ශ්රී ලංකාව තුළ යෝගා ව්යායාම ප්රවර්ධනය කරමින් යෝගා දිනය සැමරීම සඳහා එක්වන ලෙසට ඉන්දීය අග්රාමාත්ය නරේන්ද්ර මෝදි ජනාධිපති රනිල් වික්රමසිංහ වෙත ලිපියක් එවමින් ඉල්ලා තිබේ.
පැරණි ඉන්දියානු උරුමයක් වන යෝගා හි වැදගත්කම සඳහන් කරමින් ඉන්දීය අග්රාමාත්යවරයා, මෙම වසරේ ජාත්යන්තර යෝගා දින සැමරුම් සාර්ථක කර ගැනීම සඳහා සහයෝගය බලාපොරොත්තු වන බව ද ජනාධිපතිවරයා වෙත එවූ ලිපියේ සඳහන් කර තිබේ.
සෑම වසරකම ජූනි මස 21 වන දින සමරනු ලබන ජාත්යන්තර යෝගා දිනයට සමගාමීව ඉන්දියානු මහ කොමසාරිස් කාර්යාලය සහ එහි සංස්කෘතික අංශය වන ස්වාමි විවේකානන්ද සංස්කෘතික මධ්යස්ථානය විසින් මෙරට සංවිධානය කළ යෝගා මහෝත්සවය ජූනි 13 වන දා ආරම්භ වූ අතර දින 10 ක් පුරා පැවති එහි අවසාන මහෝත්සවය අද (22) කොළඹ ගාලු මුවදොර පිටියේ දී පැවැත්විණි.
එම අවස්ථාවට ශ්රී ලංකාවේ ඉන්දීය මහ කොමසාරිස් සන්තෝෂ් ජා එක්ව සිටි අතර විශේෂ ආරාධිතයන් ලෙස මැති ඇමතිවරු ඇතුළු සම්භාවනීය අමුත්තන් රැසක් සහභාගී වී සිටියහ. එමෙන්ම මේ සඳහා දරු දැරියන් ඇතුළු විශාල පිරිසක් සහභාගිවී සිටි අතර ශ්රී ලංකාවේ සහ ඉන්දියාවේ කීර්තිමත් යෝගා ආයතන 25 ක ප්රවීණයන් විසින් යෝගා සහ භාවනාව පිළිබඳ පුනර්ජීවන සැසියක් ද පවත්වන ලදි.
ජාත්යන්තර යෝගා දිනය වෙනුවෙන් ඉන්දියානු මහ කොමසාරිස් කාර්යාලය, මහනුවර සහකාර ඉන්දියානු මහ කොමසාරිස් කාර්යාලය, හම්බන්තොට සහ යාපනය ඉන්දියානු කොන්සල් ජෙනරාල් කාර්යාල විසින් යෝගා වැඩසටහන් 100 ක් පමණ සංවිධානය කර තිබුණි.
එක්සත් ජාතීන්ගේ මහා මණ්ඩලය විසින් 2014 වසරේ දී ඉන්දියාව විසින් යෝගා සම්බන්ධව ඉදිරිපත් කරන ලද යෝජනාවක් සම්මත කළ අතර, ඒ අනුව සෑම වසරකම ජූනි 21 වන දා ජාත්යන්තර යෝගා දිනය ලෙස ප්රකාශයට පත් කෙරිණි. මෙම යෝජනාවට රටවල් 170 කට අධික සංඛ්යාවක් සහය පළ කළ අතර ශ්රී ලංකාව එම යෝජනාවේ සම අනුග්රාහකයෙකු විය.
