යෝජිත විදුලි ගාස්තු සංශෝධනය ප්රතික්ෂේප කළහොත් පැය 06 ත් 08 ත් අතර කාලයක් විදුලිය විසන්ධි කිරීමට ශ්රී ලංකාවට සිදුවනු ඇතැයි විදුලිබල හා බලශක්ති අමාත්ය කාංචන විජේසේකර අද (06) පාර්ලිමේන්තුවේ දී අනතුරු ඇඟවීය.
පාර්ලිමේන්තුවේදී අදහස් දක්වමින් අමාත්යවරයා පැහැදිලි කළේ පසුගිය වසර කිහිපය තුළ ලංකා විදුලි බල මණ්ඩලයට සිදුවූ පාඩුව අයකර ගැනීමේ සැලසුම් පිළිබඳව කිසිදු යෝජනාවක් කැබිනට් මණ්ඩලයට ඉදිරිපත් කර නොමැති බවයි.
“අමාත්ය මණ්ඩලයට භාරදී ඇති වාර්තාවේ දැක්වෙන්නේ පසුගිය වසර කිහිපය තුළ විදුලිබල මණ්ඩලයට සිදුවූ පාඩුව සහ විදුලිබල මණ්ඩලයට උපකාර කිරීම සඳහා භාණ්ඩාගාරයෙන් ලබාදුන් මූල්ය ආධාර පමණි. විදුලි ජනන පිරිවැයට සරිලන පරිදි විදුලි ගාස්තු සංශෝධනය කිරීම පමණයි ඉදිරිපත් කළ එකම යෝජනාව.” ඔහු පැවසීය.
සෑම වසරකම ජනවාරි සහ ජූනි මාසවල විදුලි බිල සංශෝධනය කරන අවස්ථාවේ විදුලි ජනන පිරිවැයට සරිලන පරිදි අදියර දෙකකින් විදුලි ගාස්තු සංශෝධනය කිරීමට පමණක් යෝජනා වී ඇති බව අමාත්ය කාංචන විජේසේකර වැඩිදුරටත් පැවසීය.
“2023 දී බාධාවකින් තොරව විදුලිය ලබාදීමේ සැලැස්ම අපට ලබා දෙන ලෙස අපි ලංවිමෙන් ඉල්ලා සිටියා. ලබන වසරේ නියඟයක් ඇති විය හැකි බවත් වර්ෂාපතනයේ අඩුවීමක් ඇති විය හැකි බවත් එසේ වුවහොත් ජල විදුලිය ජනනයේ අඩුවීමක් සිදුවන බවත් ලංවිම පෙන්වා දී තිබෙනවා. එබැවින් ඔවුන් ගණන් බලා ඇත්තේ රු. එක් විදුලි ඒකකයක් ජනනය කිරීම සඳහා රුපියල් 56.90 ක් වැය වන බවයි. ලබන වසර සඳහා ගිගාවොට් 17,000 කට වැඩි ජනනයක් රටට අවශ්යයයි.
විදුලිබල මණ්ඩලය ඉල්ලා සිටි ගාස්තු සංශෝධනය ශ්රී ලංකා මහජන උපයෝගිතා කොමිෂන් සභාව විසින් ලබාදී නොමැති බවත්, වසර 09කට පසුව පසුගිය අගෝස්තු මාසයේදී ගාස්තු සංශෝධනය කළ බවත් අමාත්යවරයා පෙන්වා දුන්නේය.
වාර්ෂිකව ගාස්තු සංශෝධනය කිරීම මහජන උපයෝගිතා කොමිසමේ වගකීමක් බවත් එහෙත් ඔවුන් එම ක්රියාවලිය අනුගමනය කර නොමැති බවත් ඔහු අවධාරණය කළේය.
“විදුලි උත්පාදනය සඳහා තෙල්, ඉන්ධන සහ ගල් අඟුරු මිලදී ගැනීමට අවශ්ය අරමුදල් අපට නොලැබුණහොත්, 2023 දී පැය 06-08 අතර විදුලි කප්පාදුවක් ශ්රී ලංකාව අපේක්ෂා කළ යුතුයි,” ඔහු පැවසීය.
යෝජිත ගාස්තු සංශෝධනයට බොහෝ පාර්ශ්ව විරෝධය පළ කරන බවත්, ඔවුන්ගේ මතය එය නම් රජය ගාස්තු සංශෝධනය කිරීමෙන් වළකින නමුත් එහි ප්රතිඵලය දීර්ඝ විදුලි කප්පාදුවකට මුහුණ දීමට සිදුවීම බවත් ඔහු ප්රකාශ කළේය
