ලක් සිදුකළද සූරියවැව පොලිසිය විසින් මෙතෙක් එම පැමිණිල්ලට කිසිදු සාධාරණයක් ඉටු නොකර පක්ෂග්රාහී ලෙස කටයුතු කරමින් සිටින බවත් සිසුවාගේ මව ප්රකාශ කරයි.
මෙලෙස පහර කෑමට ලක්ව හම්බන්තොට මහ රෝහලේ නේවාසිකව ප්රතිකාර ලබමින් සිටින්නේ සූරියවැව රම්මුදුවැව විද්යාලයේ 11 ශ්රේණියේ ඉගෙනුම ලබන 16 හැවිරිදි සිසුවෙකි.
සිද්ධිය සම්බන්ධයෙන් සිසුවාගේ මව වන 36 හැවිරිදි හෙට්ටි ආරච්චිලාගේ උදේනි උපේක්ෂා කියන්නේ මෙවැන්නකි.
“පසුගිය 18 වන දින මගේ දරුවා පාසල් ඇරී නිවසට පැමිණ පසු තරමක අසනීපයෙන් සිටිනු දක්නට ලැබුණා. මම ඒත් දරුවගෙන් ඇහුවා මොකද කියල. නමුත් දරුවා මොකුත් කිව්වේ නෑ. කොහොම හරි හවස් වෙනකොට දරුවා කිව්වා අම්මේ මට කැරකැවිල්ල වගේ. නැගිටලා ඉන්න අමාරුයි කියලා. පුතාට ගොඩක් අමාරු වගේ හින්දා මම ඒ වෙලාවෙම දරුවා ප්රතිකාර සඳහා තනමල්විල ප්රාදේශීය රෝහලට රැගෙන ගියා. ඒ යන අතර වාරයේදී මම දරුවගෙන් ඇහුවා මොකද වුනේ කියලා. එහිදී දරුවා මට කිව්වා මම ඉස්කෝලේ ඩෙස්ක් එකකට අතින් තට්ටු කරමින් සිටි බවත් පසුව වේවැලෙන් කකුල් දෙකට ගසා කන හරහා ද පහරක් ගැසූ බව කීවා.
ඒ අනුව මම දරුවා තණමල්විල ප්රාදේශීය රෝහලට ඇතුළත් කළ පසු එහි වෛද්යවරුන් දරුවා පරීක්ෂා කර එම අවස්ථාවේදීම දරුවා වැඩිදුර ප්රතිකාර සඳහා හම්බන්තොට මහ රෝහල වෙත මාරු කර යැවුනා. පසුව සිද්ධිය සම්බන්ධයෙන් මම 19 වන දින සූරියවැව පොලිසියට ගොස් පැමිණිල්ලක්ද සිදු කළා. දරුවාට මෙම සිද්ධිය වුණේ පසුගිය 18 වන දින. දරුවා දින 08ක් රෝහලේ නේවාසිකට ප්රතිකාර ලබලා 25 වෙනිදා තමයි ටිකට් කපලා ගෙදර ආවේ. ඒත් දරුවා තවම කම්පනයෙන් ඉන්නේ.
එහෙම තියෙද්දිත් මම සූරියවැව පොලීසියට සිදු කළ පැමිණිල්ලට සූරියවැව පොලිසිය මේ වෙනකම් කිසිදු සාධාරණයක් සිදු කළේ නෑ. ඇය ප්රකාශ කළාය.
පොලිසිය මේ සම්බන්ධව අපක්ෂපාතී පරීක්ෂණයක් නොකරන්නේ විදුහල්පතිවරයාගේ බිරිය සූරියවැව ප්රාදේශීය සභාවේ මාලිමා මන්ත්රීවරියක වීම නිසා බව ද ඇය චෝදනා කළාය.
සිද්ධිය සම්බන්දයෙන් අප කළ සොයා බැලීමකදී අනාවරණය වූයේ අදාළ විදුහල්පතිවරයා සූරියවැව ප්රාදේශීය සභාවේ මීගහජදුර කොට්ටාසයේ මාලිමා මන්ත්රීවරියගේ සැමියා බවත් ඔහු සූරියවැව රන්මුදුවැව විද්යාලයේ විදුහල්පතිවරයා ලෙස කටයුතු කරන බවත්ය. සිද්දියට අදාළව විදුහල්පතිවරයා සූරියවැව පොලීසයට කැඳවා ප්රකාශයක් පමණක් සටහන් කරගෙන ඇතිබවද වාර්තා වීය.
මේ පිළිබඳව අප සූරියවැව පොලීසියෙන් කළ විමසීමකදී එහි වැඩබලන ස්ථානාධිපති පොලිස් පරීක්ෂක සුරවීර ප්රකාශකලේ නීතිපතිවරයා විසින් පොලිස්පතිවරයා වෙත චක්රලේකයක් මගින් දැනුමදී ඇත්තේ ගුරුවරයෙකු විසින් සිසුවෙකුට සිදුකරන පහරදීමකදී තත්වය බරපතල නොවන්නේ නම් අත්අඩංගුවට ගැනීමක් සිදුනොකරන ලෙස බවය.
තමන් මේ පිළිබදව සොයා බැලීමේදී දරුවාට එවැනි හානියක් සිදු වී නොමැති බවට වාර්තා වූ බවද ඔහු පැවසීය.
මේ සම්බන්ධයෙන් දරුවාගේ මව මානව හිමිකම් කොමිෂන් සභාවට මෙන්ම ළමාරක්ෂන අධිකාරියටද ජනාධිපති වරයාටද පැමිණිළි කිරීමට පියවර ගන්නා බව පැවසුවාය.
