දිනසේන රතුගමගේ
පෙම්වතා ඕස්ට්රෙලියාවට යවන බව කියමින් රුපියල් ලක්ෂ 18 ක මුදලක් වංචා කළ තරුණියක් කිළිනොච්චිය පොලිසිය විසින් 14 දා අත් අඩංගුවට ගෙන තිබේ.
යාපනයේ මනිපායි ප්රදේශයේ පදිංචි මෙම තරුණයා සිය පෙම්වතිය බැලීමට කිළිනොච්චියට වරින් වර පැමිණ ඇති අතර එසේ පැමිණි එක් අවස්ථාවකදී තරුණියගේ ඥාතියෙකු ඕස්ට්රෙලියාවේ සිට කතා කරන බව කියමින් දුරකතනය පෙම්වතා අතට දී තිබේ.
මෙසේ දින කීපයක්ම දුරකතනයෙන් කතා කිරීමෙන් පසුව පෙම්වතාව ඕස්ට්රෙලියාවට කැඳවා ගත හැකි බව පවසා ඊට අවශ්ය කටයුතු කිරීම සඳහා පෙම්වතියට මුදල් ලබා දෙන ලෙස ලෙස ඉල්ලීමක් කොට තිබේ.
ඒ අනුව තරුණයා රුපියල් ලක්ෂ 18 ක මුදලක් පෙම්වතියට දී ඇති අතර එම මුදල ලබා දුන් දිනයේ සිට පෙම්වතිය වෙනස් වන්නට පටන් ගෙන අවසානයේදී පෙම් සබදතාවයද නවතා දමා තිබේ.
මේ සම්බන්ධයෙන් පෙම්වතා පොලිසියට කරන ලද පැමිණිල්ලක් අනුව පෙම්වතිය අත්අඩංගුවට ගෙන ඇති කිළිනොච්චිය පොලිසිය ඇය අධිකරණය වෙත ඉදීරිපත් කිරීමට පියවර ගෙන ඇත.
