දිනසේන රතුගමගේ –
උතුරු – නැගෙනහිර රැකියා විරහිත උපාධීධාරීන්ගේ සංගමය විසින් උතුරු පළාත් ආණ්ඩුකාර කාර්යාලය ඉදිරිපිට ඊයේ ( 29 ) සිට අඛණ්ඩ උපවාසයක් ආරම්භ කොට තිබේ.
ඔවුන් ප්රකාශ කරන්නේ මැතිවරණ සමයේදී සියලුම උපාධීධාරීන්ට රැකියා ලබා දෙන බවට විවිධ දේශපාලනඥයින් පොරොන්දු ලබා දෙන ලද නමුත් මේ වන විට උතුරු නැගෙනහිර පළාවල උපාධීධාරීන් 21000 ක් පමණ තවමත් රැකියා විරහිතව සිටින බවයි.
මෙම රැකියා විරහිත පිරිසට තරග විභාග පොදු පරීක්ෂණ නොපවත්වා උපාධියට ගැලපෙන අන්දමේ රැකියාවක් වහාම ලබා දෙන ලෙස ඔවුහු ඉල්ලා සිටිති.
යාපනයේ ස්ථාන කීපයක් තුළ විරෝධතා පැවැත්වීමට මුලින් එම සංගමය තීරණය කරණු ලැබීමත් පොලීසිය ඊට විරෝධය පල කිරීම නිසා ඔවුන් ආණ්ඩුකාර කාර්යාලය ඉදිරිපිට උපවාසයක් දියත් කොට තිබේ.
කෙසේ වෙතත් ජනාධිපති අනුර කුමාර දිසානායක සහභාගිවන යාපනය දිස්ත්රික්කයේ සුහද හමු මේ වනවිට ආරම්භ වී ඇති අතර පස්වරු 1.30ට හමුවක් වැල්වැටිතුරේ හි සංවිධානය කර තිබිණි. දෙවැනි හමුව 3.30ට චාවකච්චේරියේ දී පැවැත්වේ.
මේ අතර හෙට( 31 ) යාපනය දිස්ත්රික්කයේ සංවර්ධන කමිටු රැස්වීමට අනුර කුමාර දිසානායක ජනාධිපතිවරයා පැමිණි පසුව උතුරු නැගෙනහිර රැකියා විරහිත උපාධීධාරීන්ගේ සංගමයේ තෝරා ගත් නියෝජිතයින් පිරිසක් ජනාධිපතිවරයා හමු වී මෙම ප්රශ්නය පිළිබදව සාකච්ඡා කිරීමටද නියමිතය.
