දිනසේන රතුගමගේ –
රටේ දැවෙන ප්රශ්න වලට පිළිතුරු ලබා දිය නොහැකි රජයකින් මේ රටේ සුලුතරයක් වූ දෙමළ ජනයාගේ ප්රශ්න වලට පිළිතුරු ලබා ගැනීමට යාම කවරදාකවත් සැබෑ නොවන සිහිනයක් යැයි දෙමළ ජාතික සන්ධානයේ කිළිනොච්චිය දිස්ත්රික් පාර්ලිමේන්තු මන්ත්රී එස්.ශ්රීධරන් පවසයි.
කිළිනොච්චියේ පිහිටි මන්ත්රීවරයාගේ කාර්යාලයේ ඊයේ (02) පැවතිමාධ්ය හමුවකදී ඔහු මේ බව කීවේය.
මෙහිදී ශ්රීධන් මන්ත්රීවරයා මෙසේ ද පැවසුවේය.
“මේ ආණ්ඩුවට රටේ ප්රශ්න විසදීමට නොහැකි නිසා මේ වන විට ජනතාව අතරින් විශාල විරෝධයක් ගොඩ නැගී තිබෙනවා. විදුලිය පිළිබඳව විශාල අර්බූදයක් පවතිනවා. ඉන්ධන සම්බන්ධයෙන්ද විදේශ විනිමය සම්බන්ධයෙන්ද මේ රජයට අර්බූදකාරී තත්ත්වයක් පැන නැගී තිබෙනවා.“
“මේ තත්ත්වයන් නිසා ජනතාව පීඩාවට පත්ව සිටින බව ඉතාම පැහැදිලිව පෙනෙන්නට තිබෙනවා. පසුගිය කාලයේදී කෘෂිකර්මාන්තය සම්බන්ධයෙන් විවිධ ප්රශ්න ගොඩ ගැසුනා. කාබණික පොහොර භාවිතයට හුරුවන ලෙස ගොවි ජනතාවට දුන් උපදෙස් නිසා මේ රටේ ගොවියන් වීශාල පීඩාවකට පත් වුණා.“
“ගොවියාගේ වී අස්වැන්න අඩුවීමට මේ පොහොර ප්රශ්නය මුලික වුණා. දැන් රජය ගොවීන්ට වන්දි මුදල් ලබා දිමට සැරසෙනවා. රුපියල් ලක්ෂ ගණනක් වියදම් කොට විනාශ වූ කුඹුරු වෙනුවෙන් වන්දි වශයෙන් ලැබෙන්නේ රුපියල් පනස්දාහක් පමණයි. උතුරු පළාතේ බඩඉරිගු වගාවන් කළ ගොවීන්ගේ වගාවන් පොහොර නොමැතිකම නිසා විනාශ වී ගියා. නමුත් ඒ වගේ ගොවිතැන් සම්බන්ධයෙන් රජය කිසිම කතාවක් කරන්නේ නෑ.“
අවුරුදු දහස් ගණනාවක් පැරණි ගොවිතැන රැක ගැනීමට නොහැකි වූ මේ රජය කෙරෙහි ඒ රජය පත් කර ගත් දකුණේ ජනතාවම විරෝධය පල කරන තත්ත්වයකට පත්ව තිබෙනවා. මෙවැනි වාතාවාරණයක් තුළ දෙමළ ජනතාවගේ ප්රශන් විසදා දෙන ලෙස කොතරම් හඩක් නැගුවත් මේ රජයෙන් දෙමළ ජනතාවට තබා සිංහල ජනතාවටවත් සහනයක් සැලසෙන්නේ නෑ.
රජයේ මේ අදූරදර්ශී ක්රියා පිළිවෙත නිසා සිංහල ජනතාවත් විශාල පීඩාවකට පත්ව සිටිනවා. මෙහෙම තත්ත්වයක් යටතේ දෙමළ ජනතාවට මේ රජයෙන් කිසිම දෙයක් ලැබෙන්නේ නෑ.
අපේ දෙමළ දේශපාලනඥයින් හා නායකයින් මේ රජයෙන් දෙමළ ජනතාවගේ අයිතිවාසිකම් වෙනුවෙන් බොහෝ දේ ඉල්ලා සිටිනවා. ගොවීන්ගේ ප්රශ්න විසඳීමට නොහැකි තත්ත්වයක් තුළ මේ රජයෙන් දෙමළ ජනයාගේ අයිතිවාසිකම් වෙනුවෙන් යමක් ඉල්ලා සිටීමෙන් අයත්වන ප්රයෝජනයක් නෑ.
දැන් ජිනීවා මානව හිමිකම් මණ්ඩලය විසින් ඉදිරිපත් කරනු ලබන නිර්දේශයන් නිසා යළිත් මේ රජය දැඩි අපහසුතාවයකට පත්ව සිටිනවා. හැමදාකම ජාත්යන්තරය හා එම සංවිධාන රවනවා. තමන්ගේ බලය පෙන්වීමට මේ රජය උත්සාහ කළත් මේ වන විට එහි විපාක විදීමට සිදුව තිබෙනවා.”
