ජනාධිපති ඊබ්රහිම් රයිසිට මරු කැඳවමින් සති අන්තයේ සිදුවූ හෙලිකොප්ටර් අනතුරින් පසු ගලවා ගැනීමේ මෙහෙයුම් සඳහා ආධාර ලබා දෙන ලෙස ඉරානය කළ ඉල්ලීමක් සැපයුම් හේතු මත පිළිගැනීමට නොහැකි වූ බව අද (21) සිය ශෝක ප්රකාශය අතරතුර ඇමරිකා එක්සත් ජනපදය ප්රකාශ කළේය.
ඉරානය විසින් මෙම දුර්ලභ ඉල්ලීම කරන්නේ එක්සත් ජනපදය සහ ඊශ්රායලය තම ප්රධාන විරුද්ධවාදීන් ලෙස සලකා ඉරානය කටයුතු කරන අතරතුර වීම විශේෂ තත්ත්වයක් වු බව එක්සත් ජනපද රාජ්ය දෙපාර්තමේන්තුව මෙම ප්රවෘත්ති සාකච්ඡාවකදී අනාවරණය කළ බව රොයිටර් වාර්තා කර ඇත.
“ඉරාන රජය විසින් අපගෙන් සහය ඉල්ලා සිටියා. අපි ඔවුන්ට පැහැදිලිවම කිව්වා, මෙවැනි තත්වයක් තුළ විදේශ රජයක් විසින් කරන ඕනෑම ඉල්ලීමකට ප්රතිචාර වශයෙන් අපි කරන ආකාරයට අපි සහය ලබා දෙන බව,” රාජ්ය දෙපාර්තමේන්තු ප්රකාශක මැතිව් මිලර් වාර්තාකරුවන්ට පැවසීය.
“අවසානයේ, බොහෝ දුරට සැපයුම් හේතූන් මත, අපට එම සහාය ලබා දීමට නොහැකි වුනා,” මිලර් විස්තර නොකර පැවසීය.
රයිසි, විදේශ අමාත්ය හොසේන් අමිරබ්දොල්ලාහියන් සහ තවත් මගීන් හය දෙනෙකු සහ කාර්ය මණ්ඩලය රැගත් හෙලිකොප්ටරයේ ගිනිබත් වූ සුන්බුන් සඳුදා අලුයම හිම කුණාටු තත්ත්වයන් තුළ සිදු කළ සෝදිසි කිරීම්වලින් පසු සොයා ගන්නා ලදී.
එක්සත් ජනපදයේ නිෂ්පාදිත බෙල් 212 හෙලිකොප්ටරය අසර්බයිජාන් දේශසීමාව ආසන්නයේ කඳුකරයේ කඩා වැටීමට හේතුව ඉරානය තවමත් නිල වශයෙන් ප්රකාශ කර නැත.
ඉරාන සන්නද්ධ හමුදා මාණ්ඩලික ප්රධානී මේජර් ජෙනරාල් මොහොමඩ් බගෙරි විසින් ජනාධිපති ඊබ්රහිම් රයිසි සහ ඔහු සමඟ පැමිණි කණ්ඩායම දිවි පිදූ හෙලිකොප්ටර් අනතුරේ සිද්ධිය සම්බන්ධයෙන් විමර්ශනය කිරීම සඳහා ඉහළ පෙළේ නියෝජිත පිරිසක් වෙත පවරා ඇත.
බ්රිගේඩියර් අලි අබ්දුල්ලාහිගේ ප්රධානත්වයෙන් යුත් දූත පිරිස සිද්ධිය වූ ස්ථානයට යවා ඇති අතර මේ වන විටත් විමර්ශන ආරම්භ කර ඇත.
මේ තත්ත්ව තුළ ටෙහෙරානය වොෂින්ටනයට දොස් පැවරිය හැකියැයි කනස්සල්ලක් ඇතිවේ දැයි මාධ්යවේදීන් ඇසූ විට, එක්සත් ජනපද ආරක්ෂක ලේකම් ලොයිඩ් ඔස්ටින් පැවසුවේ: එම කඩාවැටීම සම්බන්ධව එක්සත් ජනපදයට කිසිම කාර්යභාර්යයක් නොතිබුණ බවය.
රුසියාවේ හැසිරීම
ඉරාන ජනාධිපතිවරයාගේ හෙලිකොප්ටර් අනතුර දැනගත් වහාම රුසියානු ජනාධිපති වැඩිමීර් පුටින් විසින් ඉරිදා දින රුසියාවේ නිවාඩු දිනයක් වුව ද එදින රාත්රී 10ට රටේ ප්රධාන ආරක්ෂක නිලධාරීන් සහ ආරක්ෂක අංශවල ජ්යෙෂ්ඨ නිලධාරීන්ගේ සහභාගීත්වයෙන් රැස්වීමක් කැඳවා රුසියාවේ ඉරාන තානාපති කසෙම් ජලාලිට එම රැස්වීමට ආරාධනා කර තිබූ බව ඉරාන රාජ්ය ප්රවෘත්ති සේවය IRNA වාර්තා කර තිබිණි.
රුසියාවේ ආරක්ෂක ඇමති, අන්ද්රෙයි බෙලොයුසොව් ජාතික ආරක්ෂක කවුන්සිලයේ ලේකම් සර්ජි ෂොයිගු, සන්නද්ධ හමුදාවන්ගේ ඒකාබද්ධ මාණ්ඩලික ප්රධානී වැලරි ගෙරසිමොව්, සිවිල් ආරක්ෂක, හදිසි අවස්ථා සහ ආපදා සහන අමාත්ය ඇලෙක්සැන්ඩර් කොරෙන්කොව්, ජනාධිපති විශේෂ සහකාර ඊගෝර් ලෙවිටින් සහ ෆෙඩරල් ආරක්ෂක සංවිධානයේ ජ්යෙෂ්ඨ නිලධාරියෙකු ඇතුළු නිලධාරීන් කණ්ඩායමක් පුටින් ගේ ප්රධානත්වයෙන් පැවති මෙම රැස්වීමට සහභාගී වූයේය.
මුලින්ම ඉරාන ජනාධිපතිවරයාගේ හෙලිකොප්ටර් අනතුර සම්බන්ධයෙන් සිය කණගාටුව පල කළ පුටින් , අවශ්ය ඕනෑම උදව්වක් කරන බව ඉරාන තානාපතිවරයාට සපථ කර තිබිණි.
හෙළිකොප්ටරය කඩා වැටුණු ප්රදේශයට ඇතුළුවීම සඳහා සම්පූර්ණ උපකරණ සහ පුහුණු කඳු නගින්නන් සමඟ රටේ හොඳම හමුදා නිලධාරීන් 50 ක් සහිත ගුවන් යානා දෙකක් සූදානම් කර ඇති බව පුටින් තානාපතිවරයා වෙත දැනුම් දුන් බවත්, සඳුදා උදෑසන ආර්මේනියාවේ සිට ගලවා ගැනීමේ මෙහෙයුමට සම්බන්ධ වීමට රුසියානු හෙලිකොප්ටර් දෙකක් ද සූදානම් බවත් පුටින් ඉරාන තානාපතිවරයාට දන්වා තිබිණි.
ඝාතනයක් ද?
මේ වනවිට ඉරාන ජනාධිපතිවරයාගේ මරණය සැක සහිත බවට පළවෙන මතවාදයක් සමාජ මාධ්ය තුළ විශාල සංවාදයක් ඇති කර තිබේ. ඒ සඳහා වූ පසුබිම් තොරතුරු ද සහිතව මතවාදයක් ගොඩනැගෙමින් ඇත
ඉරාන ජනාධිපතිවරයා ඇතුළු කණ්ඩායම් ගමන් ගත් හෙළිකොප්ටර තුනෙන් ජනාධිපතිවරයා ගමන්ගත් හෙළිකොප්ටරයම අනතුරට ලක් වන්නේ ලේසර් වෙඩි ප්රහාරයකින් බවට මේ යෝජනා අතර ප්රමුඛය.
අනතුර සිදුවූ ස්ථානයට ප්රතිමුඛ කඳු මුදුන මත අසාමාන්ය ලෙස හැසිරෙන පුද්ගලයෙකුගේ ගුවනින් ගත් වීඩියෝ දර්ශන ද සමාජ මධ්ය ඔස්සේ සීඝ්රයෙන් පැතිරෙමින් ඇත.
