ආණ්ඩුව භාරගැනීමට ආරාධනා කළ විට ජාතික ජන බලවේගය පැන ගිය පවසන ජනාධිපති රනිල් වික්රමසිංහගේ කතාව ප්රාථමික බොරුවක් බවත් රාජපක්ෂ ආණ්ඩුව කිසිම අවස්ථාවක තමන්ට රජය භාර ගැනීමට ආරාධනා නොකළ නමුත් ඒ අවස්ථාවේ දී රට භාර ගැනීමට සූදානම් බව ජාතික ජන බලවේගය ලිඛිතව හිටපු ජනාධිපතිවරයාට දැන්වුව ද ලිපිය ලද බවට හෝ දැන්වීමක් නොකළ බවත් ජාතික ජන බලවේගයේ නායක අනුර කුමාර දිසානායක පැවසුවේය.
“රනිල් වික්රමසිංහ, ඔයා ජනාධිපති. රනිල්ගේ තරමට ඔය වාගේ ප්රකාශ කළාට කමක් නැහැ. හැබැයි, ජනාධිපති ධුරයේ ඔය විදිහට හැසිරෙන්න එපා” අනුර කුමාර දිසානායක කීවේය.
අද කොළඹ දි විශේෂ මාධ්ය හමුවක් කැඳවා ජනාධිපති රනිල් වික්රමසිංහ ඇතුළු සියලුම විරුද්ධ දේශපාලන පක්ෂ නගන අවලාද සඳහා පිළිතුරු දෙමින් අනුර කුමාර දිසානායක මෙසේ ද පැවසුවේය.
දේශපාලන බලය පොදු ජනතාවගේ අතට මාරු වෙයි කියා දූෂිත කල්ලිය කවදාවත් කල්පනා කළේ නැහැ. දීර්ඝ කාලයක් ආණ්ඩු කළ ඇමැති ධුර දැරූ අය පිල්වලට බෙදී ඉන්න අතරේ මේ දේශපාලන සූදුව නිමා කිරීමට ප්රතිපත්තිගරුකව, සැලැසුම්සහගතව මැතිවරණ ව්යාපාරය කරගෙන යන අපිට එරෙහිව සතුරන් අසත්ය සහ අවලාද නඟමින් යනවා. කුරුණෑගල වේදිකාවක එක් මන්ත්රීවරයෙක් ප්රකාශයක් කළා අපි බලයට ආවොත් ඇත්කඳ විහාරයේ පෙරහැර නතර කරනවා කියලා. අපි කවදාවත් ඒ මන්ත්රීවරුන් ගැන කියන්න නොසිතූ දේවල් දැන් කියන්න සිදුවෙලා තිබෙනවා. ඔහු අප සමඟ එක්වීමට තිස්හතළිස් වතාවක් ආවා. අපට පක්ෂපාතී කරුණු එළියේදී ඉදිරිපත් කර ඒ බව වට්ස්ඇප්වලින් අපට එවා තිබුණා. ඔහු අද වෙන වේදිකාවල ඉතාමත් බාල අවලාද නඟනවා.
මේ රටේ ශිෂ්ටාචාරය, සමාජය ගොඩනැඟී තිබෙන ආකාරය ගැන ඉතා හොඳ අවබෝධයක් තියෙන දේශපාලන ව්යාපාරයක් අපි. සෑම ජන ප්රජාවකටම තමන්ට අනන්ය වූ සංස්කෘතීන් තිබෙනවා. ඒ අනන්ය වූ සංස්කෘතික උත්සව, ආගමික උත්සව මෙන්ම අනන්ය වූ ආගමික සම්ප්රදායන් ආරක්ෂා කරමින්, රැකබලාගෙන අනාගතයට පවරා දීම අපගේ අපේක්ෂාවයි.
තව පිරිසක් රත්නපුරයට ගිහින් කියනවා, අපේ පාලනයක් යටතේ පතල් කැණීම් සම්පූර්ණයෙන් නතර කරනවා කියලා. ඇත්තටම අපේ අපේක්ෂාව හොංකොං නගරයට කේන්ද්රගත වී තිබෙන ජාත්යන්තර මැණික් වෙළෙඳපොළ මධ්යස්ථානය අප වෙත ලබා ගැනීමයි. අපේ අපේක්ෂාව විවිධ ආකාරයෙන් විකෘති කරනවා.
අපේ පාලනයක් යටතේ විරුද්ධවාදීන්ගෙන් පළිගනී යැයි තව පැත්තකින් බියක් හදනවා. එක්දහස්නවසිය හැත්තෑහතේ බලයට පත් වූ ජේ. ආර්. ජයවර්ධන පොලිසියට නිවාඩු දුන්නා. විරුද්ධවාදීන් ඝාතනය කිරීම, ගෙවල් ගිනි තැබීම වැනි ක්රියාවලට අනුබල දී ඔවුන් මැතිවරණ ජය සැමරුවා. ඉන් පසු රාජ්ය ආයතනවල සේවකයන් රාජකාරීවලට පැමිණීමට නොහැකි ලෙස මර්දනය දියත් කරමින් දේශපාලන ජය සැමරුවා. නමුත්, ජාතික ජන බලවේගයේ ජයග්රහණයෙන් පසුව අනෙක් පක්ෂවලට ඡන්දය දුන් සහ ක්රියාකාරී වූ කිසිවකුට නිය පිටින් හිංසාවක්, පීඩාවක් නොවෙන්නට වගබලා ගැනීම අප තහවුරු කරනවා. එය අපේ වගකීමක්. නමුත්, ඔවුන්ගේ මුළු මැතිවරණ ව්යාපාරයම අවලාදවලින් පවත්වාගෙන යනවා.
අනෙක් පැත්තෙන් රනිල් වික්රමසිංහ කියනවා ආණ්ඩුව බාරගන්න අපට ආරාධනා කළ අවස්ථාවේ පැනලා ගියා කියලා. අපි ඔහුට කියන්නේ “රනිල් වික්රමසිංහ, ඔයා ජනාධිපති. රනිල්ගේ තරමට ඔය වාගේ ප්රකාශ කළාට කමක් නැහැ. හැබැයි, ජනාධිපති ධුරයේ තරමට ඔය වාගේ කතා කියන්න එපා” රාජපක්ෂලා කිසිම අවස්ථාවක ආණ්ඩු ගන්න අපට ආරාධනා කළේ නැහැ. අප ඒ ගැන පුදුම වෙන්නෙත් නැහැ. රාජපක්ෂලා මල් වට්ටියක තියලා අපට බලය පවරා දෙන්නේ නැහැ.
2022 මැයි දොළොස් වැනිදා ආණ්ඩුව භාරගන්න සූදානම් බවට ගෝඨාභය රාජපක්ෂට ලිඛිතව දැන්වූවා. අඩුම තරමින් එවැනි ලිපියක් ලැබුණු බවටවත් පිළිතුරක් එව්වේ නැහැ. ඊළඟට ජූලි විසිවැනිදා පාර්ලිමේන්තුවෙන් ජනාධිපති තෝරා ගැනීමේදී අපට ලැබුණේ ජාතික ජන බලවේගයේ ඡන්ද තුන පමණයි. ඒ වෙලාවේ අපිට ඡන්දය දුන්නේ නැහැනේ. අප කිසිසේත්ම අභියෝග හමුවේ කවදාවත් පැනලා යන මිනිසුන් නොවෙයි. මේ සියලු කඩාවැටීම් හමුවේත්, අප සූදානමින් සිටින්නේ රට ගොඩනැඟීමේ අභියෝගය භාර ගන්නයි.
ඒ නිසා අප නැවත අවධාරණය කරන්නේ “රනිල් වික්රමසිංහ, ඔයා රනිල් වික්රමසිංහගේ තරමට හැසිරුණාට කමක් නැහැ. නමුත්, ජනාධිපති ධුරයේ ඔය විදියට කටයුතු කරන්න එපා” කියලයි. අපට අවලාද එල්ල කරමින්, ඉතිහාසයේ සමහර ඝාතන පිළිබඳව ප්රචාරක මෙහෙයුමක් දියත් කිරීමට සූදානම් වෙනවා. ඒ ප්රචාරක කටයුතු සූදානම් කරන අයම අපිට ඒ පණිවිඬේ දෙනවා. අඩුම වශයෙන් රනිල් වික්රමසිංහට ඔවුන්ගේ ඡන්දයවත් ගන්න බැහැ. රනිල් වික්රමසිංහ, සජිත් ප්රේමදාස ඔවුන්ගේ වේදිකාවල මොනවා කිව්වත්, පළමු වතාවට මේ රටේ ජනතාවගේ ආණ්ඩුවක් ගොඩනැඟීමට ලැබී තිබෙන අවස්ථාව ජයග්රහණය කරා ගෙන යන්න හැම දෙනාගේම කැපවීම අප අපේක්ෂා කරනවා.
