තමන්ගේ තනතුරට හිමි නිල වාහනය වශයෙන් දුන් වාහන 08ක් කැඩී යද්දී ශාවස්ත්රියේ පුස් කකා තිබෙන විට රැගෙනවිත් ජනාධිපති කාර්යාලයේ වාහන පරිපාලන අංශය විසින් ලබා දුන් Porsche Cayenne S වර්ගයේ රථය අධි සුඛෝපභොගී රථයක් නොව, නිසි ආකාරව නඩත්තු නොකළ වහලයෙන් සහ දොරවල්වලින් තෙමෙන යන අතර තුර මහ මග කඩාවැටුන ලදරමක් බව හිටපු ජනාධිපති රනිල් වික්රමසිංහගේ උපදේශකවරියක ලෙස කටයුතු කළ හිටපු නගරාධිපති රෝසි සේනානයක අද (02) විශේෂ මාධ්ය හමුවක් කැඳවා ප්රකාශ කළාය.
මේ රථය ලංකාවට ගෙන්වනු ලැබුවේ කවරෙක් විසින්දැයි තමන් නොදන්න බව ද ඇය ප්රකාශ කළාය. නිසි නඩත්තුවක් නොමැතිව තිබූ එම රථය අඩුම තරමින් අවුරුදු 10කට වඩා පැරණි බව ද ඇය පැවසුවාය.
අධික ඉන්ධන වැයවන මේ රථය අවස්ථා දෙකකදි තමන් විසින් ප්රතික්ෂේප කළ බවත්, අවසානයේ දී කිරිමණ්ඩල මාවතේ මග රථය කැඩි නැවතුන විට එය එම ස්ථානයෙන් ඉවත් කළේ වාහන ප්රවාහනය කරන රථයක් ආධාරයෙන් බවත් කී රෝසි සේනානයක මේ රථය මග කඩා වැටීමෙන් පසු තමන් ජනාධිපති ලේකම් කාර්යාලයෙන් වාහනයක් ඉල්ලුවේ නැති බව කීවාය.
ඇය කළ කරුණු පැහැදිලි කිරීම මෙසේය.
මට පලාත් පාලන ආයතන අංශය සම්බන්ධයෙන් මට ජනාධිති තුමාගෙ උපදේශක හැටියට තනතුරක් එතුමා ලබා දුන්නේ ගිය අවුරුද්දේ 2023 මැයි මාසේ. මම ඒ තනතුරු භාරගත්තේ ජූනි මාසෙ 01 වැනිදා.
ඒ භාරගත්ත අවස්ථාවේදි මට නිල වශයෙන් වාහනයක් ලබා දුන්නා. ඒ වාහනය පෝෂෙ වර්ගයේ වාහනයක් නම් නෙමෙයි. ඒ වාහනය KI-3159 කියන ජීප් රථයක්. ඔය ජීප් රථය ටික කාලයක් පදිනකොට ඒක කැඩුනා. කැඩුනම ඒ වාහනය නැවත ජනාධිපති කාර්යාලයට භාර දුන්නම ඒ වෙනුවට මට තව වාහනයක් දුන්නා. ඒ KD-6376 කියන නිසාන් ජීප් එක.
මේ වගේ 2023 අවුරුද්ද පුරාවටම දුන්න හැම වාහනයක්ම අක්රීය වෙලා කැඩිලා ප්රශ්න ඇතිවෙලා ඒවා භාරදුන්නා. ඒ අතරවාරයේ විවිධ අවස්ථාවලදි මට විවිධ වාහන දුන්නා. මම කිසි ප්රශ්නයක් නැතිව මට කරන්න තිබුණ රාජකාරිය ඒ ආකාරයෙන්ම කරගෙන ගියා.
මේ අතරෙ 2024 පෙබරවාරියේ මට එහෙම ප්රශ්නයක් ඇති වෙලා මට මුකුත් දීගන්න බැරිව ප්රශ්නයක් ඇති වුනා වාහන කැඩුනම. GD-7483 කියන නිසාන් වර්ගයේ ජීප් රථය කැඩිච්ච අවස්ථාවේ දී ඒ ගොල්ලන්ට වාහනයක් හොයා ගන්න බැරිව ශාවස්ත්රියේ පුස් කකා තිබිච්ච ඔය පෝෂ් රථය ගෙනත් මට භාර දුන්නා. මම ඒක පෝෂ් ද මොකක් ද කියන එක දන්නේ නෑ. එදා මට රැස්වීම් ගණනාවක යන්න තිබ්බා. මම ඕකට නැගලා ගියාම ඒක මගදි නැවතුනා.
ආයෙ කොහොම හරි රියදුරා ස්ටාට් කරගෙන ගෙනිච්චම ජනාධිපති කාර්යාලයේ වාහන සම්බන්ධයෙන් කටයුතු කරන අධ්යක්ෂ තුමාට කතා කරලා කිව්වා මේ වාහනය නම් මට එපා. මේක ගන්න, මට වෙන එකක් දෙන්න කියලා.
මැඩම් එක්ක හොයලා දෙනකම් ඕක තියාගන්න කිව්වා. මමත් ඉතින් සද්ද නැතිව ඕක තියා ගත්තා. හැබැයි ඒ අතරතුර මට තේරුනා මේ වාහනයට අධික ලෙස ඉන්ධන වැය වෙනවා කියන එකත්.
ඒ නිසා මම නැවත වාරයක් අධ්යක්ෂ තුමාට කිව්වා මට මේක එපා කියලා මම බාර දුන්නා. බාරදුන්නාම මට කිව්වා ටික කාලයක් තියාගන්න. වාහන නෑ. වාහනයක් හොයලා දෙනකම් කියලා.
මම සමහරවිට ඒක පැද්දෙත් නෑ. මගේ පෞද්ගලික වාහනය තමයි ගොඩක් ගමන් බිමන් ගියේ. එක දවසක් ඕක පදිනකොට කඩන් වැටුනා මහ පාරේ. ඊට පස්සේ ඒක නැවත වාරයක් ජනාධිපති කාර්යාලය භාර ගත්තා. මම හිතන්නේ අප්රේල් නැතිනම් මැයි මාසේ වාගේ. අරගෙන වෙන වාහනයක් ඒකටත් දුන්නා මට. KB -6376 වගේ වාහන 08ක් මේ කාලයේදි මට මාරු කරගෙන දුන්නා.
මේ පෝෂ් රථය ඇත්තටම කියනවා නම් දොරවල් අරින්න බැරි ඩිකියෙ දොර කවදාවත් අරින්න බැරි සන් රූෆ් එක වේයො කාපු වහිනකොට රියදුරාගෙ පැත්තෙ දොරෙනුයි. ඉස්සරහා දොරෙනුයි වතුර ගලන අන්තිමටම, මම හිතන්නේ හරියට මේන්ටේන් නොකරපු වාහනයක්.
මම මේක එපාම කියලා දුන්නා. දෙවැනි සැරෙත් ආපහු මට ඕක දුන්නම කිරිමණ්ඩල මාවතේ දි මහ මග නැවතුනා. නැවතිලා ආපහු ස්ටාර්ට් කරන්න බැරි වුනා. මම ත්රීවිල් එකක නැගලා යන්න තිබුණ ගමන ගියේ. ඒ වෙලාවේ ඒ අයට මේක ස්ටාර්ට් කරලා ගෙනියන්නම බැරි තත්ත්වයක තිබිලා ඒක වාහනයක දාගෙන ගෙනිහින් තිබ්බේ. එදයින් පස්සේ මම ආයෙ ජනාධිපති කාර්යාලයෙන් වාහනයක් ඉල්ලුවෙ නෑ. මම මගේ පුද්ගලික වාහනේ පැද්දෙ.
මේ වාහනේ මම දන්නේ නෑ කවුද මේ රටට ගෙනාවෙ කියලා. නමුත් මම ඉල්ලා සිටිනවා සොයා බැලීමකින් තොරව කාන්තාවන්ට දේශපාලනය එපා කරන මඩ ගහන්න එපා කියලා. රෝසී සේනානායක පැවසුවාය.
